00:00:00 IGIHE NETWORK KN KINYARWANDA EN ENGLISH FR FRANCAIS

Iburasirazuba: Imirimo yo kuvugurura imiyoboro y’amashanyarazi irarimbanyije

Yanditswe na IGIHE
Kuya 30 March 2022 saa 09:25
Yasuwe :

Imiyoboro y’amashanyarazi yubatswe kera mu turere dutandukanye tw’Intara y’Iburasirazuba ubu yatangiye kongererwa imbaraga ku buryo izahaza abayifatiraho amashanyarazi biyongereye ndetse n’ibikorwa by’ubucuruzi n’inganda ziciriritse ziri muri ako gace.

Iyi miyoboro irimo kuvugururwa ivanwa kuri “monofaze” (single phase), igashyirwa kuri Tirifaze (Three phases). Biteganijwe ko uyu mushinga uzavugurura imiyoboro igera ku birometero birenga 180 mu Turere twa Nyagatare, Gatsibo, Ngoma na Kirehe.

Ni umushinga watewe inkunga n’u Bubiligi binyuze mu kigo cyawo cy’iterambere, (ENABEL), ushyirwa mu bikorwa na Sosiyete y’u Rwanda Ishinzwe Ingufu (REG) binyuze muri sosiyete iyishamikiyeho ishinzwe guteza imbere ingufu (EDCL).

Mu Karere ka Nyagatare, abatuye aho imiyoboro yamaze kuvugururwa, bishimira impinduka babonye kuva aho baherewe umuriro w’amashanyarazi ufite ingufu zisumbuye, bakaba baratangiye kuwubyaza umusaruro binyuze mu bikorwa bibyara inyungu.

Kabindi ni santire y’ubucuruzi iherereye mu Kagari ka Kijojo mu Murenge wa Musheri. Abahatuye bavuga ko uyu muriro batangiye kuwubyaza umusaruro.

Musafiri Ildephonse ufite icyuma gisya imyaka muri iyi santire yavuze ko mbere y’ivururwa ry’umuyoboro ubagezaho amashanyarazi bakoreshaga icyuma gisya gikoresha mazutu, bikabahenda kandi n’ifu ikaza itameze neza.

Ubu yaguze icyuma gishya gikoresha amashanyarzi kandi yishimiye impinduka yabonye.

Yagize ati “Nk’uko mbere twakoreshaga ibyuma bya gisingisingi bimwe bya mazutu, watsa ukumva mu ifu y’umukiriya haranukamo mazutu ariko kubera umuriro, ukanda ku rukuta ifu ikaza imeze neza nta kintu kinukamo.’’

Ndayambaje Jean de Dieu we akora akazi ko kogosha. Avuga ko mbere yagorwaga cyane no kutagira umuriro uhagije, bityo bikamuhenda na we akazamura igiciro cyo kogosha.

Yagize ati “Kogosha umwana hano byabaga bigoye cyane kuko icyo gihe twogosheraga abana ku mafaranga 300; urumva ko byari bihenze, ariko aho umuriro uziye ubu abana bato tubogoshera 100 Frw umuntu mukuru ni 200Frw.’’

Niyonkuru Benoit, Umuyobozi w’ishami rya REG mu Karere ka Nyagatare avuga ko abataragerwaho n’uyu muriro ufite imbaraga bashonje bahishiwe kuko mu gihe kitarenze amezi umunani imiyoboro yose izaba yamaze kuvugururwa.

Mu Karere ka Gatsibo, imiyoboro irimo kuvugururwa iherereye mu Mirenge ya Kiramuruzi, Remera, Kageyo na Kiziguro ku ntera y’ibirometero bigera kuri 40.

Mu Karere ka Ngoma hari Sake, Rukumberi na Jarama ireshya n’ibirometero 34 naho mu Karere ka Kirehe ni mu mirenge ya Gatore, Gahara, Nyamugari na Mpanga ikaba ireshya n’ibirometero 40.

Muri rusange, ingo zifite amashanyarazi mu Rwanda zigeze ku ijanisha rya 68,97%. Leta y’u Rwanda yihaye intego ko bitarenze umwaka wa 2024, ingo zose mu gihugu zigomba kuba zifite amashanyarazi.

Imwemu miyoboro yongerewe ingufu mu Karere ka Nyagatare
Hari n'imiyoboro mishya yubatswe muri aka karere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .