AIF yahawe igihembo kubera uruhare rwayo mu igerwaho rya SDGs

Yanditswe na IGIHE
Kuya 5 Nzeri 2018 saa 06:26
Yasuwe :
0 0

Uruganda Africa Improved Foods, AIF rukorera mu Rwanda ifu izwi nka ‘Nootri’ rwahawe igihembo kubera umusanzu rutanga mu gutuma Intego z’Iterambere Rirambye, SDGs zigerwaho.

Iki gihembo cyiswe SDG Award, AIF yagihawe ku wa 4 Nzeri 2018 n’Inama yiga ku bucuruzi burambye mu Busuwisi (Swiss Green Economy Symposium, SGES) ifatanyije n’Ikigo cy’Icyitegererezo cy’Ibiro bishinzwe ubumenyi bw’ikirere (Swiss Federal Office for Spatial Development ARE).

Igihembo cyatanzwe uyu mwaka cyari gishingiye ku ntego ya 12 muri 17 zigize SGDs, ariyo “Guharanira ko abatuye Isi bashaka ibibatunga batabangamiye ibikorwa bisanzwe biriho n’urusobe rw’ibinyabuzima muri rusange”.

AIF yegukanye iki gihembo nyuma yo kugaragaza uburyo iyi ntego izagerwaho binyuze mu bikorwa bihuriweho na guverinoma y’u Rwanda, banki zitandukanye ndetse n’Ikigega cya Banki y’Isi cyita ku rwego rw’abikorera, IFC.

AIF igira uruhare mu kurwanya imirire mibi ibinyujije mu gukora ifu yuzuye intungamubiri irimo Nootri Mama igenewe ababyeyi bonsa, Nootri Toto ihabwa abana na Nootri Family ishobora kunyobwa na buri wese.

Inafatanya na guverinoma kandi kugeza iyi fu yuzuye intungamubiri ku babyeyi n’abana baturuka mu miryango itishoboye.

Ibigori na soya bikorwamo iyi fu kandi AIF iba yabiguze n’abahinzi b’Abanyarwanda ku giciro kibanogeye kugira ngo nabo babashe kwiteza imbere.

Umuyobozi Mukuru wa SGES, Dr Anne le Duc, yavuze ko batangajwe cyane n’uburyo AIF igira uruhare mu guteza imbere imibereho myiza y’abaturage, itanasize inyuma inyungu z’abafatanyabikorwa bayo.

Umuyobozi mukuru wa AIF, Amar Ali yavuze ko hamwe n’uburyo bakoresha, bishoboka ko bagira impinduka nziza bageza aho bakorera kandi mu buryo burambye.

Iki gihembo AIF yahawe cyari giherekejwe n’amafaranga asaga miliyoni 3.6 y’u Rwanda, Ali akaba yavuze ko bazayahamo impano ikigo kirera abana b’impfubyi bagera ku 2000 i Kigali.

Uruganda AIF rwashinzwe ku bufatanye bwa Leta y’u Rwanda n’Urugaga Mpuzamahanga rw’Ibigo by’imari birimo Icy’Abaholandi cyita ku Buzima (Royal DSM), Banki y’Iterambere y’Abaholandi (FMO), Ikigega Nterankunga cy’Abongereza (DFID) n’Ishami rya Banki y’Isi ryita ku Ishoramari, IFC.

AIF yafunguye imiryango ku wa 31 Gicurasi 2017, ikora toni ibihumbi 45 by’ifu ku mwaka. Uru ruganda rukoresha abakozi 300, mu gihe abahinzi rugurira umusaruro bo bagera ku bihumbi 24.

Intego yarwo ni ukugira uruhare mu kugabanya umubare w’abana bagwingiye bakava kuri 38% bakagera kuri 32% mu 2020.

Iki gihembo cyiswe SDG Award, AIF yagihawe ku wa 4 Nzeri 2018
AIF ikora ubwoko butandukanye bw'Ifu yuzuye intungamubiri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza