00:00:00 IGIHE NETWORK KN KINYARWANDA EN ENGLISH FR FRANCAIS

Engie Energy Access yatanze icyizere ku basanzwe bakoresha Mobisol

Yanditswe na Ntabareshya Jean de Dieu
Kuya 25 Ugushyingo 2021 saa 02:33
Yasuwe :
0 0

Nyuma y’uko Sosiyete itanga ingufu z’umuriro w’imirasire y’izuba, Mobisol ihinduriwe izina ikitwa Engie Energy Access; yasezeranyije abasanzwe bakoresha ibikoresho byayo n’abifuzaga gutangira kuyikoresha ko nta cyahindutse uretse izina kandi ko serivisi zizakomeza gutangwa nk’uko bisanzwe.

Hirya no hino mu gihugu wasangaga ibikoresho bya Mobisol bigaragaraho iryo jambo nk’ikirango cyabyo gusa Engie Energy Access yavuze ko bigiye guhinduka ku buryo buri gikoresho cyayo kizaba cyanditseho Mysol aho kuba Mobisol nk’uko byari bisanzwe.

Umuyobozi wa Engie Energy mu Rwanda, Kanimba Sylvie, yavuze ko guhinduka kwa Mobisol kwabahaye imbaraga kuko ubu igiye kuba ikompanyi ikorera mu bihugu icyenda muri Afurika.

Yagize ati “Icyo twishimira ni izina rishya ry’ibicuruzwa byacu. Twari dusanzwe tubyita Mobisol ariko uyu munsi izina ni Mysol, mu kuri icyabaye ni uko turi kwaguka kuko habayeho kwihuza kwa kompanyi eshatu zirimo n’iyahoze ari Mobisol. Uyu munsi twagize ibicuruzwa byinshi kandi ibyo kwishimira ni uko mu Rwanda ku bantu batuye mu miryango y’amikoro make twabazaniye imirasire mito ijyanye n’ubushobozi bwa buri wese.”

Yavuze ko nta muntu ukwiye kugira impungenge bitewe n’iri hinduka ry’amazina kuko byakozwe mu nyungu zo gukomeza kubaka ubushobozi kurushaho no guharanira kutagira uwasigara mu kizima bitewe n’ubushobozi afite.

Umuyobozi ushinzwe ubufatanye n’ubucuruzi n’ibigo binini muri Engie Energy Access mu Rwanda, Rwagaju Louis, yagaragaje ko imbogamizi bahuraga nazo zari izo kubona umuntu wifuza umurasire w’ubushobozi buto ntawubone.

Ati “Uhereye ku cyiciro cya mbere cy’ubudehe kugera ku muturage wakeneraga umuriro mwinshi w’amashanyarazi. Ubundi muri Mobisol twagiraga imirasire y’izuba abantu benshi bari bazi ko ari yo ihenze. Icyo cyari ikibazo kuba hari abakiliya twashakaga gufasha kuko imirasire bakeneye n’amafaranga bafite bitahuraga n’ibyo twacuruzaga ntibishoboke.”

Yavuze ko kuba Engie Energy Access ikorera hirya no hino muri Afurika biyiha isoko ryagutse rishobora gutuma habaho kungurana ubumenyi ku bintu runaka cyangwa gusangira ikoranabuhanga.

Umukozi ushinzwe gutanga ubufasha no gukora ibikoresho byagize ikibazo tekinike, Ndayishimiye Venant, yavuze ko kuba izina ryahindutse ibicuruzwa ntibihinduke mu buryo budasanzwe ari ikintu cyo kwishimira kandi ko bazakomeza gutanga ubufasha uko buzajya bukenerwa.

Ubusanzwe Mobisol yatangaga imirasire y’izuba ifite ubushobozi bwo gutanga umuriro ungana na 40KW kugeza kuri 200 KW, ariko ubu umurasire muto ni ufite imbaraga za 10KW zishobora kwatsa amatara atatu.

Mu Rwanda intego ni uko mu 2024 buri muturarwanda azaba afite umuriro. Ubu abawufite bageze kuri 77%.

Abinyujije mu nganzo yo gusetsa Niyitegeka Gratien uzwi nka Seburikoko, yagaragaje ko Mysol ikomeje kuba ku isonga
Niyitegeka yahawe umwanya wo gususurutsa aba bakozi maze akora mu nganzo
Umuyobozi wa Engie Energy mu Rwanda, Kanimba Sylvie, yasabye abakozi gukomeza gukorana umurava
Umuyobozi Mukuru wa Engie Energy Access, Gillian-Alexandre Huart, yasabye abakozi gukorana umurava
Umuyobozi ushinzwe ubufatanye n’ubucuruzi n’ibigo binini muri Engie Energy Access mu Rwanda, Rwagaju Louis, yagaragaje ko imbogamizi bahuraga nazo zabonewe umuti
Bamwe mu bayobozi ba Engie Energy Access mu Rwanda bari kumwe n'Umuyobozi Mukuru
Byari ibyishimo ubwo Mobisol yahindurirwaga izina

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .