00:00:00 IGIHE NETWORK KN KINYARWANDA EN ENGLISH FR FRANCAIS

CIMERWA yashyikirijwe icyemezo Mpuzamahanga cy’ubuziranenge

Yanditswe na Ntabareshya Jean de Dieu
Kuya 21 Ukwakira 2022 saa 04:52
Yasuwe :

Uruganda rutunganya sima mu Rwanda, CIMERWA Plc, rwashyikirijwe icyemezo mpuzamahanga cy’ubuziranenge kubera gutanga serivisi zinoze, ubuziranenge bw’ibyo rukora, kwita ku bakozi barwo mu bihe binyuranye no kurengera ibidukikije.

Ni icyemezo gitangwa n’urwego Mpuzamahanga rw’Ubuziranenge ruzwi nka (ISO), gikubiyemo ibyemezo bitatu bitandukanye birimo icyo kuba uru ruganda rwa Cimerwa rukora sima yujuje ubuziranenge rwahawe mu 2015 kizwi nka ISO 9001.

Hari kandi icyemezo Mpuzamahanga kirebana no kwita ku bakozi n’umutekano wabo cyatanzwe muri Werurwe mu 2018 kizwi nka ISO 45001 n’icyemezo gishimangira ko uru ruganda rwa CIMERWA rwita ku bakozi barwo cyane ko n’imirimo ikorerwa mu nganda biba bishoboka ko umukozi yagiriramo ikibazo bityo hashyirwamo uburyo bwo kubitaho.

Ikindi gikubiyemo ni icyo Cimerwa yahawe cyerekana ko uru ruganda rutangiza ibidukikije cyo ku rwego mpuzamahahanga (Environmental Management system) cyizwi nka ISO 14001 yahawe muri 2015.

Iki cyemezo cyashyikirijwe ubuyobozi bwa Cimerwa ni igihuriza hamwe ibi byemezo byose byavuzwe cyitwa IMS (Integrated Management System) uko ari bitatu kikagirwa kimwe ku buryo ugifite bishimangira ko yujuje ibipimo by’ubuziranenge mpuzamahanga.

Umuyobozi wa Cimerwa Plc, Albert K. Sigei, yavuze ko guhabwa iki cyemezo bishimangira ko hari intambwe ikomeye yatewe mu gihe uruganda rumaze rukorwa cyane ko iri mu bigo bike mu Rwanda bibashije kuyihabwa.

Ati “Ibi bivuze byinshi kuri twe, kuko ibumbatiye hamwe bya byemezo twari dufite na mbere ariko iyi yo ibikubira hamwe aho kuba buri kamwe. Nizera ko turi mu bigo bike mu Rwanda byageze ku rwego rwo guhabwa iki cyemezo ndetse mu rwego rw’inganda nitwe ba mbere.”

Nubwo bimeze bityo ariko CIMERWA Plc ikomeje gahunda yo kwita ku buzima bw’umukozi aho ku wa 19 Ukwakira 2022 yagiranye amasezerano y’imikoranire n’Ikigo cy’Igihugu gishinzwe ibibuga by’indege (Rwanda Airport Company) agamije gukumira inkongi z’umuriro no guhugura abakozi ba CIMERWA ibyerekeye no guhangana n’inkongi no kuzirinda.

Yakomeje agira ati “Ubundi CIMERWA tugamije kubaka u Rwanda, tugomba gukora ibishoboka ku buryo ibyo dukora bigirira umumaro umuryango nyarwanda. Twagiranye amasezerano na Rwanda Airport Company agamije guha umutekano usesuye w’abakozi.”

Ku bakozi ba CIMERWA, guhabwa iki cyemezo bisobanuye ko bagiye guhindura icyerekezo n’intego z’imikorere mu kongera umusaruro no kugendera ku ngamba zihari zo kongera umusaruro muri uru ruganda.

Ni ibintu bisaba imbaraga nyinshi no gukora cyane kugira ngo ikigo runaka gihabwe icyemezo cy’ubuziranenge cyo ku rwego mpuzamahanga kuko bisaba ko gikorerwa igenzura ryimbitse rikorwa n’abagenzuzi mpuzamahanga.

Uyu muyobozi yavuze ko nyuma yo guhabwa iki cyemezo hakurikiraho isuzuma n’ubugenzuzi bwo kureba niba koko ubuziranenge bukomeza kubahirizwa rikorwa n’Ikigo cy’Igihugu gitsura ubuziranenge mu Rwanda RSB ari nacyo gihagarariye inzego z’ubuziranenge Mpuzamahanga mu gihugu.

Muri Nyakanga 2022 hatangajwe ko inyungu y’Uruganda rutunganya Sima, Cimerwa Plc, yageze kuri miliyari 5, 2 Frw mu gihembwe cya mbere cy’uyu mwaka mu gihe ibyo rwinjije muri rusange byageze kuri miliyari 44 Frw.

Muri iki gihembwe cyarangiye ku wa 31 Werurwe 2022, inyungu ya Cimerwa Plc yiyongereye ku kigero cya 414% kubera ko mu gihe nk’icyo umwaka ushize icyo gihe uru ruganda rwari rwungutse miliyari 1 Frw.

Umuyobozi Mukuru wa RSB, Raymond Murenzi, ashyikiriza uwa Cimerwa Plc iki cyemezo
CIMERWA yishimiye iki cyemezo yahawe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .