Abikorera bo mu Majyaruguru basabwe gushyira imbere ubuziranenge bw’ibyo bakora kugira ngo bigere kure

Yanditswe na N.Kubwimana Janvière
Kuya 20 Ugushyingo 2019 saa 08:36
Yasuwe :
0 0

Abagize urugaga rw’ abikorera mu Ntara y’Amajyaruguru bibukijwe ko ubuziranenge n’ubwiza bw’ibyo bakora aribyo bizabahesha ishema ku isoko mpuzamahanga.

Ibi babibwiwe ubwo hatangizwaga ku nshuro ya 11 imurikagurisha ryari ryiganjemo ibikorerwa mu Rwanda birimo ibikomoka ku buhinzi, ubworozi n’umutungo kamere nk’amabuye n’ibindi

Izabayo Pacifique, umwe mu bikorera mu ruganda rutunganya amabuye y’amakoro, ruyakoramo amatafari, amapave n’ibindi CAMOSAG, yavuze ko ubuziranenge bw’ibyo bakora aribwo bwatumye bagera aho bari ubu.

Ati “Dutunganya amatafari, amapave n’ibindi mu mabuye akomoka hano i Musanze y’amakoro, n’ andi bita urugarika tukayakoramo amabuye yifashishwa mu gutaka amazu, ariko kuba dufite ibyangombwa by’ubuziranenge ni kimwe mu byatumye dukundwa ku isoko, nta bwoba dufite bwo kujyana ibyacu ku isoko mpuzamahanga”.

Kayirangwa Charite ukorera mu ishyirahamwe rya Burera na we yagize ati “Mubyo dukora bijyanye n’ubukorikori no guteza imbere umuco w’iwacu tugerageza gushyiramo udushya twinshi, ariko kutagira ibyangombwa by’ubuziranenge bijya biba inzitizi kuko n’iyo ubonye umuterankunga agasanga ntabyo yishakira ababifite. Ntabyo turabona ariko nibyo bituraje ishinga biri hafi kuboneka”

Umuyobozi wungirije w’urugaga rw’abikorera mu Rwanda, Mushimiyimana Eugenie yibukije abikorera ko bagomba kwita ku buziranenge bw’ibyo bakora.

Ati “Hari isoko mpuzamahanga ry’abikorera rigiye gushyirwaho mu gihe cya vuba, kandi natwe nk’abikorera bo mu Rwanda tuzaryitabira. Kugira ngo tuzabe twemye rero ni uko tugomba kwita ku bwiza n’ubuziranenge bw’ibyacu, gukora ni kimwe ariko kandi ubuziranenge bwo bukaba akarusho, kugeza ubu nibyo dukomeje gushyiramo imbaraga n’ubushobozi”

Guverineri w’Intara y’Amajyaruguru Gatabazi Jean Marie Vianney yavuze ko iyo umuntu ashaka guhangana ku isoko mpuzamahanga yita ku ikoranabuhanga n’ubuziranenge bw’ibyo akora, ndetse anabibutsa ko kumurika ibyabo ari n’umwanya mwiza wo kwigira ku bandi bakongera udushya mu byo bakora.

Ati “Ubuziranenge bw’ibyo mukora nibwo buzabahesha umwanya mwiza ku ruhando mpuzamahanga, tuzaborohereza kubona ibyangombwa bisabwa n’ibyo kujya kumurika ibyanyu mu bindi bihugu”

Iri murikagurisha ry’abikorera ku rwego rw’Intara y’Amajyaruguru ribaye ku nshuro ya 11, rikaba ryitabiriwe n’abagera ku 142, barimo abaturutse mu bihugu bya Misiri, u Buhinde, u Bubiligi na Ghana

Guverineri Gatabazi n'umuyobozi wungirije w'urugaga rw'abikorera bagiye basura abaje kumurika ibikorwa byabo
Guverineri Gatabazi afungura ku mugaragaro imurikagurisha ku rwego rw'Intara
Iri murikagurisha ry’abikorera ku rwego rw’Intara y’Amajyaruguru ribaye ku nshuro ya 11, rikaba ryitabiriwe n’abagera ku 142, barimo abaturutse mu bihugu bya Misiri, u Buhinde, u Bubiligi na Ghana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza