Ngoma: Akanyamuneza ku batuye mu ngo 3000 ziheruka guhabwa amashanyarazi

Yanditswe na Evariste Nsengimana
Kuya 24 Mata 2019 saa 08:56
Yasuwe :
0 0

Imiryango 3000 ituye mu Mirenge ya Zaza, Murama, Mutenderi, Kazo na Sake mu Karere ka Ngoma ivuga ko yishimiye amashanyarazi iheruka guhabwa, kuko yayikuye mu icuraburindi igatangiza n’imishinga ibyara inyungu.

Umuyobozi w’ishami rya Sosiyete Ishinzwe Ingufu (REG) mu Karere ka Ngoma, Niyonkuru Benoît yavuze ko izo ngo zahawe amashanyarazi mu mishinga ibiri REG ifatanyije n’Akarere ka Ngoma hamwe n’undi mushinga wo gukwirakwiza amashanyarazi mu byaro uterwa inkunga na Leta y’Ababirigi Mu Ntara y’Iburasirazuba.

Yavuze ko binyuze muri iyo mishinga ingo zisaga 3000 ari zo zimaze gucanirwa mu mezi atatu ashize kandi ko uyu mubare uzakomeza kwiyongera ku buryo bitarenze uyu mwaka zizagera ku bihumbi bitanu.

Ubwo IGIHE yasuraga abatuye mu Mirenge iyo mishinga yakorewemo, bavuze ko bishimiye uburyo amashanyarazi bahawe abafasha mu bikorwa bitandukanye.

Mugiraneza Jean Claude wo mu Kagari ka Ruhinga, Umurenge wa Zaza yavuze ko mbere y’uko amashanyarazi aza bakoreshaga udutadowa mu kumurika ariko ubu basigaye bakanda ku rukuta hakabona.

Ati “Twakoreshaga udutadowa rimwe na rimwe tugakoresha amabuji. Bwari ubuzima butugoye ariko aho amashanyarazi aziye ubona ko twateye imbere.”

Yavuze ko nijoro kujya hanze byabagoraga ariko ubu ‘ni ugukanda ku rukuta gusa hakabona’.

Mugiraneza yavuze ko umuriro wa 500 Frw awumarana ukwezi mu gihe mbere mu kwezi yacanaga mazutu ya 2000 Frw.

Umuyobozi w’Umudugudu wa Nyagahandagazi, Ndemeyiryimana Jean Nepomuscène yavuze ko amashanyarazi ataraza byabagoraga ku buryo no kubona umuriro wa Telefone byari ikibazo.

Yavuze ko n’abana be byabagoraga gusubira mu masomo ariko ubu ngo byaroroshye.

Insengero ntizigicana mazutu

Umudiyakoni mu itorero rya ADEPR, Paruwasi ya Sake, Umudugudu wa Kagarama, Nzemeriryimana Lambert yabwiye IGIHE ko mbere y’uko amashanyarazi aza bahoraga bagura moteri na batiri zipfa ntacyo zibamariye.

Ati “Hari ubwo twaguze moteri I y’ibihumbi 180 Frw [ya kabiri] nayo irapfa ukumva ni ibibazo bikomeye ariko ni ukuri Imana yabigenje neza ikoresha Leta baduha umuriro w’amashanyarazi biratunezeza cyane.”

Yavuze ko umuriro wa 250 Frw ubacanira mu gihe cy’amateraniro ndetse ukanasigara mu gihe bagikoresha moteri byabasabaga mazutu ya 2000 Frw.

Ibyishimo ni byose ku mavuriro

Umuyobozi wungirije w’ikigo Nderabuzima cya Sangaza, Muhire Zacha yavuze ko mbere y’uko bahabwa umuriro w’amashanyarazi bakoreshaga moteri ariko bakayicana rimwe na rimwe kuko ikoresha mazutu nyinshi.

Uretse imashini zandika zikenera umuriro w’amashanyarazi, iki kigo nderabuzima gifite izindi zikonjesha imiti, izipima ibizamini, izita ku bana bavutse bafite ibibazo n’ibindi.

Ati “Amashanyarazi yadufashije byinshi. Twagiraga moteri ku buryo nko kuzana mazutu byatugoraga cyangwa igashira umucungamutungo adahari urumva ibikorwa byagombaga guhagarara ariko ubu ntibikiba.”

Batangiye imirimo ibyara inyungu

Umuturage ufite inzu yogosheramo, Nyombayire Egide, avuga ko amashanyarazi ataraza byari bigoye kubona aho umuntu yiyogoshesha ariko ubu ahubwo asigaye abibyaza umusaruro.

Akora akazi ko kogosha kandi ku munsi abona hagati ya 3000 Frw na 5000 Frw.

Mugenzi we wogoshera mu Murenge wa Zaza, Ntwali Israel yavuze ko mbere abaturanyi biyogosheshaga urwembe n’imikasi ariko aho amashanyarazi aziye ibyo babicitseho.

Ibyo bimufasha kwinjiza nibura 2000 Frw ku munsi amurinda kugira icyo asaba ababyeyi be.

Umuturage wahawe akazi ko gukoresha icyuma gisya mu Kagari ka Ruhinga, Ndayisaba Eric yagize ati “Umuriro w’amashanyarazi nkatwe dukora ku cyuma gisya uradufasha cyane kuko ntitugikoresha mazutu, umuntu ntakivunika yatsa icyuma cya mazutu. Umukiliya araza ukamukorera bikihuta akigira mu zindi gahunda.”

Serivisi zarihuse

Umunyamabanga Nshingwabikorwa w’Akagari ka Ruhinga nako kahawe amashanyarazi, Musabyimana Balthazar, yavuze ko batarahabwa amashanyarazi hari serivisi zimwe abaturage basabwaga zabagoraga kuzibona cyane cyane iz’ikoranabuhanga.

Yavuzemo nko guhindurira abantu ibyiciro by’ubudehe, gutanga serivisi z’irangamimerere nko kwandukuza uwapfuye n’izindi.

Ati “Aho umuriro uziye hari impinduka, abantu bose urabona ko bishimiye umuriro babonye. Ubu umuntu ushaka serivisi ku kagali ntabwo tugitekereza kumwohereza ku Murenge ahubwo uko twicaranye duhita tubikora mu minota itarenze 15.”

Ishami rya REG mu Karere ka Ngoma rigaragaza ko umwaka wa 2018 warangiye abafite amashanyarazi bagera kuri 46% ariko wongeyeho abamaze gucanirwa n’iyo mishinga bagera kuri 52% . Abo barimo 32% bafatiye ku muyoboro mugari na 20% bakoresha imirasire y’izuba.

Impuzandengo y’ingo mu Rwanda zifite amashanyarazi iheruka gutangazwa muri Gashyantare 2019 igaragaza ko bangana na 51%, barimo 37% bafatira ku muyoboro mugari. Ubu u Rwanda rukaba rufite ubushobozi bwo gutunganya amashanyarazi angana na Megawati 221. Intego ni uko buri muturarwanda azaba afite amashanyarazi bitarenze umwaka wa 2024

Abaturage batangiye kugura imashini zishya
Ingo 3000 zahawe amashanyarazi mu mezi atatu ashize
Itorero rya ADEPR Paruwasi ya Sake, Umudugudu wa Kagarama ryahawe amashanyarazi
Mu murenge wa Murama naho bahawe amashanyarazi
Ndayisaba Eric avuga ko amafaranga ahemberwa gukoresha icyuma gisya amufasha mu mibereho
Nyombayire Egide yinjiza hagati ya 3000-5000Frw ku munsi
Ntwali amafaranga akura mu kogosha amufasha mu mibereho
Umunyamabanga Nshingwabikorwa w'Akagari ka Ruhinga, Musabyimana Balthazar avuga ko serivisi zisigaye zihuta kubera amashanyarazi bahawe
Umushinga uzarangira ucaniye ingo zirenga ibihumbi bitanu
Umuyobozi w’ishami rya REG mu Karere ka Ngoma, Niyonkuru Benoît avuga ko ubu buri murenge ugeramo amashanyarazi

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza