Umuhanda Huye-Kibeho-Munini-Ngoma Perezida Kagame yemereye abaturage, watangiye gushyirwamo kaburimbo

Yanditswe na Prudence Kwizera
Kuya 29 Werurwe 2019 saa 12:03
Yasuwe :
0 0

Umuhanda Huye-Kibeho-Munini-Ngoma ureshya na kilometero 66 Perezida Kagame Paul, yemereye abaturage watangiye gushyirwamo kaburimbo kuri uyu wa Gatanu tariki ya 29 Werurwe 2019.

Gutangiza kuyishyiramo byitabiriwe n’Umunyamabanga wa Leta muri Minisiteri y’Ibikorwa Remezo, ushinzwe gutwara Abantu n’Ibintu, Jean de Dieu Uwihanganye, ahitwa mu Gatobwe, aho Akarere ka Huye gahurira n’aka Nyaruguru.

Minisitiri Uwihanganye yavuze ko uzubakwa mu gihe cy’amezi 30 ukazatwara hafi Miliyari 70Frw.

Yagize ati “Ni kilometero 66 harimo kandi imihanda yo mu Mujyi wa Kibeho ingana na kilometero zirindwi. Wose uzatwara amafaranga y’u Rwanda agera kuri Miliyari hafi 70.”

Uwo muhanda ni kimwe mu bikorwa Perezida Kagame Paul yemereye abaturage b’Akarere ka Nyaruguru mu mwaka wa 2013.

Uri kubakwa na Leta y’u Rwanda ku bufatanye na Repubulika y’u Bushinwa, yatanze amafaranga mu buryo bw’inguzanyo.

Nk’uko byatangajwe, niwuzura uzaba ufite ubugari bwa metero zirindwi kandi ufite n’aho abanyamaguru banyura ku ruhande, uriho n’amatara awuboneshereza wose.

Abatuye mu nkengero z’ahatangirijwe ibikorwa byo kubaka uwo muhanda bavuga ko bari bawutegerezanyije amatsiko kandi bawitezeho iterambere rikomeye.

Twizerimana utwara moto ati “Kuva Huye ujya Kibeho twahagendaga isaha yose irenga ariko ubu tuzajya tuhagenda iminota nka 20 kandi ugenda neza.”

Abaturage biganjemo urubyiruko bari bitabiriye igikorwa cyo gutangiza gushyira kaburimbo muri uwo muhanda bavuze ko bizeye ko bazahabona akazi kandi biteguye.

Mu Karere ka Nyaruguru hari kubakwa kandi indi mihanda y’imigenderano ifite uburebure bwa kilometero 120.

I Kibeho mu Karere ka Nyaruguru hahora urujya n’uruza rw’abantu bakoresha uwo muhanda baturutse mu bice bitandukanye by’Isi, by’umwihariko ku wa 15 Kanama ubwo haba hizihizwa Ijyanwa mu Ijuru rya Bikira Mariya.

Hizihirizwa kandi amabonekerwa ya Bikira Mariya yabereye ku musozi wa Nyarushishi kuba mu 1981.

Imwe mu mbogamizi ikomeye abahagana bakundaga guhura nayo ni umuhanda mubi urimo ibinogo n’ivumbi, ariko ubwo watangiye gushyirwamo kaburimbo ni igisubizo kirambye.

Umuyobozi w’Akarere ka Nyaruguru, Habitegeko François, yavuze ko uwo muhanda bawitezeho impinduka nziza mu mibereho myiza y’abaturage n’iterambere ry’akarere.

Ati “Uyu muhanda ugiye kuba ikivumbikisho gikomeye cy’ishoramari mu Karere kacu ka Nyaruguru.”

Kuba iyo kaburimbo itangiye kubakwa ni kimwe mu bishobora gutuma ba rwiyemezamirimo bashyira ingufu mu gushora imari i Kibeho no mu bindi bice by’Akarere ka Nyaruguru, bahubaka amacumbi n’amahoteli.

Iyo kaburimbo kandi ni igikorwa remezo gikomeye kizoroshya ubuhahirane hagati ya Nyaruguru n’utundi turere bihana imbibi bigatuma iterambere ryayo ryihuta.

Minisitiri Uwihanganye n'abandi bayobozi batangiza iyubakwa ry'uyu muhanda
Ibikorwa byo gukora uyu muhanda birarimbanyije

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza