00:00:00 IGIHE NETWORK KN KINYARWANDA EN ENGLISH FR FRANCAIS

Bralirwa yungutse miliyari 17,5 Frw, ibinyobwa icuruza byiyongeraho 9,6% mu 2021

Yanditswe na Philbert Girinema
Kuya 1 April 2022 saa 03:09
Yasuwe :

Uruganda Nyarwanda rwenga ibinyobwa bisembuye n’ibidasembuye, Bralirwa, rwatangaje inyungu ya miliyari 17,5 Frw mu 2021 nyuma yo kwishyura imisoro, bingana n’izamuka rya 94.6% ugereranyije na miliyari 9.0 Frw rwungutse mu 2020.

Imibare igaragaza uko ubukungu bwa Bralirwa bwari buhagaze mu 2021 yerekana ko ingano y’ibinyobwa byacurujwe yazamutse ku kigero cya 9,6% ugereranyije na 7,5% ko mu 2020.

Iri zamuka rishingiye ahanini ku kuba ubukungu muri rusange buri gufunguka kubera icyorezo cya Covid-19 kiri kugenza make. Ibinyobwa bidasembuye byarazamutse nabyo kuko ingano y’ibyacurujwe yiyongereye kuri 17,7%

Ibinyobwa Bralirwa yacuruje mu 2021 bingana na 2.076.000 hl, mu gihe mu 2020 yari 1.894.000 hl.

Amafaranga uruganda rwijije udakuyemo imisoro n’ibindi rwishyura ni miliyari 123.596 Frw, mu gihe mu 2020 yari miliyari 107.111 Frw. iIbyo bivuze ko habayeho izamuka ry’urwunguko rya 15,4% mbere yo kwishyura imisoro.

Inyungu ukuyemo imisoro ni miliyari 17.525 Frw ugereranyije na miliyari 9.005 Frw yari yabonetse mu 2020. Bigaragaza ko urwunguko ruri ku kigero cya 94,6% mu 2021.

Bralirwa isobanura ko iyo nyungu yazamutse kubera ko n’ingano y’ibicuruzwa yiyongereye. Yaba inzoga n’ibinyobwa bidasembuye bicuruzwa n’uru ruganda byarazamutse.

Mu 2022, Bralirwa ifite intumbero zo guhaza isoko ry’u Rwanda mu bucuruzi bwayo ikanarengaho ikanareba n’ahandi muri Afurika. Ibyo bizajyana kandi no kugabanya amadeni isanganywe yagabanyutseho miliyari 21,3 Frw.

Abanyamigabane ba Bralirwa nabo mu 2021 byitezwe ko bazahabwa amafaranga 17,03 Frw ku mugabane ugereranyije na 8,75 Frw yari yatanzwe mu 2020.

Uyu mwanzuro uzagezwa ku Nama y’Inteko Rusange y’Abanyamigabane iteganyijwe ku wa 11 Gicurasi 2022.

Mu gihe ayo mafaranga azaba yemejwe, azashyikirizwa abanyamigabane ba Bralirwa ku wa 11 Kamena 2022.

Kuva mu 1957, Bralirwa Plc yafashije Abanyarwanda kurwanya icyaka binyuze mu binyobwa nka Primus byageze ku isoko mu 1959.

Ubu abakunzi b’agahiye bafite amahitamo arimo Mützig, Amstel, Turbo King, Legend na Heineken, byose byengerwa ku ruganda ruri mu Karere ka Rubavu.

Ku bufatanye n’uruganda rwa Coca-Cola, Bralirwa Plc icuruza ibindi binyobwa birimo Fanta Orange, Fanta Cytron, Fanta Fiesta, Sprite, Krest, Tonic, Stoney ndetse na Vital’O ya Bralirwa Plc nk’umwimerere.

Uruganda rwa Bralirwa rukora ibinyobwa bidasembuye n’ibisembuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .