Impinduka zifatika mu Mijyi yunganira Kigali zashibutse mu mwiherero w’Abayobozi bakuru b’Igihugu

Yanditswe na Ishimwe Israel
Kuya 26 Ukuboza 2018 saa 11:29
Yasuwe :
0 0

Ubukungu, imibereho myiza y’abaturage n’imiyoborere ni moteri yo guhindura imibereho y’abenegihugu. Ni yo nyabutatu, gahunda ya Guverinoma y’imyaka irindwi 2017-2024 yubakiyeho.

Muri gahunda y’Igihugu yo kwihutisha Iterambere (NST1), hakozwe igenamigambi ryo kwihutisha ibikorwa byo muri Gahunda y’Imbaturabukungu ya 2 (EDPRS 2) n’ibisigaye mu Cyerekezo 2020 mu kuzamura imibereho y’abenegihugu.

Mu myanzuro 26 y’Umwiherero wa 14 w’Abayobozi b’Igihugu wo mu 2017, uwa 10 wagarutse ku guteza imbere ibikorwa bizamura imijyi yunganira uwa Kigali kandi aho bishoboka hagashyirwa ibyicaro by’inzego n’ibigo bya Leta.

Imijyi itandatu yatoranyijwe hibandwa ku turere irimo, iterambere n’umutungo wihariye ifite n’ahazaza hayo mu kubaka ubukungu burambye irimo uwa Huye, Muhanga, Musanze, Nyagatare, Rubavu na Rusizi.

Mu kwihutisha iyaguka ry’iyi mijyi, umwanzuro wa karindwi w’Umwiherero wa 15 w’Abayobozi bakuru b’Igihugu wateranye kuva ku wa 26 Gashyantare kugeza ku wa 1 Werurwe 2018, ku guha imbaraga ibikorwa remezo, kuhashyira ibyicaro by’ibigo bya Leta haherewe ku byari bihasanzwe n’ishyirwaho ry’inzego zishinzwe imicungire y’imijyi.

Umujyi wa Musanze wahariwe ubukerarugendo n’ubuhinzi n’ubworozi bwa kijyambere mu gihe Rubavu ihana imbibi na Goma muri Repubulika Iharanira Demokarasi ya Congo (RDC) ikungahaye ku bukerarugendo, ingufu zituruka kuri gaz methane iva mu Kiyaga cya Kivu n’ubucuruzi bwambukiranya umupaka.

Nyagatare yo ifite umwihariko mu kuzamura ubucuruzi bwo mu Muhora wa Ruguru buhuza ibihugu birimo Kenya, Uganda, Rwanda, Burundi, RDC, na Sudani y’Epfo. Inazwi cyane mu bworozi butanga inyama n’amata.

Rusizi ihana imbibi n’Ikiyaga cya Kivu n’ibihugu bibiri birimo u Burundi na RDC yitezweho uruhare nk’umujyi uzafasha mu bucuruzi bwambukiranya umupaka.

Umujyi wa Muhanga uri mu gihugu hagati ni ikigega cy’u Rwanda gishobora kubikwamo ibicuruzwa mbere yo koherezwa ku masoko arimo n’ayo hanze y’igihugu.

Kubera ibikorwaremezo byashyizwe mu mijyi yunganira Kigali, byatumye itangira guturwa cyane. Aha ni Maranyundo, kamwe mu tugari tugize Umujyi wa Nyamata mu Karere ka Bugesera

Ibigo bitanu bya Leta mu nzira zigana mu ntara

Itsinda rigizwe n’intiti ziturutse muri Minisiteri y’Ibikorwa remezo (Mininfra), iy’Abakozi ba Leta n’Umurimo (MIFOTRA), iy’Ubutegetsi bw’Igihugu (MINALOC), Ikigo cy’Igihugu gishinzwe Imiturire (RHA) n’icy’Iterambere (RDB) n’Urwego rw’Igihugu rw’Imiyoborere (RGB) zize ku kwimurira ibigo bya leta mu mijyi yunganira uwa Kigali.

Ingingo zashingiweho zirimo intego n’icyerekezo cy’ikigo ugereranyije n’imirimo y’ingenzi ikorerwa mu mujyi hitawe ku bikorwa remezo bihari, serivisi zihatangirwa n’ibindi.

Nyuma yo gusuzuma no gusura iyi mijyi harebwa uko yiyubatse, iri tsinda ryatanze ibigo bitanu bizimurwa mu cyiciro cya mbere. Inyigo yakozwe isigaje kwemezwa na Guverinoma.

Mu kwihutisha uyu mushinga hari ibigo byasubijwe aho byakoreraga birimo amashami ya Kaminuza y’u Rwanda yasubijwe mu Karere ka Huye.

Ibikorwa remezo byatangiye gushinga imizi

Kuva mu 2016, u Rwanda rubifashijwemo na Banki y’Isi rwatangiye kubaka imihanda yo mu mijyi yunganira Kigali.

Ni umushinga witezweho guhindura imibereho y’abayituye binyuze mu guhanga imirimo mishya, iterambere ry’ubukungu, gutuza abaturage neza, kuzamura imikoranire n’urwego rw’abikorera n’ibindi.

Icyiciro cya mbere cy’uyu mushinga cyasojwe muri Nzeri 2018, hubatswe imihanda ireshya n’ibilometero 28.1 na ruhurura z’ibilometero 13.25.

Uyu mushinga watangiye muri Kamena 2016, uzasozwa muri Nyakanga 2021. Hari gukorwa inyigo y’icyiciro cya kabiri, aho biteganyijwe kuzubakwa imihanda y’ibilometero 40 hibandwa ku igana mu byanya byahariwe inganda.

Iki cyiciro kandi kizaha umwihariko ku kuvugurura ahantu hatuwe mu buryo bw’akajagari mu mirimo izatangira mu ngengo y’imari y’umwaka utaha. Ibikorwa remezo byo muri iyi mijyi, uwa Kigali n’indi iwukikije nabyo bizitabwaho byihariye.

Indi mishinga iri gushyirwa mu bikorwa yitezweho kwagura ubukungu irimo ishyirwa mu bikorwa ku bufatanye na Banki Nyafurika Itsura Amajyambere (AfDB) mu gusakaza imiyoboro y’amazi mu mijyi ine yunganira Kigali n’Ikigo cy’Ababiligi gishinzwe guteza imbere ubufatanye (Enabel) ishyigikira iterambere ry’imibereho myiza n’ubukungu mu Mijyi ya Rubavu, Musanze na Rwamagana.

U Rwanda rwihaye intego yo kuzamura ubukungu bwarwo bukava mu bihugu bikennye rukagera mu biyingayinga ibikize mu 2035 no kugera mu bikize mu cyerekezo cya 2050.

Ni iterambere rizagerwaho binyuze mu kuzamura imirimo idashingiye ku buhinzi ihangwa no kugira umuco wo kwizigamira.

Muri iki cyerekezo hashyizwe imbaraga mu gushyiraho uduce twahariwe inganda mu gukurura abashoramari bakomeye mu bijyanye n’inganda.

Ku ikubitiro hatangijwe Igice cyahariwe inganda mu Mujyi wa Kigali (Special Economic Zone). Inyubako zihabarizwa zafashwe n’ibigo bikomeye bizazikoreramo.

Guverinoma yahise inatangiza ibice byahariwe inganda mu mijyi yunganira Kigali, binitezweho kuzafasha igihugu guhanga imirimo minshi idashingiye ku buhinzi no gutanga akazi ku bantu benshi. Bugesera Industrial Park ni yo iheruka gutangazwa nk’iya kabiri mu Rwanda.

Imijyi ya Musanze, Huye na Rusizi, yabonye ubutaka izubakaho ndetse hari imirimo yatangiye mu gihe i Muhanga, Rubavu na Nyagatare kwimura abaturage bitarasozwa.

I Nyagatare, ishoramari ry’abikorera ririmo Uruganda rw’Amakaro rwa East African Granite Industries rwahashinze imizi mu gihe i Musanze, hari kubakwa uruganda rwa Sima biteganyijwe ko ruzatangira muri Kamena 2019.

Indi nkuru wasoma: Imbaraga zabibwe mu mijyi yunganira Kigali mu guhindura ubuzima bw’abayituye (Amafoto)

Musanze imaze kwiganzamo ibikorwaremezo bishobora kuyemerera kwakira inama mpuzamahanga
Umujyi wa Muhanga uri mu yunganira Kigali ukataje mu iterambere
Mu Mujyi wa Nyagatare hubatswe imihanda ireshya n’ibilometero bine na ruhurura zireshya na metero 200
Ibikorwaremezo ni kimwe mu byashyizwemo ingufu muri iyi gahunda
Umujyi wa Rusizi umaze gutera imbere mu bikorwaremezo
Mu Karere ka Rusizi hubatswe imihanda ireshya na kilometero 4 na metero 632, yatwaye asaga miliyari 4 na miliyoni 538 Frw
Muri iyi gahunda yo guteza imbere imijyi yunganira Kigali, udukiriro ni kimwe mu byashyizwemo imbaraga
Uruganda rw’ibibiriti, SORWAL (Société Rwandaise des Allumettes) ruri mu Karere ka Huye rugiye kongera gutangira imirimo yarwo nyuma y'igihe rudakora. Binajyanye n'imbaraga zashyizwe mu guteza imbere aka karere
Mu bice bitandukanye by'igihugu hubatswe za ruhurura zitwara amazi ku buryo adashobora kwangiriza abaturage
Mu bice bitandukanye b'igihugu nta mwijima uharangwa kubera ibikorwaremezo by'amashanyarazi
Kaminuza y’u Rwanda ni kimwe mu bigo bya Leta byafashe iya mbere bikongera gushyira imbaraga mu bikorwa byakorerwaga mu mijyi itari Kigali nyuma yo kwimurira amashami amwe n’amwe i Huye
Mu Karere ka Musanze habarizwamo imihanda ya kaburimbo ireshya n’ibilometero 77,7
Abatuye Nyagatare bagenda batikandagira ku bw'umuhanda bubakiwe
Iterambere rigaragara i Nyagatare ugana mu mujyi rwagati
Umujyi wa Nyagatare uri mu yunganira uwa Kigali
Umujyi wa Rubavu ugenda waguka mu mfuruka zose

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .