Perezida Kagame yitabiriye imurika ry’indege na Drones i Kigali (Amafoto)

Yanditswe na Ferdinand Maniraguha
Kuya 28 Gashyantare 2019 saa 10:12
Yasuwe :
0 0

Perezida Paul Kagame yatemberejwe mu imurika rigaragaza iterambere rigezweho mu gukora indege nini n’intoya zizwi nka Drones, riri kubera i Kigali mu nama nyafurika yiga ku by’indege (Aviation Africa Summit).

Iri murika riri kubera muri Kigali Convention Centre ribangikanye n’iyo nama, ryitabiriwe n’abamurika 80 barimo abakora indege za Boeing, Airbus, abakanika indege, amashuri akomeye yigisha gutwara indege n’abandi.

Inama Aviation Africa ihurije hamwe abasaga 400 bo mu bihugu 71 birimo 35 bya Afurika. Biganjemo abakora muri Guverinoma n’abasanzwe bakora iby’indege nk’abikorera, abakora indege, abacuruza ibyuma byo gukanika indege, abakanika, abigisha abanyeshuri gutwara indege n’abandi.

Bimwe mu biganirwaho harimo imbogamizi zituma urwego rw’indege rudatera imbere uko byifuzwa muri Afurika, amategeko agenga urwo rwego, umutekano w’abakora ingendo n’ibindi.

Ubwo yatangizaga iyo nama, Perezida Kagame yavuze ko imikorere yo kuba nyamwigendaho ku bihugu bya Afurika byanga gufungurirana ikirere, ari byo biheza inyuma urwo rwego.

Yagize ati “Kwigira nyamwigendaho hagati yacu, ni ukureba hafi bigamije gutuma isoko ku umugabane wacu rihorana ibibazo, ridatunganye kandi rihenze ari nako bigabanyiriza amahirwe sosiyete nyafurika.”

Yavuze ko iterambere ry’urwego rw’indege rizaturuka ku guhuriza hamwe imbaraga, abanyafurika bakoroherezanya indege zikanyura mu kirere nta nkomyi.

Umunyamabanga wa Leta ushinzwe gutwara abantu n’ibintu muri Minisiteri y’ibikorwa remezo, Eng Uwihanganye Jean de Dieu yavuze ko u Rwanda rwifuza kuba igicumbi cy’ibijyanye n’indge muri Afurika.

Ubusanzwe iyi nama yaberaga i Dubai muri Leta Zunze Ubumwe z’Abarabu ariko Uwihanganye yavuze ko baje gusanga bidakwiriye.

Ati “Yaberaga Dubai ariko urumva ikintu kigenewe Afurika kibera i Dubai. Abayitegura bavugaga ko bigoye ngo babone igihugu cya Afurika kibikora ariko mu bushishozi n’ibiganiro twagiranye, twumvikanye ko ikintu cya Afurika gikwiriye kubera muri Afurika kandi twifuza ko bizakomeza.”

Uwihanganye avuga ko u Rwanda rwakiriye iyo nama ku nshuro ya kabiri kandi rwifuza kujya ruyakira buri gihe ikazagera ku rwego mpuzamahanga ikaberamo n’ibindi bikorwa birimo nko kugura no kugirisha indege.

Ibyo avuga ko bizagerwaho biturutse ku mbaraga igihugu kiri gushyira mu bikorwa remezo nko kubaka ibikorwa remezo nk’ibibuga by’indege, guha ubushobozi sosiyete nyarwanda RwandAir, kubungabubunga umutekano mu by’indege n’ibindi.

Abakora indege za Airbus, RwandAir ikoresha basobanurira Perezida Kagame imikorere yazo
Airbus nazo zibamo ubwoko butandukanye
Mu imurika hagaragajwe n'ubwoko bw'indege z'intambara n'imikorere yazo
Perezida Kagame aganira n'umuyobozi w’Inama y’inama y’ubutegetsi y’Ishyirahamwe Mpuzamahanga ry’Ubwikorezi bw’Indege IATA akaba n’Umuyobozi wa sosiyete Qatar Airways, Akbar Al Baker
Perezida Kagame asobanurirwa imikorere ya bumwe mu bwoko bw'indege z'intambara mu imurika
Perezida Kagame asuhuza abayobozi ku mwanya wahariwe abubaka ikibuga cy'indege cya Bugesera
Perezida Kagame ku kibanza cya bamwe mu bakora amatara agezweho arimo n'ayifashishwa ku bibuga by'indege
Perezida Kagame yitegereza bumwe mu bwoko bw'indege RwandAir ikoresha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza