EU yahaye u Rwanda miliyari 10 Frw azifashishwa mu guhanga imirimo mishya

Yanditswe na IGIHE
Kuya 8 Nyakanga 2020 saa 04:20
Yasuwe :
0 0

Umuryango w’Ubumwe bw’u Burayi (EU) wahaye u Rwanda inkunga ya miliyoni €10, akabakaba miliyari 10 Frw azifashishwa mu bikorwa byo gushyigikira iterambere ry’Urwego rw’Abikorera (PSF) no guhanga imirimo mishya.

Kuri uyu wa Gatatu tariki 8 Nyakanga 2020, nibwo Minisitiri w’Imari n’Igenamigambi, Dr Ndagijimana Uzziel na Ambasaderi Nicola Bellomo uhagarariye EU mu Rwanda basinye aya masezerano.

Inkunga yatanzwe iri muri miliyoni €460, Umuryango w’Ubumwe bw’u Burayi wemereye u Rwanda kugeza mu mpera za 2020.

Biteganyijwe ko iyi gahunda izafasha u Rwanda mu rugendo rwo guhanga imirimo mishya ku rubyiruko ariko hibandwa cyane ku byiciro byagaragaje ko byihutisha iterambere kandi bigatanga n’akazi ku bantu benshi nk’icy’ubukungu bushingiye ku ikoranabuhanga n’urwego rw’ubukerarugendo.

Ni gahunda izashyirwa mu bikorwa binyuze mu mishinga ibiri irimo uwa Market Skills4Tourism (MS4T) uzashyirwa mu bikorwa na Rwanda Polytechnic ifatanyije n’Urwego rw’Ubukerarugendo muri (PSF), Skills Office yo mu Rwego rw’Iterambere rw’Igihugu na WDA ndetse n’uwo guhanga udushya ubarizwa mu Kigo cy’Igihugu Gishinzwe Ikoranabuhanga mu Itumanaho n’Isakazabumenyi, RISA, gifatanyije na ICT chamber muri PSF.

MS4T izazamura ubumenyi bw’urubyiruko mu rwego rw’ubukerarugendo no kwakira abakiliya mu Rwanda; izazamura ubushobozi bw’imiyoborere y’ibigo by’imyuga n’ubumenyingiro (TVET) no kubihuza n’urwego rw’abikorera; kunoza ireme ry’amahugurwa atanga; gutanga ubujyanama ku basoje amasomo mu by’ubukerarugendo y’uburyo bwo kwitwara ku isoko.

Uyu mushinga uzibanda ku guhuza ibigo bya TVET n’abikorera hagamijwe kunoza integanyanyigisho n’uburyo bw’imyigishirize.

Umushinga uzita ku ikoranabuhanga wo witezweho kongera imirimo mu mijyi ine iri mu yunganira uwa Kigali irimo Rusizi, Rubavu, Nyagatare na Muhanga.

Ni gahunda izafasha mu gushyiraho ibigo byigishirizwamo ikoranabuhanga n’aho abafite ibitekerezo bashobora gufashwa kubishyira mu bikorwa.

Minisitiri w’Imari n’Igenamigambi, Dr Ndagijimana Uzziel, yavuze ko COVID-19 yagize ingaruka zikomeye ku bikorwa by’urwego rw’abikorera, byanatumye bamwe batakaza imirimo n’ubuzima bwabo bugerwaho ingaruka.

Ati “Inkunga ya EU izafasha mu koroshya uwo mutwaro binyuze mu gutanga ubumenyi ubumenyi bukenewe ku isoko ry’umurimo no kunoza udushya twifashishije ikoranabuhanga.’’

Ambasaderi Nicola Bellomo uhagarariye EU mu Rwanda yavuze ko inkunga yatanzwe mu gushyigikira urwego rw’ubukerarugendo.

Ati “Ni ingenzi cyane bitewe n’ibihe turimo aho urwego rw’ubukerarugendo bwagizweho ingaruka kubera icyorezo cya COVID-19. Iki kibazo cyagaragaje ko mu gihe nta rwego rw’ikoranabuhanga rukomeye, biragoye kugendana n’Isi igezweho; ni yo mpamvu iyi gahunda iziye igihe ngo izibe icyuho mu rwego rw’ikoranabuhanga mu Rwanda.’’

Guverinoma y’u Rwanda yihaye intego ko muri gahunda yayo y’imyaka irindwi igamije kwihutisha iterambere izwi nka NST1 (2017-2024) izihutisha iterambere ry’ubukungu bushingiye ku ishoramari ry’abikorera, ubumenyi no ku mutungo kamere w’igihugu kandi butagira uwo buheza.

Muri iyo gahunda, Guverinoma y’u Rwanda ivuga ko yateganyije ko hazahangwa imirimo mishya ibyara inyungu igera nibura 1500000 bitarenze 2024.

Minisitiri w’Imari n’Igenamigambi, Dr Ndagijimana Uzziel na Ambasaderi Nicola Bellomo uhagarariye EU mu Rwanda nyuma yo gushyira umukono ku masezerano y'inkunga ya miliyari 10 Frw zahawe urwa Gasabo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .