Igishushanyo mbonera gishya cy’ubutaka: Ubuso bw’imijyi buzongerwa, Intara ebyiri ziharirwe ubuhinzi

Yanditswe na Ferdinand Maniraguha
Kuya 27 Mutarama 2020 saa 08:58
Yasuwe :
0 0

Igishushanyo mbonera cy’imikoreshereze y’ubutaka cyitezweho kugeza u Rwanda mu cyerecyezo 2050, kirimo amavugurura menshi nk’aho ubuso imijyi iriho buzongerwa, intara zimwe zikagenerwa by’umwihariko ubuhinzi mu gihe uburyo bw’imiturire buzanozwa.

Mu 2050, u Rwanda rwiyemeje kuba mu bihugu biteye imbere ku Isi aho umunyarwanda azaba yinjiza amadolari 12476 ku mwaka. Ni inzira igoye ariko ishoboka kandi uburyo bwose bwakoreshwa, imikoreshereze y’ubutaka igomba kubigiramo uruhare.

Ubutaka ni umwe mu mitungo igihugu gifite itarakunze kuvugwaho rumwe mu buryo ikoreshwa cyane cyane mu bijyanye n’ubwubatsi ndetse n’ubuhinzi.

Igishushanyo mbonera cy’ubutaka cyemejwe mu 2011, cyagombaga kubahirizwa kikageza u Rwanda mu 2020 ariko nticyubahirijwe uko bikwiriye.

Kuva mu Ugushyingo 2019, Ministeri y’Ibidukikije ibinyujije mu kigo gishinzwe imicungire n’imikoreshereze y’ubutaka mu Rwanda (RLMUA) batangije ku mugaragaro kuvugurura igishushanyo mbonera cy’imikoreshereze y’ubutaka cyo ku rwego rw’igihugu gisimbura icyo mu 2011.

RLMUA itangaza ko icyo gishushanyo mbonera kirimo gutegurwa kigeze ku rwego rwa nyuma rwo kwemezwa.

Ikigo gishinzwe imicungire n’imikoreshereze y’ubutaka mu Rwanda cyatangaje ko igishushanyo mbonera gishya kizagaragaramo impinduka zijyanye n’icyerecyezo gishya cya 2050 kimwe n’ibisubizo ku mpungenge z’inzego zitandukanye haba mu miturire, ubuhinzi n’ibindi.

Ubuso bw’imijyi buzongerwa

Mu bijyanye n’imiturire, igishushanyo mbonera gishya kizagaragaza ibyiciro by’imijyi bigera kuri bitanu hashingiwe ku mubare w’abaturage na servise zizaba zikenewe mu guteza imbere imibereho y’abatuye imijyi bazaba bageze ku kigero cya 70 % y’abanyarwanda bose muri 2050, bavuye kuri hafi 20 % bayituye ubu.

Hateganyijwe ko Umujyi wa Kigali uzakomeza kuba umujyi mukuru kandi munini. Mu rwego rwo kwirinda ko wakomeza kuba ari wo mujyi ukomeye gusa , igishushanyo mbonera cyagaragaje indi mijyi ifite ubushobozi bwinshi bwo gutera imbere.

Aho harimo imijyi ya Muhanga, Nyamata na Rwamagana. Hari kandi imijyi umunani yegereye imipaka izarushaho kuzamuka ariyo Nyagatare, Musanze, Rubavu, Karongi, Rusizi, Huye, Kirehe na Kayonza.

Hagaragaramo n’uburyo indi mijyi mito hirya no hino mu gihugu izakomeza gutezwa imbere bivuye ku bucuruzi ahanini bushingiye ku buhinzi.

Ikindi kintu gishya kiri mu gishushanyo mbonera, ni uko ubuso imijyi iriho ubu bungana na 12% by’ubuso bw’igihugu bugomba kongerwa bukagera kuri 16%.

Ibyo bizajyana kandi n’uko 30 % by’abaturage bazaba basigaye mu cyaro bazatura kuri site nke, zikava kuri site z’imidugudu 13 000 zigasigara zitarenga ibihumbi bine.

Buri mujyi uzaba ufite ubwoko bw’inzu zigomba kubakwamo hashingiwe ku bawutuye n’ubucucike.

Umuyobozi ushinzwe ishami ry’imikoreshereze y’ubutaka, mu kigo cy’ubutaka, Alexis Rutagengwa, yabwiye IGIHE ko ibyo bizafasha buri wese kumenya urwego rw’umujyi n’ibisabwa mu mibereho y’uwo mujyi bikamufasha guhitamo umujyi yabamo cyangwa yahuza n’ubushobozi bwe.

Ati “Igishushanyo kiraduha ngo, igihugu giteye imbere kigomba kuba ifite imijyi imeze ite? Kigomba kuba gifite ubuhinzi bumeze gute, inganda […] ibyo byose cyamara kubireba kikanatanga ubutaka. Ese ubwo butaka buri he? Turabufite se? Niba tutabufite turabigenza gute ngo ubuhari bukoreshwe neza?”

Mu Mujyi wa Kigali niho hazibanda inzu ndende zituwemo n’abantu mu buryo rusange kimwe no mu yindi mijyi minini, naho mu cyaro hazaba higanje inzu zifatanye zishobora guturamo abantu benshi.

Umuyobozi ushinzwe ishami ry’imikoreshereze y’ubutaka, mu kigo cy’ubutaka, Alexis Rutagengwa yavuze ko igishushanyo mbonera gishya cy'ubutaka cyitezweho kugeza u Rwanda ku cyerecyezo 2050

Mu gihe mu cyaro wasangaga urugo rumwe ruri ukwarwo, mu gishushanyo mbonera si ko bizaba bimeze. Abantu bazaba batuye hamwe, ahasigaye hahingwe hashingiwe ku bihingwa byagenewe ako gace.

Igishushanyo mbonera kandi cyagennye ubutaka n’inzira zizakoreshwa mu gutwara abantu n’ibintu harimo imihanda, inzira za gari ya moshi, imihanda yihuta n’ibindi.

Intara ebyiri zagenewe ubuhinzi by’umwihariko

Abanyarwanda basaga 60 % bakora ubuhinzi nyamara uruhare rwabwo ku musaruro mbumbe ni 30 %. Guverinoma ishaka ko umubare w’abakora uwo mwuga ugabanyuka ariko umusaruro ukiyongera kugira ngo uzabashe guhaza miliyoni 22 zizaba zituye igihugu mu 2050.

Kugeza ubu ubutaka buhingwa mu Rwanda bungana na 48% by’ubuso bw’igihugu.

Kugira ngo bigerweho, igishushanyo mbonera cyateganyije ko ubutaka bwinshi bwo guhinga bwibanda cyane mu Ntara y’Iburasirazuba no mu Majyepfo ashyira Iburasirazuba. Impamvu ni uko ariho haba ubutaka bwera kandi byoroshye kugeza uburyo bwo kuhira ku buryo hahingwa mu bihe byose.

Rutagengwa yagize ati “Ubutaka bwacu nabwo usanga ari utuntu tudatatanye. Usanga byibura buri muturage afite ubutaka butageze no ku gice cya hegitali. Ntabwo twakomeza gutyo ngo tuzagere ku cyerekezo cya 2050. Biradusaba kongera ikoranabuhanga no kuvanaho ibyabangamiraga ubuhinzi. Ka karima gato, gahuzwe n’utundi.”

Mu rwego rw’ibidukijkije n’umutungo kamere, ubutaka buteyeho amashyamba bugize 30.4% by’ubuso bw’igihugu. Biteganyijwe ko buzakomeza kubungabungwa.

Igishushanyo mbonera cy’igenamigambi ry’imikoreshereze y’ubutaka mu Rwanda kirimo gukorwa ku bufatanye n’inzobere zo muri sosiyete ebyiri zirimo Tzamir Architects and Planners Ltd yo muri Israel na Horwath Htl Intercosult Ltd yo mu Rwanda. Byitezwe ko kizasohoka mu minsi ya vuba.

Ubutaka bw'u Rwanda bugiye butatanye kubera imiturire itanoze

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .