U Rwanda ruzakenera hafi miliyari 800 Frw ngo rugeze amashanyarazi kuri bose mu 2024

Yanditswe na Rabbi Malo Umucunguzi
Kuya 15 Mutarama 2020 saa 07:37
Yasuwe :
0 0

U Rwanda rukeneye nibura miliyoni $850 ngo rubashe guhaza amashanyarazi Abanyarwanda bose bitarenze umwaka wa 2024, nk’uko biri mu ntego Guverinoma yihaye.

Ni amafaranga atari make kuko nibura uyashyize mu mafaranga y’u Rwanda yagera hafi muri miliyari 800, ni ukuvuga 33% by’ingengo y’imari yose ingana na miliyari 2876.9Frw yagenwe uyu mwaka wa 2019/2020.

Umuyobozi Mukuru w’Ikigo Gishinzwe Ingufu, REG, Ron Weiss, yabigarutseho kuri uyu wa Kabiri ubwo hatangazwaga ibiciro bishya by’amashanyarazi mu gihugu, bisimbura ibyashyizweho muri Kanama 2018.

Magingo aya habarurwa ko amashanyarazi agera ku baturage 53%, bingana n’ingo miliyoni 1.4. Barimo miliyoni imwe bakoresha amashanyarazi yo ku muyoboro mugari n’ibihumbi 400 bakoresha ay’ingomero nto n’akomoka ku zindi ngufu nk’imirasire y’Izuba.

Yakomeje ati “Mu Rwanda tubara ingo miliyoni 2.8, tugomba kugeza amashanyarazi akomoka ku muyoboro mugari ku ngo miliyoni 1.4 zisigaye, ariko ibipimo bitwereka ko mu myaka ine n’igice iri imbere tuzubaka izindi nzu miliyoni imwe, ku buryo kugeza amashanyarazi ku 100% dusabwa kugeza amashanyarazi ku ngo miliyoni 2.4.”

Muri izo nzu harimo miliyoni imwe zizahuzwa ku muyoboro mugari, na miliyoni 1.4 zizahuzwa ku yindi miyoboro irimo ingomero nto n’imirasire y’izuba.

Weiss yakomeje ati “Nibyo ubu turimo gukora, imbogamizi ihari ni ukubona ingengo y’imari ikenewe muri iyi mishinga minini, igera kuri miliyoni $850 zikenewe kugira ngo izi miliyoni 2.4 zigerweho n’amashanyarazi.”

Ati “Turacyabona ko bishoboka, turimo gukoresha imbaraga nyinshi kugira ngo tubigereho, buri munsi mubona ko turimo kugeza amashanyarazi ku ngo nyinshi […], kandi tuzabikomeza kugeza tugeze ku 100%.”

Ron Weiss yavuze ko urebye imishinga ihari mu rwego rw’amashanyarazi, u Rwanda rufite ubushobozi bukenewe ngo ingo 100% zigerweho n’amashanyarazi, cyane ko imyinshi yamaze gusinyirwa amasezerano ndetse indi irimo kubakwa.

Ikigo cy’Igihugu cy’Iterambere (RDB) giheruka gutangaza ko mu mwaka wa 2019 ishoramari rishya ryanditswe ryageze kuri miliyari 2.46 z’amadolari ya Amerika, ni ukuvuga asaga miliyari zisaga 2300 Frw.

Muri uwo mubare urwego rw’ingufu rufitemo 45%, kuko harimo umushinga wo kubaka urugomero rwa Rusizi III wa miliyoni 613$, uwa Gasmeth Energy washowemo miliyoni $442 wo kubyaza ingufu Gaz Methane n’uwa Nots Solar Lamps utanga ingufu z’amashanyarazi zikomoka ku zuba washowemo miliyoni 72$.

Iyo mishinga yiyongeraho uwo kubyaza amashanyarazi nyiramugengeri mu karere ka Gisagara uzatanga Megawatts 80, urugomero rwa Rusumo ruzatanga MW 80 mu Rwanda, u Burundi na Tanzania, u Rwanda Rusizi IV ruzatanga MW 287 ku Rwanda, u Burundi na Repubulika ya Demokarasi ya Congo n’izindi.

Weiss yavuze ko kugeza kugeza mu 2024 u Rwanda ruzaba dufite MW 556, zihagije Abanyarwanda bose n’inganda zidahwema kwiyongera mu gihugu.

Gusa ngo igikenewe hagati aho ngo ni ukubaka imiyoboro ihagije y’amashanyarazi, yatuma agezwa ku baturage bayakeneye nta nkomyi. Muri icyo gihe hari n’icyizere ko ibiciro by’amashanyarazi bizamanuka, urebye ku bigo birimo gukorana na Leta mu kuyatunganya kandi adahenze cyane.

Umuyobozi Mukuru w’Ikigo Gishinzwe Ingufu, REG, Ron Weiss, avuga ko u Rwanda ruzakenera miliyoni $850 ngo ruhaze abaturage bose amashanyarazi mu 2024

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza