00:00:00 IGIHE NETWORK KN KINYARWANDA EN ENGLISH FR FRANCAIS

Tujyane mu ijoro ry’Isambaza mu Kivu, mu ikipe y’abagabo bataryama (Amafoto & Video)

Yanditswe na Ferdinand Maniraguha
Kuya 2 Mutarama 2023 saa 07:15
Yasuwe :

Bajya bavuga ko abatigererayo babeshywa byinshi! Mu bihe nk’ibi by’iminsi mikuru uzasanga kimwe mu biribwa abantu batembereye mu nkengero z’ikiyaga cya Kivu, baba basuye umujyi wa Rubavu, Karongi, muri Rutsiro cyangwa i Rusizi, batahava batariye Isambaza.

Ubu bwoko bw’amafi mato bwamamaye buribwa n’uwihagazeho, kuko mu masoko menshi mu Rwanda ikilo cy’izumishijwe (bavuga izikawushije) ntushobora kukibona munsi ya 7000 Frw.

Ubanza ari na yo mpamvu abanyarwanda batarya cyane amafi kuko Umunyarwanda abarirwa ko arya ibilo 2.5 by’amafi ku mwaka, akaba ari ikigero gito ugereranyije n’ibindi bihugu byo muri Afurika y’Iburasirazuba, aho umuturage abarirwa ko arya ibilo nibura bitandatu.

Nubwo turya nke ariko turazirya, gusa abenshi tuzibona mu isafuriya cyangwa ku bitanda byo mu isoko, kuri ba bagore bazicuruza. Ni bake bazi icyuya n’imbaraga bisaba abarobyi ngo ziboneke.

Isambaza ni amafi amaze imyaka itarenga 50 mu kiyaga cya Kivu, dore ko ariho kuri ubu aboneka gusa mu biyaga by’u Rwanda. Inzego zishinzwe ubworozi ziheruka gutera umurama wazo mu biyaga bya Burera na Ruhondo ariko ntibiratanga umusaruro.

Kuroba isambaza bisa nk’umuco ku basore n’abagabo baturiye ikiyaga cya Kivu, kutabimenya ni ikinegu gikomeye, ushobora kwimwa ku nzoga y’abagabo!

Gutemberera hafi y’ikiyaga cya Kivu ukahava utazi uko isambaza zirobwa nabyo ni ukunyagwa zigahera, kuko ushatse wabyita ubukerarugendo mu bundi, ariko busaba kwihangana cyane cyane ku bakunzi b’ibitotsi, cyangwa abatinya amazi magari by’umwihariko mu gihe cy’umwijima.

Ahagana saa moya n’igice z’ijoro nibwo nahagurutse hafi ya Bethany Hotel mu mujyi wa Karongi, nerekeza mu Kivu rwagati njye n’abo twari kumwe, tugiye gushakisha aho bari kuroba, ngo twihere amaso uko bikorwa.

Twari batatu tuyobowe n’umusare w’umusore, wadusabye kuzimya amatara yose kugira ngo abashe kubona icyerecyezo. Twamaze hafi isaha n’igice tuzengurika ibice bitandukanye by’ikiyaga cya Kivu muri Karongi, dushakisha ikipe yatwemerera gufatanya urugendo rwo kuroba.

Ikipe ni itsinda ry’abarobyi icyenda, ryiyemeza gufatanya kuroba uwo munsi kuko umwe atabibasha.

Ahagana saa tatu z’ijoro nibwo twabonye ikipe itwemerera kuyegera tugafatanya urugendo rwo kuroba, iyobowe na Nsengiyaremye Félix, umurobyi ubifitemo uburambe bw’imyaka umunani.

Kugira ngo ikipe runaka yemererwe kujya mu kiyaga cya Kivu, igomba kuba iyobowe n’umwe mu banyamuryango bemewe ba Koperative y’Abarobyi ari na we ubazwa amakosa yose ashobora gukorwa.

Iyo bamaze kunaga imiraga, bacana amatara kugira ngo isambaza zize zikurikiye urumuri, ziyigwemo

Buri joro, Koperative y’abarobyi yohereza abagenzuzi bo gucunga ko uburobyi buri gukorwa neza. Gukorwa neza bivuze kurobesha imitego yemewe itangiza abana b’amafi cyangwa ngo ibafate, ndetse no kwirinda kurobera ku nkengero kuko ariho amafi yororokera.

Nsengiyaremye n’ikipe ye batubwiye ko twahageze dutinze kuko ubusanzwe abarobyi bagera mu mazi saa kumi n’imwe n’igice, saa kumi n’ebyiri bakaba batangiye kuroba.

Mbere yo kwinjira mu mazi, hari ibikoresho by’ibanze abarobyi bagomba kuba bitwaje. Ibyo birimo amatara, umuraga (umutego ufata amafi), amakamba, peteroli n’ikibiriti cyo gucana. Birumvikana n’ubwato bubiri bugomba kuba buhari kuko aribwo bwifashishwa mu kuroba.

Umuhuzabikorwa w’umushinga w’uburobyi mu Karere ka Karongi, Projet Pêche Kibuye (PPK), Sibomana Jean Bosco yabwiye IGIHE ko impamvu baroba nijoro, ari uko isambaza ziba zitareba.

Ati "Iyo haje umwijima bagacana rya tara, ziza zikurikiye rwa rumuri. Iyo hari ukwezi ziba zireba byose, ntabwo zishobora kuza ngo zishore".

Ni nayo mpamvu mu kwezi bemerewe kuroba iminsi iri hagati ya 24 na 25 kuko aribwo haba hari umwijima.

Ati "Dufunga iminsi iri hagati y’ine n’itanu kubera ko haba hajeho ukwezi. Iyo hajeho ukwezi isambaza zirabona, washyiramo umuraga ziba zibona kuko amazi yose aba abona."

Nsengiyaremye avuga ko akazi bagatangira saa kumi n'imwe n'igice z'umugoroba, bakavamo ku isaha nk'izo mu gitondo

Ubwo twageraga aho Nsengiyaremye n’ikipe ye bari bari kurobera, twasanze bamaze kuroba icyiciro cya mbere. Gitangira saa kumi n’ebyiri z’umugoroba kikarangira saa moya n’igice.

Muri icyo gihe, baba bashyize imiraga mu mazi bakigendera, bagasiga bacanye itara ngo isambaza zize hafi aho. Iyo isaha n’igice bishize, baza kureba niba hari izafashwe.

Saa saba z’ijoro basubiza imiraga mu mazi, bakajya kuroba icyiciro cya kabiri. Kuri iyi nshuro barategereza kugeza saa kumi n’imwe za mu gitondo.

Ati "Iyo banaze saa saaba z’ijoro bwa kabiri, bategereza saa kumi n’imwe z’igitondo bakabona gukurura, bakabisoza bataha bajya kugurisha umusaruro babonye".

Ninjiye mu kiyaga cya Kivu nzi ko haba hari ahantu runaka aba barobyi bajya gushakishiriza isambaza, icyakora bambwiye ko atari ko bimeze, bajya aho babonye hapfa kuba hadakomye.

Nsengiyaremye n’ikipe ye y’abantu icyenda, twasanze baryamye mu bwato bitwikiriye amasashi imvura ibari ku mugongo, bategereje ko saa saba z’ijoro zigera bagasubira kuroba. Ubwo abazi kubyaza umusaruro igihe, igitotsi bari bakigeze kure.

Muri ubwo bwato bari baryamyemo, twabasanganye isambaza bari bamaze kuroba zingana n’ibilo hafi bitandatu. Batubwiye ko uko amasaha yigira imbere, ibilo bigabanyuka ku buryo bashobora gusigarana nka bitanu.

Nsengiyaremye n'ikipe ye twasanze bamaze kuroba ibilo bitandatu by'isambaza

Muri iyi minsi, bose bahuriza ku kuba umusaruro w’isambaza waragabanyutse ugereranyije no mu bihe bya kera.

Nsengiyaremye ati "Muri iyi minsi nta sambaza zirimo ariko mbere iyo umunsi wagendaga neza abantu bicaga nk’ibilo 50 cyangwa ijana n’ibilo 200 byarapfuye, ariko iki gihe kuva twafungura, iyo byagenze neza abantu babona ibilo nka 20 cyangwa 30, hari n’ababona ubusa."

Nk’iryo joro, bose bemezaga ko bashobora gutahana ibilo icumi. Ikilo kibisi cy’isambaza kuri koperative bari bari kukigura 2200 Frw, ubwo ibilo icumi ni 22,000 Frw.

Ufashe ayo mafaranga ukavanamo 7000 Frw ya peteroli bakoresha buri joro, ukavanamo ay’ifunguro bafata mu gitondo basoje akazi, asigaye ukayagabanya abantu icyenda, bose bahita biyamira bati ’ni urusenda’.

Sibomana avuga ko kugabanyuka kw’isambaza mu kiyaga cya Kivu byatewe n’impamvu zitandukanye zirimo abaroba rwihishwa batubahirije amategeko, bakajya kurobera ahatemewe, ari naho amafi yororokera.

Bijyana kandi n’imihindagurikire y’ibihe, rimwe ubushyuhe bukagabanyuka cyangwa bukiyongera mu kiyaga, kuba amazi yahumana n’ibindi.

Kubera kugabanyuka kw’isambaza, Tuyisenge Thomas yasanze we n’umuryango we batatungwa gusa n’uburobyi. Ubu abikora rimwe na rimwe akabifatanya no guhinga ibitunguru.

Ati "Iyo mu mazi byanze mpita njya guhinga ibitunguru, ni naho mbona umusaruro cyane kurusha mu mazi. Ubu isambaza zarabuze, ntabwo tuzi impamvu. Kera twategaga isambaza zikaboneka ari nyinshi cyane ariko ubu ibintu bigenda bihinduka."

Nta kazi katagira imbogamizi, aka ko no kubyuka ijoro n’imbeho yo mu mazi mwese muzi, ubwabyo ni imbogamizi! Abarobyi ariko ntibayibona nk’imbogamizi kurusha gutaha amara masa, umuhengeri, imvura n’ibindi.

Nsengiyaremye yibuka umunsi umuhengeri wabasangaga mu Kivu rwagati bakarohama, bagatabarwa n’abakozi ba Koperative bagenzuraga iryo joro.

Isambaza ziri mu kiyaga cya Kivu si izizanye, zatewemo mu myaka ya 1970. Ntawe uzigaburira, ahubwo zirya udusimba n’ibimera bito biba mu maso, bitaboneshwa amaso.

Imibare y’Ikigo cy’Igihugu gishinzwe ubuhinzi n’ubworozi (RAB) igaragaza ko umusaruro w’amafi mu Rwanda wavuye kuri toni 7000 mu 1994 ugera kuri toni 35324 mu 2020, ni ukuvuga ko wikubye inshuro 5. U Rwanda rushaka kujya rubona umusaruro w’amafi wa toni 112 000 bitarenze 2024.

By’umwihariko, isambaza byagenze neza hashobora kurobwa izingana na toni 500 mu cyumweru, bivuze ko ku kwezi ari toni ibihumbi bibiri ku kwezi, naho ku mwaka zikarenga toni ibihumbi 20.

Abarobyi bavuga ko isambaza zisigaye zarabaye nke
Ubwato buba ari bubiri cyangwa butatu, akaba aribwo bwifashishwa kugira ngo imiraga irambuke mu mazi. Uko ubwato butandukana, niko imiraga irushaho gutandukana amafi akinjiramo
Ku manywa hari abandi barobyi basanzwe baba bishakishiriza amafi ariko ku manywa biragorana kuko amafi aba areba
Mu gitondo abarobyi bahurira kuri Koperative, bakagurisha umusaruro wabo
Isambaza mbisi zigura make ugereranyije n'izimishijwe. Bivugwa ko bisaba ibilo bitatu kugira ngo ubone ikilo kimwe cyumye
Ku bwanikiro haba hari isambaza z'ubwoko butandukanye
Abarobyi bava kuroba hari abacuruzi babategereje kuri za koperative, bagahita batwara isambaza
U Rwanda rwifuza ko umusaruro w'amafi wiyongera bitarenze 2024
Isambaza ni bumwe mu bwoko bw'amafi mato bukunzwe cyane ku isoko mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .