Inyungu ya Radisson Blu Kigali yazamutse ku gipimo cya 18% mu myaka itatu

Yanditswe na Bukuru JC
Kuya 20 Gashyantare 2020 saa 08:54
Yasuwe :
0 0

Inyungu ya Radisson Blu Kigali, ari nayo ibarizwamo Kigali Convention Centre, yazamutse ku gipimo cya 18% kuva mu 2017 kugera mu 2019, bikaba byerekana ukugaruza mu ishoramari ryakozwe.

Umuyobozi Mukuru wa Radisson Blu Kigali, Denis Dernault, avuga ko uku gutera imbere kwazamuye ibijyanye n’imenyekanishabikorwa ndetse n’ubushobozi bwo gukora ubucuruzi burambye kandi bubyara umusaruro, bikaba bitanga icyizere ku hazaza.

Ati “Ni iterambere ryiza aho umufatanyabikorwa adakeneye kongera gushyiramo amafaranga ukundi. Ubu turimo kugaruza ishoramari ryatanzwe”.

Nubwo hari inyubako zo kwakira abashyitsi ndetse n’ibyumba by’inama byiyongereye ku isoko mu myaka itatu ishize, Kigali Convention Centre, yakomeje kuba ku isonga mu kwakira inama n’ibikorwa aho kuva muri Nyakanga 2016, imaze kwakira ibigera ku 1100.

Mu 2019, iterambere ryayobowe ahanini n’ibintu byinshi cyane cyane inama n’ibikorwa birenga 300 byabereye muri Kigali Convention Centre.

Ubuyobozi bwa Radisson Blu Kigali buvuga ko iterambere rigaragara ari umusaruro w’imbaraga zikoreshwa n’ikigo Radisson Hotel Group, zituma idasubira inyuma ndetse n’imenyekanishabikorwa rihamye.

Dernault avuga ko imbaraga zikoreshwa mu kumenyekanisha ibikorwa no gucuruza, twavuga nko kwitabira amamurika mpuzamahanga y’ubucuruzi bisigasira isura ya hoteli n’aho gukorera inama kandi abakiriya bashya bakerekwa ahantu hadasanzwe bakeneye kugana binyuze mu kwamamaza.

Radisson Blu Kigali kandi ifitanye imikoranire na Rwanda Convention Bureau, mu gutanga inama za kinyamwuga zijyanye n’imiterere y’ibikorwa bizabera muri Kigali Convention Centre, bigafasha mu migendekere myiza yabyo.

Iterambere rya Radisson Blu Kigali, kandi ryanagize uruhare mu zindi nzego z’ubukungu bw’igihugu, aho nk’abatwara abantu, abakora mu myidagaduro, restaurants, utubari n’ibindi bikenerwa n’abashyitsi babyungukiyemo.

Muri uyu mwaka wa 2020, Radisson Blu Kigali izakirana inama zikomeye zirimo iy’Abakuru b’Ibihugu na za Guverinoma bo mu Muryango w’ibihugu bikoresha Icyongereza, Commonwealth n’ibindi.

U Rwanda ruri ku mwanya wa kabiri nk’ahantu hakunzwe n’abategura inama n’ibikorwa nyuma ya Cape Town muri Afurika y’Epfo.

Inyungu ya Radisson Blu Hotel&Convention Centre yazamutse ku gipimo cya 18%

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .