Ubuhinzi bw’imbuto bwahinduriye ubuzima Munyaneza ku buryo yinjiza asaga miliyoni 2 Frw

Yanditswe na Hakizimana Jean Paul
Kuya 23 Nyakanga 2020 saa 12:45
Yasuwe :
0 0

Ku bantu bafite ingo zabo uzasanga barateye urubuto rumwe cyangwa ebyiri, ugasanga atari kenshi umuntu yiyumvisha ko hari abatunzwe n’ibiti bya avoka n’imyembe bahinze, ku buryo bivamo amafaranga yishyurira abana amashuri yisumbuye na kaminuza.

Munyaneza Anastase ni umugabo w’imyaka 45 atuye mu Kagari ka Gihinga mu Murenge wa Rwinkwavu, mu Karere ka Kayonza. Ahinga imbuto zirimo avoka, imyembe n’amaronji (oranges) ku buso bungana na hegitari enye.

Ni umubahamya w’uburyo mu bana batandatu afite, bose abishyurira ishuri ku mafaranga akura mu buhinzi bw’imbuto. Abo bana barimo babiri biga mu mashuri abanza, batatu biga mu mashuri yisumbuye n’umwe uri kurangiza kaminuza, kandi yishyurirwa na se 100%.

Mu biti by’imbuto afite harimo 1300 by’amaronji, ibiti 420 bya avoka n’ibiti 200 by’imyembe, byose bihinze ku buso bwa hegitari enye. Haniyongeraho imizinga y’inzuki zifasha mu kubangurira ibi biti mu buryo bwihuse, bigahorana imbuto.

Munyaneza avuga ko yatangiye guhinga imbuto by’umwuga mu myaka itanu ishize, ahinga ku buso bwa hegitari ebyiri. Yahingaga amaronji asanzwe na mandarine (mandarin orange), aza kubona ari ubuhinzi bufite isoko, yongeraho izindi hegitari ebyiri.

Ati “Nabigize umwuga rero kuko nabonaga ari ibintu byunguka cyane cyane ko iki gice cya Rwinkwavu haba izuba ryinshi, ariko ibi biti bibasha guhangana n’izuba ku buryo nshobora gusarura mu gihe abandi barumbije, igihe abaturage barumbije nk’ibigori n’ibishyimbo njye mba nsarura.”

"Ubuzima bwanjye rero bwaje guhinduka ubwo nabonaga inkunga ya PRICE, bampaye ingemwe zirenga 1300 z’imbuto, nyuma kandi banafatanyije na NAEB bakomeje kunkurikirana bampa amahugurwa y’uburyo narushaho kongera umusaruro wanjye, ngenda ntera imbere."

Munyaneza avuga ko umwaka ushize nibura amafaranga make yasaruyemo agera kuri miliyoni ebyiri n’ibihumbi 400Frw mu mbuto zirimo avoka, imyembe n’amaronji, ariko muri uyu mwaka yiteze gukuramo menshi kurushaho kuko ibiti bye byari bikiri bito, ubu byungutse andi mashami.

Inama ku bifuza kwinjira muri ubu buhinzi

Munyaneza avuga ko umuntu ushaka kwinjira muri ubu buhinzi hari ibintu akwiriye kumenya mbere, kugira ngo bizamufashe kudahomba.

Ati "Icya mbere ni ukuba ufite ubutaka kuko nicyo kigoye, ikindi kigoyemo ni ukubona ingemwe zo gutera kuko zirahenda, rumwe rugura 500 Frw. Ikindi ni ikijyanye no kuhira kuko izo ngemwe zikiri nto watanzeho amafaranga, bisaba kuba ziri hafi y’amazi kugira ngo zitagupfana, iyo udafite ubushobozi bwo kuhira ziruma ugahita ujya mu gihombo."

Yakomeje avuga ko umuntu akenera kubikora ahibereye akabyigenzurira umunsi ku wundi, kugira ngo ikibazo cyose kigaragaye abe akizi, ariko ngo umuntu abikora mu mezi ya mbere imbuto zikiri nto. Yanavuze ko umuntu akenera imiti myinshi kuko udukoko dukunda kwihisha mu biti by’imbuto.

Munyaneza yagiriye inama urubyiruko yo kureka kwirukira gushakisha akazi, mu gihe iwabo bafite isambu zipfa ubusa.

Yavuze ko bashobora kwinjira mu mwuga w’ubuhinzi bakawukora kinyamwuga, kandi ukabatunga kurusha uko babona umushahara wa buri kwezi.

Ati "Ibi ni ibintu byunguka kandi bimara igihe kirekire, niryo banga ryabyo, iyo zatangiye kwera zimara igihe kirekire zera kandi nta bishoro byinshi washyizemo, ni nkuko wakubaka hoteli ikagira abakiriya benshi, na ziriya mbuto zishobora kumara imyaka 50 zicyera zitarahundurura."

Munyaneza ngo ateganya kongera ubuso ahingaho bukagera kuri hegitari esheshatu, aho arimo gushaka ubutaka buri hafi y’amazi ku buryo rwa rugemwe yateye abasha kurwitaho.

Munyaneza yahinze amaronji menshi
Amaze kuba umuhinzi w'imbuto kandi biramutunze
Yejeje imyembe myiza cyane

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .