00:00:00 IGIHE NETWORK KN KINYARWANDA EN ENGLISH FR FRANCAIS

Kutagirana amasezerano n’abacuruzi, intandaro y’ibiciro bito bipyinagaza umuhinzi

Yanditswe na IGIHE
Kuya 25 May 2024 saa 06:40
Yasuwe :

Abahinga ibihingwa bitandukanye birimo imboga, imbuto n’indabo bavuga ko ibiciro bagurirwaho umusaruro ukiva mu murima ari bito cyane ugereranyije n’igiciro ibyo bagurishije bigurwaho ku masoko atandukanye yaba ay’imbere mu gihugu no hanze yacyo.

Ntibyagutungura ugeze mu Gakenke ahari agasoko ko ku muhanda ukagura inanasi ya 300 Frw ariko yagera i Kigali ukayigura atari munsi ya 1000 Frw.

Ibi ntibigaragara ku mbuto gusa kuko n’abahinga imboga bagaragaza ko igiciro abacuruzi babaguriraho ari gito ugereranyije n’ibyo bashora mu kazi kabo ndetse bikagera ku muguzi wa nyuma bihenze cyane.

Cyuzuzo Anitha ukora ubuhinzi bw’imiteja n’urusenda mu karere ka Bugesera, avuga ko mu bihe bishize abahinzi bashyiraga abacuruzi bakeneye ibyo bejeje bafitanye amasezerano atanditse, bigatuma rimwe bashobora kwisubiraho mu gihe babonye ubibagurisha ku giciro gito ugereranyije n’ibyo bari bumvikanye.

Yagaragaje ko muri iki gihe yahinze imiteja ku butaka bungana na hegitari ariko hakiri impungenge ku biciro bito bagurirwaho kuko nta makuru ajyanye n’isoko babona.

Ati “Imiteja n’urusenda ntabwo byari byagera ahantu heza ariko turebye aho twaturutse, ubona turi mu nzira nziza. Nk’ubu imiteja mpinga ni iyo kohereza hanze, bivuze ngo aho igemurwa mu Bwongereza usibye uwo nyigemuraho nta wundi wampa amakuru, ashobora no kunyifatira.”

Abahinga imiteja usanga ikilo kimwe kigurwa kuva kuri 600 Frw kuzamura bitewe n’igihe kigezweho ariko ku isoko igahenda cyane.

Iradukunda Jerome uhinga poivre n’ibitunguru mu karere ka Rubavu yagaragaje ko mu gihe bahinga nta soko ndetse n’amasezerano yanditse n’umuguzi bitazaborohera gutera imbere

Ati “Ikibazo umuhinzi w’ibitunguru afite ni uko ahinga nta soko afite. Kugira ngo iyo mbogamizi iveho ni uko yajya ahinga afite n’amasezerano y’isoko kugira ngo wa musaruro nujya uboneka uzajye utwarwa n’uwawemeye.”

Ubushakashatsi bwakozwe na Kungahara Wagura Amasoko ku bufatanye na Minisiteri y’Ubucuruzi n’Inganda, hamwe na Minisiteri y’Ubuhinzi n’Ubworozi bwagaragagaje ko amasezerano abahinzi bagenda bagirana n’abakiriya usanga ahengamiye ku mucuruzi ku buryo bita umuhinzi mu gihombo.

Umujyanama w’ibigo bikora ubuhinzi n’ubucuruzi bw’ibikomoka ku buhinzi wanakoze ubu bushakashatsi, Janvier Ahimanishyize yagaragaje ko basanze abamamyi baba hagati y’umuhinzi n’umuguzi ari bo batuma hazamo ikinyuranyo kinini.

Ati “Amasezerano agamije kugira ngo umuhinzi amenye amakuru yo isoko, avuganye n’umuntu uri ku isoko amusobanurire ubwiza bw’umusaruro ukenewe ni ubuhe, ingano ikenewe y’umusaruro ni iyihe, mu kihe gihe? Iyo umuhinzi afite ayo makuru agakorana na wa muguzi kandi akamwongerera ubushobozi ashobora gutanga umusaruro ukenewe ku isoko, ukagurwa ku mafaranga azamutse kandi igice kinini kikagera ku muhinzi.”

Umuyobozi Mukuru Ushinzwe Uruhererekane nyongeragaciro muri Minisiteri y’Ubuhinzi n’Ubworozi, Alice Mukamugema yatangaje ko kugirana amasezerano yungura impande zombi bizafasha gukemura ibibazo bitandukanye abahinzi n’abacuruzi bahura na byo.

Ati “Icyo Leta yifuza ni uko ari umuhinzi yabona ayo mafaranga n’umucuruzi ariko akayabona. Umwe muri mwe abonye inyungu undi ntayibone ntabwo ubucuruzi bwakomeza kugenda neza. Abahinzi mubonye amafaranga koko umucuruzi abaha agahomba yavamo ntabwo ubutaha mwabona uwo mucuruza na we.”

Imibare igaragaza ko indabo, imboga n’imbuto bisarurwa mu Rwanda byiyongera ku isoko mpuzamahanga kuko mu 2017 hoherezwaga toni 40 ku kwezi, mu gihe ubu bigeze kuri toni zisaga 1000 ku kwezi.

Mu 2021/2022 imboga n’imbuto zinjirije u Rwanda asaga miliyoni 42,8$ na ho mu 2022/2023 yahise yiyongera agera kuri miliyoni zirenga 58,1$, na ho kuva muri Nyakanga 2023 kugeza muri Gashyantare 2024 u Rwanda rwohereje mu mahanga imboga, imbuto n’indabo bifite agaciro ka miliyoni 46$.

Umuyobozi Ushinzwe Uruhererekane Nyongeragaciro muri MINAGRI, Alice Mukamugema yagaragaje ko amasezerano hagati y'abahinzi n'abaguzi azakemura ibibazo bari bafite
Abahinzi n'ababagurira umusaruro bemeza ko aya mazezerano azabafasha gutera imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .