Abanyempano 30 bakomeje mu irushanwa ’Spark your Talent’ rya TECNO bahawe impanuro

Yanditswe na Uwiduhaye Theos
Kuya 24 Gicurasi 2019 saa 08:08
Yasuwe :
0 0

Umuhanzikazi Mugemana Yvonne wamamaye nka Queen Cha, yagiriye inama abanyempano bari mu irushanwa ryatangijwe na Sosiyete ikora ikanacuruza telefone ya TECNO, ifatanyije na The Mane Music Label.

Muri iyi Gicurasi, sosiyete icuruza telefone zigezweho ya TECNO yatangije irushanwa ryo gufasha abanyempano ‘Spark your Talent’ ku bufatanye n’inzu ifasha abahanzi ya The Mane ibarizwamo Queen Cha, Safi Madiba, Marina na Jay Polly.

‘Spark your Talent’ rigamije guteza imbere abanyempano bo mu byiciro birimo ubuhanzi, ubugeni, siporo n’ibindi.

Ryateguwe kandi mu rwego rwo kumenyekanisha telefoni nshya TECNO iheruka gushyira ku isoko ya TECNO Spark 3 na Spark 3 Pro, zikoranye ikoranabuhanga rihambaye mu gufata amashusho.

Kwinjira mu irushanwa byasabaga ushaka guhatana gufata amashusho y’amasegonda 30, akayashyira ku mbuga nkoranyambaga za TECNO na The Mane yifashishije Hashtag #SparkYourTalent, #TECNO Spark #TheMane.

Abatsinze icyiciro cya mbere cyaryo bagera kuri 30, basobanuriwe uko icyiciro gikurikiyeho kigiye kugenda.

Ni mu kiganiro cyabereye ku cyicaro cya TECNO mu Mujyi wa Kigali, cyahuje aba banyempano, abanyamakuru, TECNO ndetse n’abahagarariye The Mane.

Rwema Dennis uhagarariye ibikorwa bya The Mane, yabatangarije ko bagiye gutangira kugenda bafata amashusho ya buri wese bakurikije impano ye ubundi akongera agashyirwa ku mbuga nkoranyambaga (Instagram na Facebook) ubundi uwo amashusho ye azarebwa cyane, agakundwa (Likes) cyane ndetse akagira Comments, nyinshi akaba ariwe uzahabwa amahirwe yo kujya mu kindi cyiciro.

Yakomeje ababwira ko bakwiriye kubyaza aya mahirwe umusaruro kuko ashobora gutuma hari amarembo afunguka kuri bo.

Ati “Aya mahirwe ntimuzayapfushe ubusa, The Mane irakurikirwa cyane ifite abahanzi bakomeye ku buryo uzagira amahirwe yo gukorana natwe azabyungukiramo mu buryo bukomeye.”

Yakomeje avuga ko bagomba kwitwararika kuko uzagaragaza imyitwarire idahwitse azahita asezererwa mu buryo bwihuse, kuko bakeneye kuzakorana n’umuntu koko ufite gahunda kandi ufite icyerekezo cy’aho agomba kugera.

Queen Cha yaje abahanura ababwira ko ubu urugamba ari bwo rutangiye kandi bagomba gushyira umutima wabo ku irushanwa kurusha uko babikoze mu cyiciro cyabanje.

Ati “Wenda hari abari bajemo mbere bikinira ariko ubu ndagira ngo mbabwire ko mugomba gukorana umwete, iri rushanwa rirakomeye kandi rishobora gutuma uwatsinze agera ku rundi rwego.”

Edwin Vita ushinzwe imenyekanishabikorwa muri TECNO, yavuze ko iri rushanwa rigiye kujya ribaho buri mwaka mu rwego rwo gukomeza kuzamura impano nshya.

Umunyempano uzatsinda, azasinya amasezerano yo gukorana na The Mane mu gihe cy’umwaka ndetse anahabwe igihembo cya miliyoni y’amafaranga y’u Rwanda.

Aba banyempano 30 bagiye gufatwa amashusho na The Mane ba nyirayo bongere bayashyire ku mbuga nkoranyambaga bahatane, hatorwemo 10 bazagera ku cyiciro cya nyuma.

Abanyempano bari muri iri rushanwa biganjemo abaririmbyi ariko harimo n’izindi mpano nko kubyina, gukina umupira w’amaguru, gusetsa n’izindi.

Buri wese bitewe n’icyiciro ahatanyemo azafatwa amashusho atarengeje umunota umwe ariko atari munsi y’amasegonda 45’. Ibi bizakorwa hagati yo kuwa 3 Kamena na 28 Kamena 2019.

Aba 10 bazazengurukana na TECNO muri za kaminuza zitandukanye barushanwa ari naho hazatorerwa uzaba yarahize abandi uzahembwa amafaranga y’u Rwanda miliyoni imwe tariki 29 Kamena 2019.

TECNO Spark 3 na Spark 3 Pro zamuritswe ku isoko ry’u Rwanda ku wa 18 Mata 2019. TECNO Spark 3 Pro ifite camera y’imbere ya megapixels umunani, iriho na flash; ububiko bw’imbere bwa gigabytes 32; RAM ya GB2 na camera y’inyuma ifite megapixels 13.

TECNO Spark 3 yo camera y’imbere ifite ubushobozi bwa megapixels umunani n’iy’inyuma ya megapixels 13, ububiko bwa GB 16 na RAM ya GB2. Zombi zitindana umuriro, zikoresha android ya 9.0 izibashisha kwihuta kandi zigakorana n’ikoranabuhanga rya GPS, internet yihuta n’ibindi.

Telefoni za TECNO Spark 3 zifite camera ebyiri z’inyuma zirimo ifite megapixels 13 n’iy’ebyiri ziyifasha gufata amafoto atandukanye no mu bihe by’ijoro.

TECNO Spark 3 Pro igura 105 000 Frw mu gihe Spark 3 igura 98 000 Frw mu maduka yose mu gihugu, aho uyiguze ugahabwa amezi 13 yagira ikibazo bakagufasha.

Abanyempano 30 bagiye guhatana bagiriwe inama yo gukoresha imbaraga zabo zose mu cyiciro kigiye gukurikiraho
Edwin Vita ushinzwe kwamamaza ibikorwa muri TECNO, Rwema Dennis na Queen Cha bari muri iki kiganiro

Amafoto: Moses Nyambo


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza