Enterprise Urwibutso yiyemeje gufata neza abayigana muri Made in Rwanda Expo 2019

Yanditswe na Evariste Nsengimana
Kuya 30 Ugushyingo 2019 saa 11:28
Yasuwe :
0 0

Entreprise Urwibutso izwi nka ‘Nyirangarama’, yasobanuriye byihariye abitabiriye imurikagurisha ry’ibikorerwa mu Rwanda, serivisi itanga zishingiye ku buhinzi, inabasogongeza ku muvinyo [Wine] yitegura kumurika kugira ngo bawutangeho ibitekerezo by’uko bifuza ko wanozwa.

Ku wa 22 Ugushyingo 2019 nibwo Made in Rwanda Expo 2019 iri kubera i Gikondo muri Expo Ground yatangiye, biteganyijwe ko izasozwa ku wa 4Ukuboza 2019.

Iri murikagurisha ryitabiriwe n’abamurika bo mu nzego zitandukanye zirimo ikoranabuhanga, inganda, ubuhinzi n’ubworozi, ubugeni n’izindi bakorera mu Rwanda.

Ukigera aho Entreprise Urwibutso imurikira ibikorwa byayo, usanganirwa n’abakobwa bakwakirana urugwiro bijyanye n’umuco nyarwanda, bakagusobanurira ibihamurikirwa birimo ubuhinzi bw’ibikoresho uru ruganda rwifashisha n’ibicuruzwa bimaze kubaka izina mu Rwanda no mu mahanga.

Uretse ibyo na restaurant irimo ibiribwa bitandukanye n’icyokezo cyihariye ku nyama, ibirayi n’ibindi byokejwe bya gihanga, unahasanga umukozi w’impuguke mu buhinzi ugusobanurira uko ubuhinzi bukorwa n’ushinzwe gusobanura ibiciro na serivisi zitangwa na Entreprise Urwibutso, yashinzwe na Sina Gérard.

Usibye n’ibyo abantu bakomeje kugana iri murikagurisha, Entreprise Urwibutso ibafitiye udushya twinshi turimo nko gufata amafunguro mutaramiwe n’ababyinnyi, abahanzi, abakorobate, itorero rya kinyarwanda. Niho honyine usanga ibyo kurya wiyarurira kandi ugahitamo ibyo ushaka, inyama zokeje z’ubwoko bwose kandi ziryoshye.

Unahasanga kandi amata meza y’umwimerere utasanga ahandi, ikivuguto n’inshyushyu ku babikunda ndetse ntiyibagiwe n’abafata agahiye.

Hari aho kwicara hatandukanye harimo na VIP igizwe n’itapi y’umutuku ku buryo imiryango yahasohokeye itaha yishimye n’abana bamwenyura kuko n’ibisuguti bakunda bihari.

Umukozi ushinzwe ubuhinzi akaba n’umurezi muri College Foundation Sina Gérard, Kwihangana Patrice, yabwiye IGIHE ko ku kibanza bakoreraho hamurikirwa ibikoresho bitandukanye bishingiye ku buhinzi kuko ari ryo pfundo ry’ibikorwa byose by’icyo kigo.

Ati “Umwihariko dufite ni igicuruzwa gishya cy’umuvinyo tutarashyira ku isoko turimo gusogongeza abakiliya kugira ngo baduhe ibitekerezo batubwire niba iryoshye, icyo twakongeramo cyangwa twagabanyamo.”

Kwihangana yasobanuye ko bamurika ibikomoka ku buhinzi byifashishwa mu gutunganya ibiribwa n’ibinyobwa bya Entreprise Urwibutso birimo urusenda, inanasi, pome, imizabibu, inkeri n’ibindi.

Ibyo bihingwa ni byo bitunganywamo ibiribwa n’ibinyobwa bya Entreprise Urwibutso, bimaze kubaka izina ku isoko ry’u Rwanda no mu mahanga birimo Agashya, Akabanga, Akarusho, Akandi, Akarabo, Divayi ikorwa mu bitoki, amafu y’Akanozo, urwibutso n’ibindi bikorwa mu bihingwa byo mu Rwanda.

Ati “Umwihariko dufite ni uwo kwereka abanyarwanda ko bya bihingwa bahinga rimwe na rimwe bataboneraga isoko cyangwa basuzugura bifite agaciro ndetse bishobora gutunganywa, bigatanga umusaruro.”

Aha yatanze urugero ku rusenda ukunze gusanga ruhingwa hiryano hino mu gihugu rwifashishwa nk’indyoshyandyo ariko Entreprise Urwibutso irasobanurira abitabiriye iri murikagurisha uko ruhingwa, uko rutuburwa kugeza rutanze umusaruro ushimishije nk’Akabanga kamaze kubaka izina.

Ati “Ntabwo ari ukubona ibikoresho byacu twabishyize hariya gusa, turashaka no kubigisha ngo mu gihugu hose bazihinge, natwe tubone umusaruro tuwutunganye duhe abanyarwanda ibinyobwa byiza.”

Uretse urusenda, mu bihingwa Entreprise Urwibutso irimo kumurika uburyo byitabwaho kugeza bitanze umusaruro wifashishwa muri urwo ruganda harimo inkeri, inanasi n’ibindi bihingwa ngengabukungu bitamenyerewe mu Rwanda nka Pome, imizabibu n’ibindi.

Entreprise Urwibutso kandi iramurika serivisi itanga zitandukanye zirimo nk’izitangirwa mu ishuri ry’imyuga n’ubumenyi ngiro ‘College Foundation Sina Gerard’.

Ati “Turashaka kwigisha abana b’abanyarwanda imyuga n’ubumenyingiro no kwihangira umurimo ariko cyane cyane dushingiye kuri Laboratwari n’inganda biri kuri Nyirangarama.”

Abize muri iri shuri ntabwo bagorwa no gushaka aho bimenyereza umwuga kuko bitewe n’icyo yize ahita yimenyereza muri iki kigo cya Entreprise Urwibutso ndetse abarangijemo benshi bagahabwamo akazi.

Abitabira Made in Rwanda Expo 2019 bahishiwe byinshi na Entreprise Nyirangarama
Aho Entreprise Urwibutso irimo kumurikira
Ibucuruzwa bitandukanye bya Entreprise Urwibutso biri muri Expo ya Made in Rwanda
Bya birayi byiza byahogoje benshi ubu biri muri Made in Rwanda Expo
Inyama nziza z'ubwoko bwose urazisanga kuri Nyirangarama muri Made in Rwanda Expo i Gikondo

Amafoto: Gift Munyarugerero


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza