00:00:00 IGIHE NETWORK KN KINYARWANDA EN ENGLISH FR FRANCAIS

Imbamutima z’abamotari bize Kaminuza

Yanditswe na Nsanzimana Erneste
Kuya 31 May 2022 saa 12:28
Yasuwe :

Mu gihe hakigaragara abarangije amashuri bahitamo kwicara iwabo aho gukora imirimo y’amaboko, abafite impamyabumenyi za kaminuza bahisemo kujya mu mwuga wo gutwara moto, basanga ntawe ukwiye gusuzugura imirimo y’amaboko kubera amashuri.

Abamotari barangije kaminuza baganiriye na IGIHE bavuga ko bicuza igihe bataye babungana impapuro zisaba akazi kuko ntacyo byabagejejeho.

Uwimpuhwe Dieudonné yarangije muri kaminuza y’u Rwanda mu 2014, muri Science Politique et Administrative. Amahirwe yagize ntiyarambye kuko yahise abona akazi, nyuma y’imyaka itatu, karahagarara.

Akazi kamaze guhagarara, yamaze imyaka itatu ashakisha akandi nyamara agafite atabizi.

Ati “Ubu ndabyicuza kuko iyo myaka nayicaye mfite categorie ya moto ariko ntazi ko ngiye ngakora hari icyo nabona. Nabonaga abantu batwara abantu kuri moto ariko ntazi ikivamo”.

Uyu mumotari ukorera mu Murenge wa Rubengera mu Karere ka Karongi, avuga ko mu myaka itatu amaze yeguye uruhushya rwo gutwara ipikipiki, amaze gukora ibikorwa bifatika, bifite agaciro ka miliyoni eshatu.

Ati “Moto nari nayifashe ku ideni nyigura ari nshya, ubu umwenda wamaze kwishyurwa. Mfite ibintu nagiye nkora birimo nko gusana inzu, kwishyura amashuri y’abana, mfite n’indi moto itari nshya yavuyemo, ubiteranyije muri iyo myaka itatu byagera nko muri miliyoni nk’eshatu”.

Uwimpuhwe, avuga ko kuba ari mu kimotari yarize kaminuza bituma hari amahirwe asumbya abandi bamotari, kuko Karongi ari umujyi w’ubukerarugendo, hakunze kuboneka abagenzi b’abanyamahanga.

Ati “Kuba warize ni amahirwe kuko nkanjye hari abo ntwara bavuga izindi ndimi nkabafasha nkabayobora. Barampamagara kugira ngo mbageze aho bagera tuvugana, rimwe na rimwe nkamuhuza n’umuturage akambwira mu rurimi yumva, umuturage nkamusobanurira mu rurimi rwacu rw’Ikinyarwanda”.

Uyu mumotari agira abarangije kaminuza inama yo kudategereza akazi kuko akazi katazagera ku bize bose, ahubwo bagashaka ukundi babyaza umusaruro ubumenyi bakuye ku mashuri.

Ati “Nk’uko nakubwiye ko n’abo banyamahanga ntwara, urumva ni bwa bumenyi nakuye mu ishuri mba ndikubyaza umusaruro. Ikimotari ni umwuga utanga umusaruro, umusaruro twese tuba dukeneye ni amafaranga”.

Ngabonziza Djuma, na we ni umumotari warangije kaminuza muri 2014, kuri ubu atwara moto mu karere ka Rulindo.

Yarangije kaminuza mu isomo rya industrial installation amara imyaka ibiri asaba akazi aza kugera aho abona ko ari guta igihe niko gushaka uruhushya rwo gutwara moto yinjira mu kimotari atyo.

Yatangiye gutwara moto muri 2016, ari umusore, ashaka umugore ari mu bukode, ubu yubatse inzu y’amabati 46 iteye umucanga na sima, atunze inka ndetse anafite n’amatungo magufi.

Ati “Umuntu ugitegereje ko azabona akazi ka Leta ari mu buyobe bukaze kuko uko tugomba kubaho muri iki gihugu, muri iyi minsi birasaba ko dukura amaboko mu mufuka, naho kwirirwa tubungana impapuro byo nta kintu bizigera bitugezaho”.

Ngabonziza avuga azi benshi barangije kaminuza bamaze imyaka birirwa basaba akazi, ari nako babitakarizamo amatike, nyamara ugasanga bavuga ko babuze igishoro ngo bikorere.

Ati “Imyitwarire myiza n’ubunyangamugayo, nicyo gishoro cya mbere, birashoboko ko udashobora kubona amafaranga yo kugura moto aka kanya, kuko igeze kuri miliyoni ebyiri, ariko birashoboka ko ushobora kwegera abafite ayo mafaranga ukayipatana ugakora uyishyura igihe kikazagera ikaba iyawe”.

Ngabonziza avuga ko ubundi buryo bwo kubona moto ukwegera abafite amafaranga, b akaguha moto mukumvikana amafaranga uzajya utanga mu cyumweru, hanyuma kuyo usaguye ukajya wizigama.

Ntibyoroshye kumenya umubare w’abakora ikimotari bararangije kaminuza, kuko abenshi ntibakunda kubigaragaza nk’uko bivugwa na Mbabazi Jean Claude, wahoze ari umuyobozi w’imwe mu makoperative z’abamotari bakorera mu karere ka Karongi.

Mbabazi Jean Claude yabwiye IGIHE ko ashima abarangije kaminuza bafashe icyemezo cyo kujya mu mirimo y’amaboko kuko nta nyungu iri mu gusuzugura bene iyi mirimo.

Ati “Dukurikije aho ibintu bigeze, abantu benshi bakagombye kuba bashishikajwe no kwihangira imirimo, aho gutekereza gusaba akazi hirya no hino, ahubwo hagombye kuba bavuga ngo ni gute njye natanga akazi. Abarangije kaminuza bakora ikimotari nkanjye ku giti cyanjye ndabashimira icyemezo bafashe kuko nanjye iyo mbabo niko nari kubigenza”.

Imibare y’ikigo cy’igihugu cy’ibarurishamibare NISR yashyizwe ahagaragara muri 2020, igaragaza ko mbere gato ya COVID-19 ubushomeri mu Banyarwanda bwari kuri 13%.

Abamotari bize Kaminuza bavuga ko guhuza ubumenyi bahawe n'akazi bakora bibafasha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .