00:00:00 IGIHE NETWORK KN KINYARWANDA EN ENGLISH FR FRANCAIS

Rulindo: Miliyari enye zigiye kwifashishwa mu kwagura IPRC Tumba

Yanditswe na Claude Bazatsinda
Kuya 25 January 2022 saa 11:28
Yasuwe :

Kuri uyu wa mbere tariki 24 Mutarama 2022, hatangijwe imirimo yo kwagura IPRC Tumba hashyirwaho ibuye ry’ifatizo ahazubakwa inyubako z’ishami rishya ritanga ubumenyi ngiro mu by’inganda, "IPRC Tumba Mechatronics".

Ni imirimo izatwara amafaranga y’u Rwanda agera kuri miliyari enye.

IPRC Tumba Mechatronics ni Ishami rishya rizafasha abazaryigamo kugira ubumenyi mu mikorere y’inganda kuko rizahuza ubumenyi bajyaga bahabwa ariko ugasanga hari ibyo badasobanukiwe neza.

IPRC Tumba Mechatronics igizwe n’ibyumba 12 byo kwigiramo, 8 byo gukoreramo ubushakashatsi, Laboratoires, n’isomero byitezweho kuzuzura mu gihe cy’amezi atandatu.

Umuyobozi wa IPRC Tumba, Eng. Mutabazi Rita Clemence yavuze ko iri shami rishya bungutse rizabafasha gutanga ubumenyi ku banyeshuri no gusohora abafite ubushobozi bwo gukora mu nganda.

Yagize ati" Iri shami rya mechatronics rizaba rihuje amasomo yose yifashishwa mu nganda. Ubundi umunyeshuri yabyigaga bidahujwe ku buryo hari ibyo yabaga atashobora gukora. Bizadufasha kubaha ubumenyi bubashoboza gukora mu nganda zigenda ziyongera."

Umuyobozi w’Ikigo cy’u Bufaransa cy’Iterambere, Agence française de Développement (AFD) mu Rwanda, Arthur Germond avuga ko kwagura IPRC Tumba biri muri gahunda y’ubufatanye hagati ya Leta y’u Rwanda n’u Bufaransa bugamije gufasha urubyiruko rw’u Rwanda kurushaho gukarishya ubumenyi.

Yagize ati “Ibi biri muri gahunda y’ubufatanye hagati ya Leta y’u Rwanda n’u Bufaransa. Turifuza gufasha urubyiruko rw’u Rwanda mu kuruha ubumenyi buzabafasha guhangana ku isoko ry’umurimo ndetse runateza imbere igihugu. Ubumenyi bazahabwa buzabafasha kurushaho gusobanukirwa n’ikoranabuhanga rigezweho mu nganda."

Umunyamabanga wa Leta muri Minisiteri y’Uburezi ushinzwe amashuli y’ubumenyingiro, Claudette Irere avuga ko iyi gahunda izabafasha kongerera ubumenyi abanyeshuri kandi bagiye guhita bayitangiza .

Yasabye abazaryigamo kuzarushaho gutanga umusaruro.

Yagize ati “Tugiye guhita dutangirana abanyeshuri 50, undi mwaka tuzafata 150. Bizakomeza gutyo kuko twifuza ko buri mwaka twajya dufata abanyeshuri 100."

Iri Shami rya Mechatronics rizatwara amafaranga y’u Rwanda agera kuri miliyari enye bingana na 47% by’Umushinga wose ufite agaciro ka miliyoni 7 n’igice z’amayero.

Uyu mushinga watewe inkunga na AFD uzafasha IPRC Tumba, ndetse n’ibigo byigisha imyuga biherereye mu Karere ka Rulindo kunoza ibijyanye n’ikoranabuhanga.

Harimo kandi kwimenyereza ibijyanye naryo, amahugurwa, ibizavamo bikazagirira akamaro abo banyeshuri ndetse n’abaturage bo mu gace iri shuri riherereyemo.

IPRC Tumba ubu ifite abanyeshuli bagera kuri 668 bahahererwa ubumenyingiro aho abahiga bahamara imyaka itatu bakahava bahawe n’impamyabumenyi yo ku rwego rwa mbere rwa Kaminuza "Diploma".

Biteganyijwe ko imirimo yo kubaka Ishami rya Mechatronics muri IPRC Tumba izamara igihe cy’amezi atandatu uhereye muri uku kwa Mutarama 2022.

Kwagura IPRC Tumba bizatwara asaga miliyari enye z'amafaranga y'u Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .