00:00:00 IGIHE NETWORK KN KINYARWANDA EN ENGLISH FR FRANCAIS

Ubukungu bw’u Rwanda bwiyongereyeho 10,9% mu 2021

Yanditswe na Cyprien Niyomwungeri
Kuya 21 March 2022 saa 06:01
Yasuwe :

Umusaruro mbumbe w’u Rwanda wavuye kuri miliyari 9,607Frw mu 2020 ugera kuri miliyari 10,944Frw mu 2021, aho wiyongeyeho 10,9%, bitewe n’impamvu zitandukanye zirimo koroshya ingamba zo gukumira ikwirakwira ry’icyorezo cya Covid-19, byatumye ibyiciro by’ubukungu byongera gukora.

Imibare yatangajwe n’Ikigo cy’Igihugu cy’Ibarurishamibare (NISR), kuri uyu wa Mbere tariki 21 Werurwe 2022, yerekana ko umwaka ushize ubukungu bw’u Rwanda bwongeye kuzamuka nyuma yo gushegeshwa na Covid-19. Mu gihembwe cya mbere cya 2021 bwiyongereye ku kigero cya 3.5%, mu cya kabiri bwiyongera 20.6%, mu cya gatatu bwiyongera ku 10.1% naho icya kane kuri 10.3%.

Ibi bivuze ko mu 2021 ibyiciro hafi ya byose by’ubukungu byamaze kuzahuka birenga n’uko byari bimeze mbere ya covid-19, uretse ubuhinzi bw’ibyoherezwa mu mahanga, ubucukuzi bw’amabuye y’agaciro hoteli na za restaurant, ubwikorezi ndetse na serivisi zishingiye ku bukerarugendo.

Umuyobozi wa NISR, Murangwa Yusuf, yasobanuye ko izamuka rya 10,9% ry’ubukungu bw’u Rwanda mu 2021 mu gihe bwari bwagabanutseho 3,4% mu 2020, rishingiye ku mpamvu eshatu z’ingenzi.

Ati "Iya mbere ni ukubera ko ubukungu burimo buragaruka. Mbere ya Covid-19 ubukungu bwazamukaga neza hari ubwo bwari bwarageze ku 10% rirenga mu gihe cya covid-19 burahagarara, burahungabana ariko ubu turimo kubona ko umuvuduko wari uhari mbere ya Covid-19, urasa nk’aho wagarutse nubwo hakiri kare".

"Impamvu ya kabiri, Iyo ubukungu bwagabanutse cyane umwaka ukurikira haba hari amahirwe menshi cyane zo kuzamuka cyane. Urugero ni uko umwaka ushize bwari bwagabanutseho 3.4%. Kubera ko tuba tuva hasi cyane, biba byoroshye ko ubukungu buzamuka cyane".

Indi mpamvu ya gatatu ni uko hari inzego zisa nk’aho zirimo kwihuta cyane mu bukungu bitewe na Covid-19. Zirimo izijyanye n’inganda zikora amasabune, imiti yica udukoko n’ibindi bijyanye nabyo, hakaba kandi n’izikora ibintu bimwe na bimwe bitakorwaga mbere byavanwaga mu mahanga.

Nyuma y’uko inzego zitandukanye z’ubukungu zihungabanyijwe na Covid-19, Leta y’u Rwanda yashyizeho ikigega nzahurabukungu cyatangiranye miliyari 100Frw ubu kikaba cyarongerewe kigezwe kuri Miliyari 350Frw.

Minisitiri w’Imari n’Igenamigambi, Dr Uzziel Ndagijimana, yasobanuye ko iki kigega cyagize uruhare mu izamuka ry’ubukungu mu 2021 yaba muri serivisi, mu nganda, mu rwego rw’imari kandi bizakomeza no mu yindi myaka iri imbere.

Ati "Biragaragara ko cyagize uruhare muri uyu mwaka dusoje ariko noneho cyaraniyongereye ku buryo muri uyu mwaka turimo wa 2022 n’uzakurikiraho turabona ko ikigega kizakomeza gufasha urwego rw’abikorera mu kuzamura umusaruro mu nzego zose".

Mu 2021, serivisi zatanze 48% by’umusaruro mbumbe w’igihugu, ubuhinzi bwatanze 24%, inganda zitanga 20% naho imisoro ku bicuruzwa binyuranye bigira uruhare rwa 8%.

Muri uyu mwaka kandi umusaruro w’ubuhinzi wiyongereyeho 6%, uw’inganda 13%, uwa serivisi wiyongeraho 12%. Umusaruro w’ibihingwa ngandurarugo wiyongereyeho 7%, uw’ibihingwa ngengabukungu ugabanukaho 1%, kuko umusaruro wa kawa wagabanutseho 1% naho uw’icyayi wiyongeraho 7%.

Umusaruro w’inganda zikora ibintu binyuranye wiyongereyeho 11% bitewe ahanini n’izamuka rya 6% ry’umusaruro w’inganda zikora ibyo kunywa, 16% mu nganda zikora imyenda, 23% mu nganda zikora ibinyabutabire na 4% mu nganda zikora ibikoresho by’ibyuma. Imirimo y’ubwubatsi yo yiyongereyeho 15% naho ubucukuzi bw’amabuye y’agaciro na kariyeri bwiyongeraho 27%.

Ubucuruzi buranguza n’ubudandaza bwiyongereyeho 12%, serivisi za hotel na restaurant umusaruro wiyongeraho 20%, imirimo y’ubwikoresi 15%, serivisi z’imari 18%, serivisi z’itumanaho 19%, serivisi z’uburezi ni 59%, naho serivisi zo gusana ibintu binyuranye n’amagarage umusaruro wazo uzamukaho 35%.

Minisitiri Dr Uzziel Ndagijimana yavuze ko ikigega cyo kuzahura ubukungu gikomeje kugira uruhare runini cyane mu iterambere ry'u Rwanda
Umuyobozi Mukuru wa NISR, Yusuf Murangwa, yavuze ko ubukungu bw'u Rwanda bwiyongereyeho 10,9%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .