00:00:00 IGIHE NETWORK KN KINYARWANDA EN ENGLISH FR FRANCAIS

Iby’ingenzi ukwiriye kumenya ngo ubworozi bw’ingurube bukugire umuherwe

Yanditswe na Hakizimana Jean Paul
Kuya 20 Mutarama 2023 saa 09:29
Yasuwe :

Ubworozi bw’ingurube ni bumwe mu bumaze gutera imbere cyane mu Rwanda, by’umwihariko nyuma y’aho inyama y’akabenzi ikomeje gukundwa hirya no hino.

Ni ubworozi bwunguka cyane nkuko bihamywa n’abantu batandukanye bazorora.

IGIHE yaganiriye na bamwe borora ingurube kinyamwuga ndetse bunabinjiriza inyungu iri hejuru ya miliyoni 1 Frw ku kwezi batubwira iby’ingenzi wamenya mbere yo gushora mu bworozi bw’ingurube.

Mu bya mbere bavuze kumenya ni uko muri ubu bworozi harimo abakora ubworozi bw’ingurube bugamije isoko ry’inyama, ubugamije gucuruza ibibwana byazo, ubugamije ifumbire ndetse n’ubugamije gucuruza icyororo.

Aha hose ngo washoramo imari ukunguka, ugatera imbere mu gihe wiyemeje gukora ubu bworozi ugamije gukirigita ku ifaranga.

bworozi bw’ingurube bugamije isoko ry’inyama

Ngirumugenga Jean Marie Pierre w’imyaka 44 wororera ingurube mu Karere ka Rwamagana mu Murenge wa Kigabiro, afite ingurube zirenga 1000 akuramo arenga miliyoni 1 Frw buri kwezi kubera kugurisha ingurube zijya kubagwa.

Mu kiganiro yagiranye na IGIHE, uyu mugabo yavuze ko umuturage wifuza gukora ubu bworozi bugamije isoko ry’inyama, ikintu cya mbere akora ari ugushaka icyororo cyiza, gikura vuba kandi gitanga umusaruro.

Ati “ Ikintu yakora ni ugushaka ubwoko bw’ingurube nziza zikura vuba, kuko ingurube zose ntabwo zikura kimwe. Kugira ngo zizashobora gukura vuba rero azijyane ku isoko agomba kuzigaburira neza mu gihe cy’amezi atandatu cyangwa arindwi, ibiryo by’ubwoko bwiza bigizwe n’ibinyampeke,ibinyamusogwe ndetse n’amavitamine.”

Ngirumugenga yavuze ko ingurube igaburirwa kugira ngo ijye ku isoko ry’inyama itangirira kugaburirwa mu magarama 100 ikiri nto mu gihe cy’ukwezi kumwe, ngo ijya kugera mu mezi atandatu igaburirwa ibiro 2,5 kg kugera ku biro 2,7 kg ku munsi.

Umuturage wagaburiye neza iyi ngurube ngo nibura nyuma y’amezi atandatu iba ifite ibiro 100 ikagurishwa ibihumbi guhera kuri 200 Frw kugeza kuri 220 Frw.

Yamaze impungenge abashaka kuzorora ku bijyanye n’isoko ababwira ko uretse n’isoko ry’imbere mu gihugu batari bahaza hari n’amasoko yo mu Karere ndetse no hanze.

Ubworozi bw’ingurube bugamije kugurisha ibibwana

Ku muturage wahisemo korora ingurube agamije kugurisha ibibwana nabwo bimufasha kwiteza imbere kuko bivuka ari byinshi ugasabwa kubigaburira nibura ukwezi kumwe kugira ngo utangire kubona amafaranga.

Ngirumugenga agira inama abashaka kwinjira mu bworozi bw'ingurube kujya bitonda bakabukora babuhaye umwanya aho kubushyiramo abakozi gusa

Ngirumugenga yavuze ko uwakwifuza gukora ubu bworozi bugamije kugurisha ibibwana ari ibyo kwitondera cyane ngo kuko bisaba kuba ufitanye amasezerano n’abantu runaka cyangwa se wizeye isoko mu buryo buhoraho.

Ati “ Ni isoko rifunguye abantu bose bashobora gukora cyangwa bakaza kukugurira ariko bisaba kubikora ufite abakiliya mukorana. Ubundi mu bihugu byateye imbere hari abakora ubu bworozi bahita bagurisha nta kindi bakora, ariko inaha iwacu ntabwo biratera imbere ni ukubikora unateganya ngo bya bibwana nibatabigura byose ngo babirangize nzanabyorora, ugomba kuba warateganyije naho wabyororera.”

Ngirumugenga yavuze ko umuntu wifuza gukora ubu bworozi bugamije kugurisha ibibwana akwiriye korora ingurube zitanga umusaruro kugira ngo umukiliya uje kubigura akamukuraho icyororo zizamuhe umusaruro abe yanamurangira abandi bakiriya.

Ati “ Ni ugushaka ingurube ikura vuba akazitaho zajya zibyara akazigaburira neza, ibibwana byacuka ubundi akabigurisha, gusa iryo soko ni ukwitonda ukamenya ngo ibi bibwana nzabigurisha nde?”

Mu bindi wamenya ku bworozi bugamije kugurisha ibibwana ni uko babigurisha ku biro, nibura ikilo kimwe kigurishwa 4000 Frw byumvikane ko ikibwana kimaze nibura ukwezi gifite ibiro icumi kigurishwa nibura ibihumbi 40 Frw, nubwo hari aho mu cyaro uzasanga kigurishwa ibihumbi 20 Frw.

Ubworozi bw’ingurube butanga ifumbire

Hari n’aborora ingurube bagamije kubona ifumbire yazo kugira ngo ibafashe mu kongera umusaruro w’ubuhinzi, abandi bakagurisha ya fumbire kuko nayo ari imari ishyushye ku isoko ry’u Rwanda.

Ngirumugenga yavuze ko ingurube ari indyabyose kandi ngo uko irya byinshi bivanze ari nako ifumbire irushaho kuba nziza ikaba yanatanga umusaruro.

Ati “ Nkanjye Worora ingurube zirenga 1000, ku mwaka mbona ifumbire y’amakamyo 120, ikamyo imwe ya Fuso iba igurishwa ibihumbi 100 Frw urumva umuntu wagurishije rero amafaranga akuramo [miliyoni 12 Frw], gusa njye ntabwo nyigurisha ngira ahantu hanini mpinga niyo nkoresha mu buhinzi bwanjye aho kugura indi.”

Ubworozi bw’ingurube bugamije gutanga icyororo

Ubworozi bw’ingurube butanga icyororo nawo ni undi mushinga uri mu bworozi bw’ingurube ndetse muri iki gihe ntabwo urayobokwa n’abantu benshi kuko usaba gushikama ukorora amoko atandukanye y’ingurube kandi ukirinda kuyavangavanga.

Harelimana Emmanuel wororera mu Murenge wa Muyumbu mu Kagari ka Nyarukombe, yiyemeje gukora ubworozi butanga icyororo ku bandi borozi, icyororo ashobora kugitanga ari intanga cyangwa ari ingurube isanzwe.

Mu ngurube z’icyororo afite kuri ubu anatanga harimo Landrace, Largewhite na Comborouh, ndetse n’izivamo isekurume nziza nka Duroc na Pietrain.

Harelimana avuga ko ku muturage wiyemeje gukora ubworozi butanga icyororo aba yiyemeje gufasha abandi borozi akajya abaha ingurube nziza zitanga umusaruro waba uw’inyama cyangwa agatanga ibibwana byiza bitanga umusaruro.

Ati “ Iyo wamaze kwinjira muri ubu bworozi butanga icyororo ugaha abantu ingurube nziza zikura vuba zitandukanye n’izisanzwe, bakugana ari benshi ukabona amafaranga kandi nabo bikabafasha kwiteza imbere.”

Harelimana yavuze ko kuri ubu politike ya Leta y’u Rwanda ari uko abantu bareka gufata ingurube zivangavanze bagafata ingurube z’umwimerere kugira ngo haboneke umusaruro mwiza kandi mwinshi.

Yavuze ko u Rwanda ruri kugana mu gukora ubworozi bw’umwuga kandi abakora ubu bworozi bugamije icyororo ngo ni bake cyane kuburyo uwabikora yakunguka kandi cyane.

Abari mu bworozi bw’ingurube bubyara inyungu bagiriye inama abashaka gukora ubu bworozi ko harimo amafaranga menshi, ariko ko abonwa n’uwabyinjiyemo akabikurikirana agashaka amakuru ya ngombwa, icyororo cyiza ndetse akanazigaburira neza ngo harimo inyungu y’amafaranga menshi.

Ni gute wahangana n’uburwayi bukunze kwibasira ingurube?

Ku muntu ushaka korora ingurube bushya, menya ko nazo zigira ibyorezo bikunze kuzibasira kandi ko iyo icyorezo kizigezemo inyinshi kizisiga ari imirambo.

Mu buryo bwo kwirinda izi ndwara, Jean Claude Shirimpumu Uyobora ishyirahamwe ry’Aborozi b’Ingurube mu Rwanda, yabwiye IGIHE ko ikintu cya mbere umuntu yakora mu kwirinda uburwayi bwazo ari ukuzigirira isuku.

Ati “Isuku irakenewe cyane yaba ku hantu ingurube ziba, kuri zo ubwazo kuko bizirinda indwara. Iya kabiri ni ukuzirinda abantu kuko abantu ni izindi nyamanswa, nibo bagendana microbes, umuntu rero ushaka korora ingurube azirinda abantu, kugendagenda kw’ayandi matungo mu biraro n’ibindi.”

Shirimpumu yavuze ko ikindi ari uko umuntu yibuka kuzikingiza indwara zinyuranye, akaziha inkingo zikiwiriye mu gihe gikwiriye ndetse akanazivura kandi neza.

Umuyobozi Mukuru Wungirije muri RAB ushinzwe Iterambere ry’Ubworozi, Dr. Uwituze Solange, yabwiye IGIHE ko hari byinshi Leta ifasha mu bworozi bw’ingurube, agaragaza ko mu by’ibanze ifasha aborozi harimo kubashakira icyororo cyiza n’ibindi byinshi bitandukanye.

Ati “Twongererera ubumenyi aborozi binyuze mu buryo bwa LFFS [ Imigaburire y’amatungo, guhitamo icyororo, indwara nuko zirindwa no gukora imishinga ijyanye n’ubworozi]. Turi gufasha mu kobonera aborozi icyororo cyizewe kandi gitanga umusaruro uhagije.”

Imibare itangwa na Minisiteri y’Ubuhinzi n’Ubworozi, MINAGRI, yerekana ko mu Rwanda hari ingurube zirenga miliyoni imwe n’ibihumbi 400. Uyu mubare ngo uracyari muke ugereranyije n’isoko rihari kuri ubu ari nayo mpamvu Leta ishishikariza abantu benshi kuzorora.

Ingurube ni itungo ribwagura ibibwana byinshi kuburyo ushobora kubyitaho mu kwezi kumwe ukabona inyungu
Ibibwana by'ingurube iyo byagaburiwe neza bikura vuba vuba bigatanga umusaruro
Ingurube yitahweho ikura vuba ikanatanga umusaruro
Kuri ubu u Rwanda rwatangiye kubika intanga z'ingurube mu rwego rwo kuziha abazikeneye mu kongera icyororo cyiza
Mu gihe ingurube yenda kubwagura ukwiriye kuyishyira ahantu heza hisanzuye kandi hasa neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .