Abasenateri bagaragaje impungenge ku nyungu ziri hejuru banki zaka ku nguzanyo

Yanditswe na HABIMANA James
Kuya 2 Mata 2019 saa 09:32
Yasuwe :
0 0

Abasenateri bagaragaje ko batewe impungenge n’inyungu ku guzanyo zitangwa na banki zikomeje kuba hejuru, bigatuma bamwe bishora mu bucuruzi bw’amafaranga butemewe buzwi nka Banki Lambert.

Byagaragajwe kuri uyu wa Kabiri ubwo Komisiyo ya Sena y’Iterambere ry’Ubukungu n’Imari, yagaragazaga bimwe mu byavuye mu isuzuma rya Raporo y’Ibikorwa bya Banki Nkuru y’u Rwanda, BNR, mu mwaka wa 2017/2018.

Visi Perezida wa Sena y’u Rwanda, Harelimana Fatou, yavuze ko bitumvikana uburyo banki zihabwa inguzanyo na Banki Nkuru y’u Rwanda ku nyungu nke, ariko zo zikaba zigakomeje guca abaturage inyungu iri hejuru.

Yagize ati “Ibi byatumye inguzanyo itangwa iba nke bituma abaturage benshi bahitamo kwigira muri Banki Lambert, nko mu Ntara y’Amajyaruguru usanga ubu bucuruzi butemewe bwariyongereye kuko amafaranga bayabona mu buryo bworoshye.”

Yavuze ko ubu bucuruzi butuma ubukungu bw’igihugu buhazaharira.

Mu korohereza abashoramari, BNR yagabanyije inyungu itangiraho amafaranga iva kuri 6% muri Kamena 2017 igera kuri 5.5% mu Ukuboza 2017. Inyungu banki zica abakiriya yo yageze ku mpuzandengo ya 17.15% mu 2017/2018 ivuye kuri 17.25% mu 2016/2017.

Nubwo hagaragajwe ko habayeho kugabanyuka kuri izi nyungu, abasenateri bavuze ko batanyuzwe n’uburyo banki zikomeje gushyiraho inyungu uko zishakiye.

Umuyobozi wa Komisiyo ya Sena y’Iterambere ry’Ubukungu n’Imari, Senateri Muhongayire Jacqueline, yavuze ko impamvu banki zivuga ko zaka inguzanyo iri hejuru kubera umuco wo kubitsa mu banyarwanda ukiri hasi, gusa yemeza ko ikibazo cya Banki Lambert kigomba kwigwaho mu buryo bwihuse.

Yagize ati “Impamvu abaturage bajya muri ubu bucuruzi butemewe ni ikintu gikenewe guhabwa umwanya ukomeye kugira ngo hamenyekane impamvu ibi biba.”

Inteko Rusange ya Sena yafashwe umwanzuro ko ku bufatanye na Biro yayo, izategura inama yo kungurana ibitekerezo n’inzego zitandukanye bireba kugirango Sena izabone amakuru ahagije ku bibazo byagaragajwe bikibangamiye abaturage.

Abasenateri basabye ko hategurwa inama nyunguranabitekerezo yashakirwamo ibisubizo ku nyungu zihanitse ku nguzanyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza