00:00:00 IGIHE NETWORK KN KINYARWANDA EN ENGLISH FR FRANCAIS

Uko Afri-Farmers Market yafashije abahinzi 5000 kongera umusaruro no kuwubonera amasoko

Yanditswe na Ntabareshya Jean de Dieu
Kuya 9 June 2022 saa 10:52
Yasuwe :

Abahinzi 5000 bo mu bice bitandukanye by’igihugu bakorana n’Ikigo cy’Ubucuruzi gihuza abahinzi n’abaguzi hifashishijwe Ikoranabuhanga, Afri-Farmers Market, barishimira umusaruro bamaze gukura muri iyi mikoranire harimo kubarinda igihombo baterwaga no kubura amasoko y’ibyo bejeje.

Ni kenshi abahinzi usanga bavuga ko bafite imbogamizi zirimo kubura amasoko y’umusaruro wabo bigatuma wangirika. Urugero ruzwi cyane ni abahinzi b’ibirayi bo mu Karere ka Rubavu bahuye n’ikibazo cyo kubura isoko umusaruro wangirikira mu bubiko.

Hari kandi abahinzi bo mu Bugarama mu Karere ka Rusizi bahuye n’ikibazo nk’icyo umuceri wangirikira mu bubiko kimwe na Tungurusumu zo mu Majyaruguru.

Nyuma yo kwitegereza ingorane n’imvune abahinzi bahura na zo ngo bagere ku musaruro bifuza ariko rimwe na rimwe bakabura amasoko, Norman Mugisha wize Ubuhinzi muri Costa Rica, yatangije Ikigo gihuza abahinzi n’abaguzi, Afri-Farmers Market, kugira ngo babone amasoko y’umusaruro wabo biboroheye.

Binyuze muri Afri-Farmers Market umuhinzi ashobora kubona nibura inyungu ku musaruro ingana na 85% kuko aba yahujwe n’umuguzi hatabayeho kwangirika k’umusaruro. Ni mu gihe ubundi usanga umuhinzi asigarana inyungu ya 30%, indi igatwarwa n’umucuruzi.

Iki kigo gikorana n’abahinzi guhera mu guhinga no gutera imbuto kugera mu isarura. Iyi mikoranire igamije kwirinda iyangirika ry’umusaruro w’ibikomoka ku buhinzi by’umwihariko imbuto n’imboga kubera kubura isoko, bikaba byateza igihombo abahinzi.

Koperative Tuzamurane ikorera mu Karere ka Rwamagana mu gishanga giherereye mu Murenge wa Musha ni imwe mu zikorana na Afri-Farmers Market. Kuri ubu ihinga imbuto n’imboga zirimo inyanya, Cocombre, urusenda n’ibindi.

Ni koperative igizwe n’urubyiruko rwishyize hamwe ari 30 kugira ngo rwiteze imbere mu 2018, mu gihe bari bakibona umusaruro wa mbere ntibashoboraga kurenza nibura ibilo 800 ku gihembwe bifite agaciro k’ibihumbi 400 Frw kandi ugasanga nibura 30% wangirikira mu murima, bivuze ko hashoboraga guhomba nibura ibihumbi 120 Frw.

Mu 2019 batangiye gukorana na Afri-Farmers Market, ibaha amahugurwa yo guhinga, inyongeramusaruro, kubahuza n’abaguzi hifashishijwe ikoranabuhanga. Ibi ngo byatumye umusaruro wabo wiyongera bityo biteza imbere.

Kuri ubu ahasarurwaga ibilo 800 hari kuva toni nibura ebyiri zishobora kubinjiriza nibura 1.200.000 Frw kandi kubona isoko ntibibagore ku buryo na 30% yangirikaga yabashije gucungurwa.

Umwe muri aba bahinzi, Iragena Augustin, yabwiye IGIHE ko gukorana na Afri-Farmers Market byabongereye ingano y’umusaruro wabo.

Ati “Tugitangira twasaruraga ibilo bitageze no ku 100 na byo bitujuje ubuziranenge. Ubu iyo dusaruye ibilo bike ni 250. Umuhinzi ukorera muri koperative birumvikana amafaranga dufata ntabwo ajyanwa na koperative, hari uburyo tuyasaranganya. Ikindi ni uko ntava hano ngo njye gushaka imbuto ndya ku isoko ahubwo ku musaruro wacu tugira uwo turya n’uwo tugurisha.”

Murebwayire Françoise na we yasobanuye ko nk’abakorera muri icyo gishanga byabatwaraga igihe kinini kugira ngo bagere ku isoko ndetse rimwe na rimwe bikabatera igihombo kuko bashoboraga kubigezayo bakabura umuguzi.

Ati “Idufasha kutugurira umusaruro hano mu murima. Mbere tutaramenyana na yo twafataga umusaruro tugashyira mu dutebo, tugakora urugendo nk’urw’ibilometero icumi. Ibyo byaratuvunaga cyane. Ubu Afri-Farmers Market iraza ikagura umusaruro tutavunitse ikadusigira amafaranga natwe tukiteza imbere, dukora ibindi tutishe umwanya w’ejo ngo tuzajya mu isoko.”

Uretse umusaruro wangirikiraga mu nzira, hari no gufata umunsi wo kuwujyana ku isoko byashoboraga kubangamira n’ikorwa ry’indi mirimo mu gihe iminsi ibiri mu cyumweru ari yo iba igenewe ibikorwa bya koperative.

Nyuma yo guhindurirwa ubuzima, aba bahinzi babashije kwigurira amatungo magufi kandi banishoboza kubahiriza gahunda za Leta zirimo kwishyurira mituweli ku gihe no kwizigamira muri Ejo Heza.

Gukorana n’abahinzi ngo ni urugendo rutoroshye kuri Norman Mugisha kuko bimusaba kubasanga mu mirima aho bakorera, akabafasha binyuze mu kubaha ubumenyi ndetse n’ibindi bikenerwa mu kongera umusaruro w’ubuhinzi.

Yagize ati “Dufasha abahinzi kugira ngo umusaruro wabo ubone isoko, guhinga bya kijyambere no kubona amafumbire kugira ngo na wa musaruro ubafashe biteze imbere n’igihugu kibone ibiribwa bihagije.”

Yavuze ko yiteguye gufasha abahinzi batandukanye by’umwihariko abahinga imbuto n’imboga kubona isoko ry’umusaruro wabo kuko iyo byangiritse bigira ingaruka ku iterambere ry’umuhinzi n’igihugu muri rusange.

Ati “Iyo byangiritse ni byo bahomba amafaranga ariko natwe nk’igihugu duhomba ibiryo. Mbere y’uko dutangira gukorana na bo wasangaga nibura 30% by’umusaruro wabo warangirikiraga mu murima. Kubera ko tuza tukabigurira hano imodoka igahita ibijyana ku isoko birabafasha cyane.”

Ubusanzwe Afri-Farmers Market ni sosiyete y’ikoranabuhanga ariko yihaye intego zo guteza imbere ubuhinzi ari na yo mpamvu ibikorwa byayo bishingiye ku ikoranabuhanga.

Ifasha abahinzi aho uwifuza kugura umusaruro bitamusaba kuva aho ari ahubwo yifashisha ikoranabuhanga akajya ku rubuga rwayo akagaragaza ibyo yifuza n’ingano yabyo bakabimugezaho aho yaba ari hose. Izo ni na zo nzira umuhinzi ashobora gukoresha mu gihe afite umusaruro akeneye isoko.

Mugisha avuga ko yifuza gushyiraho uburyo bw’ikoranabuhanga rihambaye aho umuguzi azajya ahita avugana n’umuhinzi bidasabye ko anyuza ubutumwa kuri Afri-Farmers Market nk’uko bikorwa uyu munsi.

Mu gihe u Rwanda rukomeje guteza imbere ikoranabuhanga, ubuhinzi nabwo buri kugenda butera imbere mu kongera umusaruro w’ibibukomokaho hifashishijwe ikoranabuhanga ari nayo mpamvu Mugisha yaryifashishije mu kugabanya imvune abahinzi bahuraga nazo.

Mu mpera za 2021, Mugisha yitabiriye irushanwa rya Hangapitch Fest ryanitabiriwe n’urundi rubyiruko rufite imishinga inyuranye itanga icyizere ndetse aza kwegukana umwanya wa gatatu ahembwa ibihumbi 15 by’amadolari.

Mugisha avuga ko kwitabira Hanga Pitch byamuhaye imbaraga zo gukora cyane ndetse yerekana ko ari irushanwa rikwiye kwagurwa kugira ngo rifungurire amarembo urundi rubyiruko.

Kugeza ubu Afri-Farmers Market ikorana n’abahinzi 5000 aho abaguzi babo bari mu byiciro bitandukanye bigizwe n’amahoteli, restaurants, ibigo binini n’ibiciriritse n’abantu ku giti cyabo.

Norman Mugisha ubwo yasobanuraga umushinga we mu irushanwa rya Hangapitch Fest
Mugisha yegukanye ibihumbi 15$ muri Hangapitch Fest

Amafoto: Igirubuntu Darcy

Video: Mucyo Regis na Iraguha Jotham


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .