Covid-19: ’Addressya’ uburyo bworoshye bwo kuyobora abajyanye ibicuruzwa mu ngo ntibayobe

Yanditswe na IGIHE
Kuya 23 Mata 2020 saa 02:51
Yasuwe :
0 0

Ikigo cy’Ikoranabuhanga ryo kuranga aho umuntu aherereye ‘Addressya’ kirakangurira abantu n’ibigo gukoresha ikoranabuhanga ryacyo, ngo ribafashe kunoza Serivisi, muri iki gihe kugeza ibicuruzwa ku bantu mu ngo byiyongereye kubera Coronavirus.

Covid-19 yatumye kugura ibintu bitandukanye hakoreshejwe imbuga z’ubucuruzi kuri internet byiyongera. Ibigo byinshi bigira ikibazo cyo kumenya inzira igera ku bakiliya babo ku buryo bworoshye, rimwe na rimwe bashobora no kuyoba bigatinza serivisi batanga.

Ikigo cy’Abanya- Suède cyitwa ‘Addressya’ gifite ikoranabuhanga ryo kuranga aho umuntu aherereye hifashishijwe ikoranabuhanga rya telefone, cyazanye uburyo bworoherereza ujyanye ibicuruzwa ku mukiliya.

Ushaka kurikoresha abona porogaramu ya Addressya ku buntu anyuze kuri Google Play. Umaze kuyishyira muri telefoni ye afungura konti agashyiraho amakuru yose yerekana icyerekezo cy’aho aherereye cyangwa aho ubucuruzi bwe buherereye.

Nyuma yo kwiyandikisha umucuruzi cyangwa umuntu ku giti cye ashobora gusangiza ayo makuru n’abamuzanira ibicuruzwa, imbuga za internet zikora ubucuruzi ndetse n’abashoferi akeneye ko bamugeraho batayobye.

Muri ibi bihe bya Coronavirus, Addressya yatangaje ko yongeye uburyo bwo kugaragaza ahantu hatandukanye mu rwego rwo kurushaho gutuma ibigo n’imiryango bigaragara ku Isi hakoreshejwe porogaramu yabo.

Uhagarariye Addressya mu Rwanda, Sadiki Businge, yasabye abantu gushyiraho amafoto n’andi makuru ya ngombwa igihe biyandikisha kandi bakajya bayahindura, igihe bahinduye aho bakorera.

Businge avuga ko Addressya ifasha kugira ngo umuntu amenye aho ajyanye ibyo umukiliya akeneye kandi bimurinde kuyoba.

Ati “Imbuga za Internet zikora ubucuruzi no gushyira abantu ibyo baguze mu ngo bikomeje kwiyongera. Addressya ibafasha gutegura no kugeza ibyo bicuruzwa ku bakiliya.”

Umuyobozi wa Addressya, Karoline Beronius yavuze ko iryo koranabuhanga rirushaho gufasha abashoferi cyane muri iki gihe cya coronavirus.

Ati “Abashoferi ni intwari mu kugeza ibiribwa n’ibindi bicuruzwa bya ngombwa ku bantu muri iki gihe badashobora gusohoka mu ngo zabo.”

Konti y’uwiyandikishije iba igaragaza ahantu ha nyaho aherereye. Uwafunguye Konti agena uwo yoherereza amakuru y’aho aherereye n’igihe uwo muntu ashobora kumara ahabona. Nta ruhushya rw’uwiyandikishije ntabwo undi muntu ashobora kuyabona.

Addressya yatangiye gukorera mu Rwanda mu 2019. Abanyarwanda 100 000 bamaze kwiyandikisha.

Addressya ifasha umuntu kumenya aho undi akorera cyangwa aherereye
Nta muntu ushobora kubona amakuru y'ufite Konti kuri Addressya atabimuhereye uburenganzira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .