00:00:00 IGIHE NETWORK KN KINYARWANDA EN ENGLISH FR FRANCAIS

Rusizi: Imyembe yabuze abakiliya, abahinzi bagwa mu gihombo

Yanditswe na Nsanzimana Erneste
Kuya 28 Ukuboza 2022 saa 07:37
Yasuwe :

Abahinzi b’imbuto mu karere ka Rusizi batangaje ko abakiliya b’imyembe basigaye bayigura intica ntikize, bagasaba kwegerezwa uruganda rutunganya umusaruro w’imbuto by’umwihariko imyembe mu rwego rwo kuyongerera agaciro.

Imirenge ya Mururu, Muganza, Nyakabuye na Bugarama yo mu karere ka Rusizi ifite umwihariko wo kweramo imbuto nyinshi z’indimu, imyembe, amacunga n’amapapayi, ikagira ikibazo cyo kuba itangira inganda zongerera agaciro izi mbuto, kuko n’izahahahoze zimaze imyaka irenga itanu zidakora.

Niyonzima Yoweri wo mu murenge wa Gikundamvura ku mwero w’imyembe asarura amabase arindwi buri cyumweru.

Ati “Icyifuzo cyacu ni uko batuzanira uruganda bakazana n’abashoramari bagura iyo myembe. Noneho natwe iyo myembe ikatugirira akamaro. Ntabwo wagurisha ibase y’imyembe amafaranga 800 ngo azagire icyo akumarira, hari n’igihe ididiba ibase bakayigura amafaranga 300”.

Nirere Alexia ufite ibiti 10 by’imyembe avuga ko kubera kutagira uruganda rutunganya umusaruro w’imbuto, bituma imyembe beza ntacyo ibamarira.

Ati “Ubushize hari umuntu wigeze kuza hano agura imyembe igiti ugasanga aguhaye 3000Frw. Imyembe hano bayitesha agaciro usanga abana birirwa mu biti birira, kuko ntiwasanga umwana mu giti ayirya ngo umuvune kuko yariye imyembe”.

Aba baturage bifuza ko mu gihe Leta itarabaha uruganda rw’imbuto, yashyiraho igiciro ntarengwa cy’imyembe kugira ngo badakomeza guhendwa n’abaguzi bayo.

Umuyobozi wungirije w’Akarere ka Rusizi ushinzwe iterambere ry’ubukungu Ndagijimana Louis Munyemanzi, yabwiye IGIHE ko bafite gahunda yo kuvugurura inganda ebyiri zakoraga imitobe zirimo urwa SONAFRUIT n’urwa COPPROJUFUGI.

Ati “Uti turashaka no kuvugurura buriya buhinzi bw’imyembe, iriya myembe ni imyembe yifite utuntu tw’udutsi kenshi na kenshi no kuyitunganya bikagorana”.

Ndagijimana avuga ko bari gukorana n’Ikigo cy’Igihugu gishinzwe Iterambere ry’Ubuhinzi n’Ubworozi (RAB) kugira ngo haboneke imbuto nshya yera imyembe minini izafasha abahinzi kubona umusaruro mwinshi kurusha uwo bafite ubu.

Imyembe isigaye ipfa ubusa kubera kubura abaguzi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .