Nyagatare: Bihaye ukwezi kumwe ko kuvugurura inzu zitajyanye n’igihe mu mujyi

Yanditswe na Hakizimana Jean Paul
Kuya 29 Ukwakira 2019 saa 07:00
Yasuwe :
0 0

Ubuyobozi bw’Akarere ka Nyagatare bwatangaje ko bwihaye ukwezi kumwe ko kuvugurura inzu ziri muri uyu Mujyi zitajyanye n’igihe kugira ngo bahuze n’igishushanyo mbonera nk’umujyi uri muri itandatu yatoranyijwe mu kunganira Kigali.

Ibi burabivuga mu gihe mu Mujyi wa Nyagatare hari kugaragara amavugurura yiganje mu nzu zikorerwamo ubucuruzi, zimwe ziri gusigwa amarangi mashya, izindi zikavugururwa hari n’iziri gushyirwa amapave imbere byose bigakorwa hagamijwe guhindura isura y’uyu mujyi.

Abafundi, abayede, abasiga amarangi n’abandi bantu bazwiho kurimbisha umujyi barahiganje muri iyi minsi, abafite inzu cyane cyane izikorerwamo ubucuruzi bahawe ukwezi k’Ugushyingo kugira ngo bazabe basoje kuzivugurura.

Umuyobozi w’Akarere ka Nyagatare, Mushabe David Claudien, yabwiye IGIHE ko atari ubwa mbere bavuguruye ariko ko ubu biri gukorwa bijyanishwa mu ishusho y’umujyi wunganira Kigali.

Yagize ati “Ntabwo aribwo bwa mbere tuvuguruye n’ubundi dusanzwe tuvugurura, turavugurura hagashira igihe tukongera tukavugurura, turifuza umujyi usa neza niyo mpamvu mubona turi kubishyiramo imbaraga cyane. Niba tuvuga ngo abaturage bacu batuye mu mujyi wa Kabiri turimo turabazanira imihanda n’ibindi bikorwa remezo bitandukanye bibaha amafaranga.”

Yakomeje avuga ko ku busabe bwabo Perezida Kagame yabemereye ko muri uyu mwaka bazongererwa abanyeshuri bahabwaga muri Kaminuza y’u Rwanda Ishami rya Nyagatare, nibura bakagera ku 4000. Ngo ukwiyongera kwabo ni inyungu ku bafite inzu zikodeshwa n’abacuruzi b’i Nyagatare.

Meya Mushabe yavuze ko kandi hateganywa kubakwa ibilometero 12 by’imihanda byiyongera ku bindi bihari mu mujyi mu rwego rwo gukomeza korohereza abawugendamo n’abawukoreramo.

Yagize ati “Abacuruzi na bo hari ibyo basabwa, turabazanira ibikorwa remezo bizajya bibafasha mu kubona abakiriya n’amafaranga muri rusange ariko nabo bagomba kugira ibyo bavugurura mu bikorwa byabo kugira ngo umujyi urusheho gusa neza nabo bakorere ahantu hasa neza.”

Uyu muyobozi akomeza avuga ko kuri ubu batangiye kubaka indi mihanda ikora ku Mujyi wa Nyagatare mu rwego rwo kwagura uyu mujyi. Mu mihanda igiye gukorwa harimo uva Nyagatare-Kanyinya-Kagitumba, Nyagatare-Tabagwe-Karama n’indi myinshi ihuza aka karere n’Intara y’Amajyaruguru.

Mbabazi Juliet ucururiza mu Mujyi wa Nyagatare avuga ko guhera umwaka ushize ubuyobozi bwabateguje kuvugurura inzu bacururizamo kandi ngo barabyishimiye.

Nyirigira Félix waturutse mu Karere ka Gatsibo mu Murenge wa Murambi akajya kuba umuyede kuri Stade ya Nyagatare, yavuze ko agiye kumara amezi ane akorera amafaranga kandi hari aho byamuvanye n’aho byamugejeje.

Ati “Ku munsi hano banyishyura amafaranga 1500, naguze igare ryanjye bwite mbikesha aka kazi, mfite n’izindi ntego ku buryo ninkomeza gukora hano tuzajya kurangiza kuyubaka nariguriye n’ikibanza.”

Nyagatare ni umwe mu mijyi itandatu yatoranyijwe ngo yunganire Kigali, yiyongera ku wa Huye, Muhanga, Musanze, Rubavu na Rusizi.

Iyi mijyi ikaba yarashowemo arenga miliyoni 95 z’amadorari yatanzwe na Banki y’Isi mu kuyubakamo ibikorwa remezo, biteganyijwe ko mu 2024, Abanyarwanda 30% bazaba bayitujwemo.

Abatuye Nyagatare bagenda batikandagira ku bw'imihanda bubakiwe. Abakora ubucuruzi basabwe kubibyaza umusaruro
Umujyi wa Nyagatare uri kuvugururwa ngo ube koko ubereye kuba uwa kabiri kuri Kigali
Kugeza mu Ugushyingo 2019, inyubako z'ubucuruzi zo mu Mujyi wa Nyagatare zigomba kuba zamaze kuvugururwa
Meya Mushabe yavuze ko abacuruzi b'i Nyagatare bakwiye kubyaza umusaruro ibikorwa remezo bubakiwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza