00:00:00 IGIHE NETWORK KN KINYARWANDA EN ENGLISH FR FRANCAIS

Perezida Kagame yongeye guturwa ikibazo cy’uruganda rw’ingano i Nyamagabe

Yanditswe na Prudence Kwizera
Kuya 26 August 2022 saa 05:47
Yasuwe :

Perezida Paul Kagame yagaragaje ko atumva impamvu uruganda rutunganya ingano mu Karere ka Nyamagabe rutubakwa, bigashyira abaturage mu bihombo.

Abahinzi b’ingano bo mu Karere ka Nyamagabe bavuga ko bakomeje guterwa igihombo no kuba uruganda Gitare Mills rwagenewe kuzitunganya rudakora, bigatuma izo bahinze zipfa ubusa.

Iki kibazo cyagejejwe kuri Perezida Paul Kagame mu 2019 asaba ko inzego z’ubuyobozi zigikemura ariko cyongeye kumugezwaho nyuma y’imyaka itatu ubwo yabasuraga kuri uyu wa Gatanu tariki ya 26 Kanama 2022.

Urwo ruganda rwubatswe n’abashoramari mu Murenge wa Tare kugira ngo rujye rwakira kandi rutunganye ingano zihingwa mu turere twa Nyamagabe na Nyaruguru, kuko muri icyo gice cy’imisozi miremire zihera ku bwinshi.

Kuri ubu inyubako zarwo zatangiye kwangirika kubera kudakoreshwa kandi rwaruzuye rutwaye amafaranga menshi abarirwa muri miliyoni 400 Frw.

Abaturage baruturiye bavuga ko kuva rwubakwa rwakoze igihe gito ruhita ruhagarara bitewe n’ibibazo byaruvuzwemo birimo igihembo n’imicungire mibi y’umutungo.

Mu byifuzo byatanzwe na Meya wa Nyamagabe, Niyomwungeri Hildebrand, harimo ko aka karere gakeneye uruganda rw’ingano. Umukuru w’Igihugu yavuze ko uru ruganda atari ubwa mbere ruvuzwe, ko atumva impamvu rutaraboneka.

Yagize ati "Mukanya bamaze kuvuga uruganda rw’ingano. N’ubushize naje hano bararumbwira, twarasezeranye tuvuga ko hari ibyo twafasha kugira ngo ibikenewe biboneke. Ariko kugeza ubu, ntabwo ndabona uwansobanurira impamvu uruganda rushya rugezweho, rwatunganya ingano zo muri Nyamagabe, impamvu rutaboneka.”

Perezida Kagame yavuze ko atumva impamvu abayobozi badakemura ibibazo bafitiye ubushobozi, bikaza gutegereza ko azakorera urugendo mu gace runaka.

Ati “Utaye igihe cy’imyaka itanu ariko urambwira ubu ngo ugiye kubikora. Wabujijwe n’iki kubikora igihe byavugwaga? Ni ibigenda bigaruka buri gihe, ukabaza uti habuze iki ntihagire ugusobanurira icyabuze. Iyo abuze icyo agusobanurira, biravuze ngo habuze we.”

Perezida Kagame yasabye abayobozi barimo Minisitiri w’Ubutegetsi bw’Igihugu, Gatabazi JMV ndetse n’uw’Ubucuruzi n’Inganda, Dr Ngabitsinze Jean Chrysostome, ko bakemura byihuse ikibazo cy’uruganda rw’ingano mu maguru mashya.

Bemeye ko bagiye gufasha rwiyemezamirimo kubona ibyangombwa by’ubutaka n’amashanyarazi ku buryo uruganda rukora mu gihe cya vuba.

Uru ruganda rwubatswe mu 2004 nyuma gato ruza gufunga kubera ibibazo by’amadeni. Muri 2017 rwongeye gusubukura imirimo ariko bigeze muri Mutarama 2018 rwongera gufunga imiryango.

Muri Gashyantare 2019, ubuyobozi bw’Akarere ka Nyamagabe bwaragaje ko rwahagaze gukora kubera ideni rufitiye banki, abanyamigabane bakaba batumvikana neza uko rizishyurwa.

Icyo gihe bwavugaga ko hakenewe arenga Miliyoni 44 Frw kugira ngo rwongere gukora.

Perezida w’Inama y’Ubutegetsi y’urwo ruganda, Ndahimana Emmanuel, avuga ko umushoramari warwubakishije atubahirije amasezerano yagiranye na banki maze bituma irufatira.

Yagize ati “Nta muntu warukoresha uko yishakiye banki itabyemeye kuko ruri mu maboko yayo. Ibiganiro byagiye biba muri iki gihe ni ugushaka ukuntu uwambuye yakwishyura kugira ngo banki yishyurwe noneho uruganda ruboneke. Ntabwo uwo muntu arishyura uretse ko dutekereza ko afite ubwishyu. Ni ibintu byafashe igihe kirekire kirenze icyo twatekerezaga. Turatekereza ko niyishyura tuzumvikana na banki noneho uruganda rukongera rugakora.”

Uruganda Gitare Mills rwafunze imiryango rufite ubushobozi bwo gutunganya toni zirindwi z’ingano buri munsi.

Uru ruganda rugikora rwari rufite ubushobozi bwo gutunganya toni zirindwi z'ingano ku munsi
Ibibazo byatumye uru ruganda ruhagarara harimo n'amadeni

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .