00:00:00 IGIHE NETWORK KN KINYARWANDA EN ENGLISH FR FRANCAIS

U Rwanda rwiteze ko umwaka utaha uzasiga rubonye megawati 56 z’amashanyarazi avuye kuri Gaz Methane

Yanditswe na Mukwaya Olivier
Kuya 27 Nzeri 2021 saa 08:55
Yasuwe :
0 0

Minisitiri w’Ibikorwaremezo, Ambasaderi Claver Gatete, yatangaje ko u ruteganya kubona amashanyarazi agera kuri megawati 56 aturutse kuri Gaz Methane yo mu Kiyaga cya Kivu, intambwe izatuma rutangira kuyagurisha mu bihugu bituranyi.

Yabitangaje mu rugendo yagiriye mu Karere ka Rubavu aho yasuraga ibikorwaremezo birimo imihanda, amasoko, ibyambu n’ingomero z’amazi n’amashanyarazi.

Amb. Gatete agendeye ku mibare y’ingufu z’amashanyarazi irimo izamuka yavuze ko mu minsi igiye kuza u Rwanda rugiye kujya rucuruza amashyanyarazi ku bihugu bihana imbibi cyane cyane mu mijyi ihana imbibi na rwo.

Ati “Nkuko ubona hano muri Rubavu hari uruganda ruri ku rwego mpuzamahanga ndetse hari umushinga wa Gaz Methane uzatanga megawati 56 umwaka utaha. Hagiye kuzajya havamo umuriro uri ku rwego mpuzamahanga. Turimo turakorana na Repubulika Iharanira Demokarasi ya Congo kugira ngo nabo babashe kubona ku muriro wacu noneho tubashe kuba twacuruzanya. Ibiganiro birimo kugenda neza.”

Minisitiri Gatete yavuze ko imishanga u Rwanda rufite nimara kuzura ruzaba rugeze ku rwego rwo kwihaza rugasagurira n’ibihugu bituranyi.

Uretse umushinga wa Gaz Methane hari n’uruganda ruri kubakwa mu Karere ka Gisagara rwitezweho gutanga megawati 70 ndetse n’umushinga wa Rusumo ruhuriyeho na Tanzania n’u Burundi uzatanga megawati 80.

Ati “Twakoze imiyoboro iri ku rwego mpuzamahanga, dushobora kugaburira Uganda,Tanzania, u Burundi na Congo mu gihe bakeneye amashanyarazi turi kugera aho twihagije mu gihugu ku buryo asigaye tuzacuruza mu bindi bihugu mu mijyi twegerange nka Goma na Bukavu.

Alexis Kabuto, Umuyobozi wa Kompanyi Shema Power Lake Kivu ifite inshingano zo gucukura Gaz Methane mu Kiyaga cya Kivu no kuyibyazamo amashanyarazi avuga ko mu kwezi kwa kane bazatangirira kuri megawati 17 ku buryo umwaka utaha uzarangira barimo gutanga megawati 56.

Ati “Ubu tugeze kuri 60% by’umushinga turatekereza ko tuzatangira vuba kuko igice cya mbere kizatangira mu kwezi k’Ukuboza tugatangira kugerageza imashini zacu zose ku buryo nko mu kwezi kwa kane tuzaba twizeye ko nta kibazo dufite tuzaba twatangiye gutanga amashanyarazi ari hagati ya megawati 14 na 17 hanyuma umwaka utaha ukazarangira twarabonye megawati 56. Twadindijwe na Covid-19 kuko imashini zacu zagiye ztinda kuza bituma tudindira umwaka wose.’’

Umushinga wa Shema Power Plant watangijwe mu Ukwakira 2019 ukaba witezweho kurangira mu Ukuboza 2022, uzasoza utwaye miliyari 400 z’amafaranga y’u Rwanda, utanze megawati 56.

Inyigo zerekanye ko mu Kiyaga cya Kivu harimo Gaz Methane ishobora gutanga hagati ya megawati 160 na 960, bitewe n’uburyo bwakoreshwa mu kuyibyaza amashanyarazi, igacukurwa mu gihe gishobora kugera ku myaka 50 nyuma umusaruro ukaba wahita ugabanuka ukagera hagati ya 15 na 20%.

U Rwanda rwateganyije ibice bitanu bishobora gucukurwamo Gaz Methane, mu gihe muri Repubulika ya Demokarasi ya Congo bisangiye uyu mutungo kamere, hateganyijwe ibice bitandatu. Ibice by’u Rwanda bishobora gutanga megawati 300.

Mu bice bitanu byo mu Rwanda bishobora gucukurwamo, bibiri biri mu Karere ka Rubavu, kimwe kiri mu karere ka Karongi mu gihe ibindi bibiri biri ku gice kigana ku karere ka Rusizi. Kugeza ubu ibice bitatu ni byo byabonye ababikoreramo.

Minisitiri Gatete yasuye Umushinga wa Shema Power Lake Kivu uzatanga megawati 56 z'amashanyarazi
Minisitiri Gatete yasobanuriwe aho ibikorwa byo kubyaza Gaz Methane amashanyarazi bigeze
Uruganda ruzatangaira gutanga amashanyarazi mu mpera z'Ukuboza mu buryo bw'igerageza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .