Bugesera: MTN yatangije ukwezi kwahariwe gusobanura ibyiza bya ‘MoMo’

Yanditswe na Mukaneza M.Ange
Kuya 8 Ugushyingo 2018 saa 05:26
Yasuwe :
0 0

Sosiyete y’itumanaho ya MTN Rwanda yatangije ukwezi kwahariwe gusobanura inyungu ziri mu guhererekanya amafaranga no kwishyura hakoresheje telefoni zigendanwa, uburyo buzwi nka ‘Mobile Money’.

Iki gikorwa ngarukamwaka kibaye ku nshuro ya gatatu cyatangijwe ku itariki 7 Ugushyingo, ku isoko rya Nyamata mu Karere ka Bugesera, aho gifite insanganyamatsiko igira iti “ Tandukana no kugendana amafaranga”.

Muri iki gikorwa kizamara ukwezi koze, MTN yateguye ibikorwa bitandukaye bigamije kurushaho gutuma Abanyarwanda basobanukirwa byimbitse ibirebana na Mobile Money.

Umuyobozi w’Ishami ry’Ubucuruzi muri MTN Rwanda, Chantal Kagame, yavuze ko Mobile Money ihagaze neza mu birebana na serivisi z’imari, kandi bashoye mu ikoranabuhanga kugira ngo guhererekanya amafaranga birusheho korohera buri wese.

Ati “ Hamwe n’abayikoresha bagera kuri miliyoni ebyiri buri kwezi, abaduhagarariye ibihumbi 27, abacuruzi dukorana ibihumbi 15 bari hirya no hino mu gihugu ndetse na banki 15 dufatanyije, MTN ihagaze neza mu Rwanda mu birebana na gahunda yo guhererekanya amafaranga hakoreshejwe ikoranabuhanga”

Kagame kandi yavuze ko binyuze muri gahunda yo kwizihiza imyaka 20 MTN imaze ikorera mu Rwanda, bateganya guhemba abakoresheje Mobile Money kuko iyi serivisi yashyirwaho.

Yagize ati “ Ntabwo tuzishimana n’abakiliya bacu gusa ahubwo tuzakoresha uyu mwanya mu kwakira ibitekerezo byabo kuri serivisi zacu, dusubize ibyifuzo byabo ndetse turusheho kubasobanurira imikorere yayo kugira ngo barusheho kunogerwa kandi tunahembe abakiliya b’ahantu hatandukanye.”

Ibikorwa nk’ibi byo gusobanura ibirebana na Mobile Money byatumye abantu benshi bitabira gukoresha serivisi zijyana nayo zirimo izo kwishyura ibicuruzwa nka MoMoPay na Tap&Pay, gushyira no gukura amafaranga kuri konti yo muri banki (Bank Push & Pull), kwishyura ubwisungane mu kwivuza, imisoro, amande n’ibindi.

MTN itangaza ko Mobile Money yihariye 17% by’amafaranga yose yinjizwa, kandi umubare w’abayikoresha wiyongereye ukagera ku bantu miliyoni 1.9 bahererekanya amafaranga agera kuri miliyari 150Frw buri kwezi.

MTN Rwanda yatangije ukwezi kwahariwe kurushuho kumenyekanisha MoMo

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza