Imihigo y’abatsinze muri Miss Career Africa nyuma yo guhabwa amafaranga ngo bashyire mu bikorwa imishinga yabo

Yanditswe na Uwiduhaye Theos
Kuya 21 Kamena 2020 saa 04:42
Yasuwe :
0 0

Abakobwa begukanye amakamba muri Miss Career East Africa mu 2019 bahawe amafaranga batsindiye bagaragaza ibyishimo ariko banavuga ko bagiye gukabya inzozi bahoranye kuva kera.

Mukamwiza Yvette wabaye Miss Career Africa 2019 akegukana n’ikamba rya Miss Technology yahawe $6000 asaga miliyoni 5 500 ooo Frw , yavuze ko agiye gukora ibizafasha abiganjemo urubyiruko.

Ati “Nyuma yo kubona aya mafaranga ngiye gutangira gukora ku mushinga wanjye nereke Isi yose uko umugore turi abanyembaraga kandi ko bagomba guha agaciro ibyo dukora. Nshaka gutanga akazi ku rubyiruko ubwo nzaba natangije business yanjye ndetse nshaka kubaka umuyoboro mwiza ku bahanga udushya.”

Umushinga we ujyanye no kubungabunga ikirere no gusigasira ibidukikije.

Yavuze ko aya mafaranga azamufasha kuko agiye gutangira gukabya inzozi ze. Yabwiye abandi bazahatana uyu mwaka muri Miss Career Africa 2020 ko bagomba gukomeza inzozi zabo kuko bazaba bari mu maboko meza azabafasha kuzikabya.

Habonimana Hyacinthe wo mu Burundi wabaye Miss Entrepreneur yahawe $ 1000 ( asaga ibihumbi 900 Rwf). Yavuze ko n’ubundi asanzwe afite ikigo gitunganya imyambaro y’imbere.

Akomeza agira ati “Nabihisemo kuko namenye ko byakunguka hano mu Burundi. Amafaranga nahawe agomba guhindura ubuzima bwanjye kuko ubu nahindutse umushabitsikazi.”

Miss Speaker muri iri rushanwa, Munezero Ornella nawe wo mu Burundi yahawe $1000. Yavuze ko ubu nta rwitwazo afite kuko yamaze kubona igishoro cyo gukora ibyo yahoze atekereza ariko akabura uko abishyira mu bikorwa.

Uyu we amaboko ye yayerekeje mu bworozi. Yavuze ko nyuma yo gushyikirizwa amafaranga bigiye kumufasha.

Ati “Nishimye, nka rwiyemezamirimo ukiri muto byabaye nk’inzozi zibaye impamo, ubu nta rwitwazo nzongera kugira. Ngiye gutangira umushinga w’ubworozi.”

Yavuze ko ashaka kubanza korora nyuma akazashora amafaranga n’ubundi muri uyu mushinga we wa mbere.

Umunyarwandakazi Mahoro Mireille Chadia wabaye Miss Science agahembwa $1000, na we yavuze ko yishimiye kubona amafaranga ye akaba agiye gushyira mu bikorwa ibyo yahoze yifuza kuva kera.

Ati “Kuva mu bwana bwanjye, nari mfite inzozi zo kuba rwiyemezamirimo nkikorera, aya mafaranga agiye kubimfashamo gutangiza kompanyi yanjye.”

Uyu mukobwa azakora ibijyanye n’amashanyarazi cyane ko ari nabyo yiga muri IPRC Kicukiro.

Umuhumuriza Mpano Yvonne wo mu Rwanda wabaye Miss Hospitality 2019 yavuze $1000 agiye kuyifashisha mu mushinga we kandi akaba yizera ko bizamufasha we ubwe ndetse n’abandi benshi.

Iradukunda Faustine wo mu Rwanda wabaye Miss art nawe yahawe $1000. Agiye kuyashora mu mushinga we ujyanye no gukora ibirungo by’ubwiza.

Ati “Nahisemo uyu mushinga kuko zahoze arizo nzozi zanjye kuva kera. Amafaranga azaba ari nk’ikintu kinsunika kikangeza aho nshaka kugera.”

Miss Career Africa yatowe mu Ukuboza umwaka ushize, ariko amafaranga bayabonye muri Kamena 2020. Ngo byatewe n’uko hari ibyo basabwaga kubanza gukora birimo kwandikisha imishinga yabo mu buryo bwemewe gufunguza konti z’imishinga yabo ndetse no kunoza neza imishinga yabo aho izakorerwa n’ibisabwa.

Uyu mwaka nabwo hateganyijwe irushanwa rya Miss Career Africa rizahuza abakobwa bo ku mugabane wose wa Afurika bafite imishinga myiza kurusha indi, rikazabera mu Rwanda mu mpera z’umwaka.

Habonimana Hyacinthe wo mu Burundi wabaye Miss Entrepreneur agiye gushyira imbaraga mu gukora imyambaro y'imbere
Miss Art Faustine Iradukunda ufite umushinga ujyanye no gukorera make up abakina filimi n'abahanzi yavuze ko agiye gukabya inzozi ze
Mukamwiza Yvette wabaye Miss Career Africa 2019 amaboko ye agiye kuyerekeza mu kurengera ibidukikije
Mukamwiza Yvette yabaye Miss Career East Africa 2019 abikesheje inkoni yakoze y'abatabona ivuga iyo hari ikintu kiri imbere gishobora kubangamira uyifite
Mukwamwiza Yvette yabaye Miss Technology ndetse yegukana n'ikamba rya Miss Career Africa
Munezero Ornella wo mu Burundi agiye kwerekeza mu bworozi
Umuhumuriza Mpano Yvonne wabaye Miss Hospitality yavuze ko agiye guhindura ubwe n'ubw'abandi
Umunyarwandakazi Mahoro Mireille Chadia wabaye Miss Science yavuze ko agiye gushyira mu bikorwa ibyo yahoze yifuza kuva kera

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .