Cogebanque iri kwizihiza icyumweru cyahariwe abakiliya mu isura nshya

Yanditswe na Mukahirwa Diane
Kuya 7 Ukwakira 2020 saa 12:24
Yasuwe :
0 0

Icyumweru cyahariwe abakiliya kirimo kwizihizwa mu buryo budasanzwe bitewe n’icyorezo cya COVID-19 cyugarije Isi, cyanahungabanyije ubukungu bw’abayituye mu mfuruka zose z’ubuzima.

Ubusanzwe muri iki gihe, ibigo bitandukanye byateguraga ibirori byo kwakira abakiliya no gusabana nabo, bakabashimira imikoranire myiza n’uruhare bagira mu iterambere ryabo bombi. Haganirwaga ho kandi ku buryo bwo gutanga icyizere cyo kurushamo kunoza serivisi ihabwa abakiliya.

Ibi ariko siko bimeze kuri ubu, kuko kuva COVID-19 igaragaye ku butaka bw’u Rwanda muri Werurwe 2020, ubuzima bwarahindutse n’ubucuruzi burahungabana kuko hari ibikorwa byahagaritswe mu kwirinda ikwirakwira ry’iki cyorezo.

Mu gukomeza kwifatanya n’abakiliya bayo, Cogebanque yahinduye umuvuno w’uburyo yegerana n’abakiliya bayo mu cyumweru cyabahariwe.

Umuyobozi ushinzwe Imikoranire ya banki n’Abakiliya muri Cogebanque, Mukabanana Théonestine, yabwiye IGIHE ko mu byo bateganya gukora muri iki gihe bazegera abakiliya babo mu kureba ingaruka COVID-19 yabagizeho n’uko babafasha.

Yagize ati “Turashaka kwegera abakiliya bacu kugira ngo twumve ibibazo bafite muri iki gihe cya COVID-19, kuko ingaruka zayo ntawe zasize. Abakiliya bacu nk’abo mu mahoteli, amashuri, abatwara abantu n’ibintu, insengero ndetse n’abandi bagiye bahagarikirwa ibikorwa bibyara inyungu, bagezweho ingaruka z’ubukungu bwagabanutse ku kigero kitari gito”

“Turimo kwegera abakiliya bacu cyane abafite ibikorwa bitarimo gukora ubu ngo turebe ibibazo by’ingutu bahuye nabyo, kugirango turusheho gufatanya kubikemura ndetse no kubyitwaramo neza ku buryo twese ntawe uzagira igihombo.”

Igikorwa cyo kwegera abakiliya kizakorwa ahanini hifashishijwe ikoranabuhanga mu rwego rwo kwirinda COVID-19 ndetse igihe bibaye ngombwa ko hari abo dusanga ku mirimo yabo.

Mukabanana asaba abaturarwanda kwitabira gukoresha ikoranabuhanga kuko aribwo buryo bwihuse kandi bwizewe babonamo serivisi za banki kandi banirinze COVID-19.

Yakomeje ati “Abakiliya bacu twabashyiriyeho uburyo bwinshi bwo gukoresha ikoranabuhanga mu kubona serivisi za banki bakoreshe telefoni, za mudasobwa, amakarita n’ibindi, kuko byagaragaye ko gukora ku mafaranga bishobora gukwirakwiza COVID-19.”

-  Uburyo bw’ikoranabuhanga Cogebanque yimakaje

Cogebanque yashyize imbaraga mu kubaka ikoranabuhanga rihamye rituma abayigana bagerwaho na serivisi zitandukanye biboroheye.

Iyi banki itanga serivisi z’ikoranabuhanga binyuze muri Internet Banking, Mobile Banking n’amakarita ya MasterCards (Debit, Credit na Prepaid) na Smart cash afasha kubikuza ku byuma bya ATM bitandukanye.

Muri ubu buryo umukiliya agera kuri konti ye akoresheje murandasi, gukoresha application ya “Coge mBank” ndetse abadafite telefoni zigezweho bakanda *505#, bagakurikiza amabwiriza.

Mu gutegurira abakiliya guhangana n’ibihe by’amage, Cogebanque yongereye ubukangurambaga bushishikariza abakiliya kwizigama kuko abo COVID-19 yasanze batarizigamye bahuye n’ibibazo.

Ati “Ubu turi gukangurira abakiliya bacu kurushaho kwizigamira tubicishije mu makonti dufite nka Teganya, Nteganyiriza minuze, Iyubakire na Shobora zituma bateganyiriza ahazaza habo.

Abagana Cogebanque bishimira imikoranire nayo kuko iborohereza kubona serivisi za banki zirimo n’inguzanyo byihuse.

Ndayizeye Béatrice ukora ubucuruzi mu Mujyi wa Kigali ashima serivisi ahabwa zatumye ibikorwa bye bitera imbere.

Ati “Mbere nakoranaga n’indi banki ariko nza kugira abantu banshishikariza gukorana na Cogebanque; yampaye inguzanyo ya miliyoni nta ngwate, ndayishyura. Cogebanque kuri njye ni umubyeyi kuko hashize imyaka icyenda dukorana kandi yaramfashije kuzamura ubucuruzi bwanjye.’’

Musabyimana Albert avuga ko iyi banki yayigannye kuko yumva vuba ibyifuzo by’abakiliya.

Ati “Mbere sinakoranaga na Cogebanque nyuma nza kubasanga mbereka umushinga nari mfite barawumfasha ugenda neza, kandi na nyuma yawo twakomeje gukorana kuko batanga serivisi nziza nishimira.”

Muri iyi minsi yo kwegerana n’abakiliya, Cogebanque izanakomeza gukangurira abakiliya gukomeza kwirinda COVID-19.

Mukabanana akomeza ati “Turakangurira abakiliya bacu gukomeza kwirinda COVID-19 kuko icya mbere ni ubuzima, turabasaba gukomeza kubahiriza amabwiriza yashyizweho n’inzego z’ubuzima.”

Cogebanque ni Banki Nyarwanda imaze imyaka isaga 20 itanga serivisi z’imari, ifite amashami 28 n’ibyuma bya ATM 36 bishobora kubikurizwaho, aba-agents barenga 600 ni bo bayifasha gutanga serivisi zitandukanye zirimo izo kubitsa no kubikuza.

Umuyobozi ushinzwe Imikoranire ya banki n’Abakiliya muri Cogebanque, Mukabanana Théonestine, yavuze ko muri iki cyumweru bazegera abakiliya babo mu kureba ingaruka COVID-19 yabagizeho n’uko babafasha/ Ifoto ya Igirubuntu Darcy
Cogebanque ni Banki Nyarwanda imaze imyaka isaga 20 itanga serivisi z’imari

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .