00:00:00 IGIHE NETWORK KN KINYARWANDA EN ENGLISH FR FRANCAIS

Imishinga ikomeye yavuye mu byifuzo by’abaturage iri mu ngengo y’imari ya 2022/2023

Yanditswe na Ntabareshya Jean de Dieu
Kuya 19 August 2022 saa 12:14
Yasuwe :

Guhera tariki ya 1 Nyakanga, u Rwanda rwatangiye umwaka mushya w’ingengo y’imari, aho mu mezi 12 hazakoreshwa miliyari 4658 Frw mu mishinga n’ibikorwa bigamije guteza imbere imibereho myiza y’abaturage hagendewe ku byifuzo byabo.

Minisiteri y’Imari n’Igenamigambi iherutse kumurika udutabo dukubiyemo imishinga ihanzwe amaso mu turere dutandukanye hagendewe ku byifuzo by’abaturage.

Ni udutabo dukorwa mu rwego rwo guha rugari abaturage n’uburenganzira bwo kubaza abayobozi ku bibakorerwa n’impamvu bimwe mu byo baba biyemeje gukora bitagezweho.

Umuyobozi w’Ishami rishinzwe Ingengo y’Imari ya Leta muri Minisiteri y’Imari n’igenamigambi, Reheema Namutebi, yagaragaje ko kugaragaza ibikorwa bizakorwa mu mwaka runaka ari uguha umwanya umuturage mu bimukorerwa no kumwereka niba koko ibyifuzo bye byaratekerejweho.

Mu mishinga ihanzwe amaso harimo ishingiye kuri gahunda ya guverinoma y’imyaka irindwi (NST1), ahateganyijwemo umushinga wa miliyari 26,4 Frw wo kubaka ibikorwaremezo bitandukanye birimo imihanda izafasha mu kugeza umusaruro w’ubuhinzi ku isoko.

Hari kandi umushinga wo kubaka ibigega by’ibikomoka kuri petiroli bya litiro miliyoni 60 bizubakwa i Rusororo bizatwara asaga miliyari 14,2, uwo gushyira amatara ku mihanda yo ku rwego rw’igihugu n’akarere bizatwara asaga miliyari 21,3 Frw, imishinga yo kugeza amashanyarazi kuri bose n’iyindi.

Mu nkingi yo guteza imbere imibereho myiza hateganyijwemo imishinga ikomeye irimo uwo kurwanya virusi itera Sida uzatwara asaga miliyari 57,9 Frw, kubakira ubushobozi Minisiteri y’Ubuzima mu kurwanya Sida uzatwara miliyari 22,8Frw.

Hari uwo kugeza amazi meza n’ibikorwa by’isuku n’isukura mu buryo burambye mu mujyi wa Kigali uzatwara asaga miliyari 34,9 Frw.

Hari kandi indi mishinga ikomeye yitezweho kuzamura imibereho myiza, muri yo harimo uwo kurwanya Covid-19 uzatwara miliyari 26,6 Frw, guteza imbere imibereho myiza bitware asaga miliyari 31,2 Frw, umushinga ugamije guteza imbere impunzi n’abaturiye inkambi wa miliyari 19,8 Frw.

Nko mu rwego rw’imiyoborere harimo imishinga itandukanye irimo uwo kubaka ibikorwaremezo mu rwego rw’umutekano wa miliyari 21,7 Frw, gusana inyubako za Leta uzatangwaho miliyari 8,5 Frw n’ibindi.

Ibikorwa bishingiye ku byifuzo by’abaturage

Umujyi wa Kigali

Umujyi wa Kigali ugizwe n’uterere dutatu, Gasabo Kicukiro na Nyarugenge, ni wo wagenewe ingengo y’imari nini kuko isaga miliyari 66 Frw, azifashishwa mu kubaka ibikorwaremezo binyuranye birimo imihanda n’ibindi.

Bigendanye n’ibyifuzo by’abaturage mu Mujyi wa Kigali, mu gice kibanza cy’ingengo y’imari wateganyirijwe kubaka za ruhurura zizatwara asaga miliyari imwe y’amafaranga y’u Rwanda.

Umushinga wo kubaka ibikorwaremezo by’imihanda mu mujyi wa Kigali igice cya kabiri kizatwara asaga miliyari. Kubaka imihanda yo mu byifuzo by’abaturage mu mujyi wa Kigali bizatwara miliyari 13 Frw no guteza imbere ubuhinzi kuri miliyoni 823 Frw.

Umujyi wa Kigali ugiye kubaka ibilometero bigera kuri 70 by'imihanda izahuza uduce dutandukanye

Nyagatare

Aka ni ko Karere ka mbere gafite ingengo y’imari nini kuko kagenewe asaga miliyari 31 Frw agomba kwifashishwa mu bikorwa bitandukanye bigamije iterambere ry’umuturage.

Mu mishinga iri ku ikubitiro muri aka karere harimo uwo guteza imbere ubuhinzi uzatwara 831.687.490 Frw, gusana amariba 30 bizatwara 816,989,685 Frw, kubaka Stade ya Nyagatare bizatwara asaga miliyari 1,3 Frw ndetse n’umushinga wo kubaka ibagiro rigezweho rizatwara asaga miliyari 4 Frw.

Stade ya Nayagatare iri mu bizatwara amafaranga mu ngengo y'imari y'uyu mwaka mu rwego rwo kuyisana

Nyamasheke

Nyamasheke ni kamwe mu turere two mu Burengerazuba bw’u Rwanda, kakaba akarere kari mu dufite ibikorwaremezo bike ugereranyije n’utundi kuko iyo bigeze mu rwego rw’amahoteli bigoye cyane muri aka karere.

Uyu mwaka w’ingengo y’imari kagenewe asaga miliyari 26 Frw yo kwifashisha mu bikorwa bitandukanye.

Minisiteri y’Imari n’Igenamigambi yatangaje ko imwe mu mishinga yihutirwa aka karere kagomba guhita gatangira gushyira mu bikorwa harimo umushinga wo guteza imbere ubuhinzi witezweho gutwara asaga miliyari imwe y’amafaranga y’u Rwanda.

Hari kandi umushinga wo gutanga akazi ku miryango itishoboye muri gahunda y’imirimo rusange aho igera ku 5867 igomba guhabwa imirimo binyuze mu gusana imihanda ifite ibirometelo 361,8 bikazatwara nibura miliyoni 525,4 Frw.

Hari kandi gutanga inkunga y’ingoboka ku miryango itishoboye ingana 849.531.928Frw no kubaka ibikorwaremezo by’amashuri no gutanga ibikoresho biteganyirijwe asaga 575.019.637 Frw.

Musanze

Muri aka Karere abaturage batanze ibyifuzo binyuranye kandi muri byo iby’ingenzi bigomba guhita bitangira gukorwaho muri uyu mwaka w’ingengo y’imari.

Mu bigiye gukorwa harimo guteza imbere ibikorwaremezo by’ubuhinzi binyuze mu gutanga ifumbire n’imbuto z’indobanure nk’akarere gakungahaye ku musaruro w’ubuhinzi bikazatwara nibura miliyari 3,3 Frw.

Gusana imihanda mu Mujyi wa Musanze wagenewe asaga miliyoni 725,3 Frw, gukora amaterasi y’indinganire n’imirwanyasuri byagenewe 892.000.000 Frw mu gihe gutanga inkunga y’ingoboka mu kurwanya imirire mibi bizatwara 986.402.980 Frw.

Mu bizakorwa mu Karere ka Musanze muri uyu mwaka w'ingengo y'imari harimo gusana imihanda yo mu Mujyi

Gicumbi

Akarere ka Gicumbi kagenewe asaga miliyari 26 Frw, kuri ubu karajwe ishinga no kubona amazi meza no kuyakwirakwiza mu mushinga uzatwara miliyari imwe y’amafaranga y’u Rwanda.

Hari gahunda yo gutanga inkunga y’ingoboka ku miryango itishoboye 500.671.976 Frw n’uwo guhanga imirimo ku baturage baturiye umupaka binyuze mu gusana imihanda byagenewe asaga miliyari 1 Frw.

Hari kandi umushinga wo guteza imbere ibikorwaremezo by’ubuhinzi bigomba gutwara asaga 1,2 Frw.

Gatsibo

Bigendanye n’imiterere y’aka karere ko mu Burasirazuba bw’Igihugu abaturage bifuje ko hazubakwa ibikorwaremezo by’amazi ari nabyo byashyizwe ku ruhembe bikazatwara asaga 1.436.831.022 Frw.

Abaturage bo muri aka Karere kandi bahanze amaso ubuhinzi ari nayo mpamvu hateganyijwe umushinga wo guteza imbere ubuhinzi binyuze muri gahunda ya twigire muhinzi mworozi yagenewe hafi miliyari 2 Frw.

Ubuyobozi bw’Akarere ka Gatsibo kandi bugaragaza ko hari umushinga wo kwimura abantu mu manegeka wateganyirijwe 464.649.117 Frw no gukenura abatishoboye muri gahunda yo gutanga inkunga y’ingoboka ku miryango itishoboye bizatwara asaga 540 Frw.

Gatsibo nayo iri mu turere twagenewe ingengo y’Imari isa naho iri hejuru kuko kagenewe asaga miliyari 25,9 Frw

Rusizi

Bimwe mu byibanze akarere ka Rusizi gafite ni ukubaka ibiro by’ako cyane ko ari ikcyifuzo cyakunze kugarukwaho n’abaturage mu bihe bitandukanye uyu mushinga ukazatwara asaga miliyoni 743,3 Frw .

Hari kandi umushinga wo kubakira abarokotse Jenoside yakorewe abatutsi batishoboye wagenewe agera kuri miliyari 1 Frw, guteza imbere ubuhinzi bigenerwa miliyari 1,3 Frw ndetse no kubaka umuhanga wa Karambo ufite ikilomero 1,87 bikazatwara asaga miliyoni 775,6 Frw.

Bugesera

Akarere ka Bugesera niko karongoye utundi mu ngengo y’Imari kazakoresha kuko kagenewe asaga miliyari 4, 5 Frw.

Imwe mu mishinga ikomeye ihanzwe amaso muri aka karere harimo umushinga wo kubaka umuhanda wa cipu siri (Chip seal) mu mujyi wa Nyamata ungana n’ibirometero bitatu uzatwara asaga miliyari, kubaka inzu 35 mu mudugudu w’icyitegererezo wa Rweru bikazatwara miliyari 1 Frw.

Hari kandi umushinga wo kubaka stade ya Bugesera 1.333.333.333 Frw n’uwo guteza imbere ubuhinzi 1.139.851.645 Frw.

Kayonza

Muri aka karere hari umushinga ugamije guteza imbere no kubungabunga umusaruro w’ubuhinzi, aho hazubakwa ubwanikiro 10 bufasha kubika neza umusaruro buzatwara 2,109,282,500 Frw, gutanga inkunga y’ingoboka ku miryango itishoboye byagenewe asaga 430.777.838 Frw.

Gutanga ibikoresho n’amatungo ku miryango itishoboye 392.271.153 Frw no kubaka ibikorwaremezo by’Akarere ka Kayonza byagenewe 456.771.853 Frw.

Kirehe

Muri aka Karere hateganyijwe gukorwa umushinga wo gusana umuhanda wa Nganda-Kigarama-Rwanteru ufite ibirometero 20 ukazatwara 7.417.021.816 Frw.

Hari kandi mushinga wo kubakira abarokotse jonoside yakorewe abatutsi batishoboye inzu 20 bizatwara 527.580.055 Frw, gusana no kwagura umuyoboro w’amazi wa Gakirarugo mu murenge wa Nyamabuye 646.158.272 Umushinga wo guteza imbere ubuhinzi wa 790.534.960Frw.

Uko uturere twasaranganyijwe ingengo y'imari y'uyu mwaka
Mu ngengo y'imari y'uyu mwaka ibyifuzo by'abaturage byashyizwe imbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .