BK yavuze intambwe umuntu yanyuramo ashaka kubaka umuco wo kwizigama

Yanditswe na Uwiduhaye Theos
Kuya 16 Nyakanga 2020 saa 03:48
Yasuwe :
0 0

Banki ya Kigali (BK) yagaragaje izingiro ry’ibyo umuntu ashobora gukurikiza akabasha kwiyubakamo umuco wo kuzigama.

Nicole Kamanzi ushinzwe amashami ya BK muri Kigali yasobanuye ko nk’uko ijambo ribivuga ‘umuco wo kuzigama’ koko ari umuco umuntu agomba kugira.

Ati “Nk’uko ijambo ribivuga ni umuco, bivuze ko ari ikintu kiza gitandukanye n’ibyo usanzwe ukora ariko kikakubera nk’ihame. Ni ikintu kiza mu buzima kigatuma utera indi ntambwe mu mibereho.”

Yavuze ko umuco wo kwizigamira kugira ngo umuntu awugire uwe, bisaba ibintu bitandukanye.

Kugira intego

Nicole Kamanzi yavuze ko umuntu akwiriye gupanga amafaranga azakoresha buri kwezi byaba ngombwa akanabyandika ku rupapuro.

Ati “Umuntu akwiye gutekereza amafaranga akoresha buri kwezi bityo akaba yashyira ku rupapuro ibintu byose akenera. Ibi bizagufasha kumenya urugero wakwiha rwo kwizigamira bityo ugere ku ntego wihaye"”

Gutangirira kuri make

Yavuze ko abantu bafite imyumvire y’uko bazatangira kwizigamira ari uko batangiye kwinjiza amafaranga menshi bakwiye guhindura imyumvire.

Ati “Nubwo kwizigama bidakunze korohera benshi bitewe nuko bumva ko ari uguhera ku bintu binini ariko burya kwizigama bisaba no guhera ku kintu gito. Bamwe mu banyarwanda barabikora ariko ugasanga nta ntego bifite, iyo ufite intego wakwizigamira kandi bikakugeza kure.”

Kubitsa amafaranga mbere y’uko ugena ayo ugomba gukoresha

Nicole Kamanzi yatanze urugero rw’umuntu ushobora kuba afite konti muri BK ahembwa 60 000 Frw akazigama icumi. Yavuze ko uwo muntu ashobora kujya ahembwa agasaba ko bahita bakuraho 10 000 Frw byo kwizigama, agahabwa 50 000 Frw.

Kwiha intego y’umubare wifuza kuzigama

Kamanzi yakomeje avuga ko abakiliya ba Banki ya Kigali bose babafata mu buryo bumwe ku buryo nta muto cyangwa umukuru.

Ati “Muri BK bose tubafata kimwe. Nta muto nta mukuru. Nta kintu kitagira umusaruro, iyo ufite ubushake ibintu byose birashoboka. Kwizigama si buri munsi niba uhembwa igihumbi buri cyumweru ushobora kwigomwamo ibintu bitari ngombwa.”

Yavuze ko umuntu bitewe n’amafaranga ahembwa akwiriye kugena amafaranga make ashobora kujya abitsa kandi ntibimugireho ingaruka mbi. Yavuze ko nka BK batanga ubujyanama ku muntu ushaka gutera iyo ntambwe.

Yatanze urugero ku muntu ukorera 100 000 Frw ariko akagorwa no kumenya ibyo akura mu rutonde rw’ibyo akeneye kugira ngo abashe kwizigamira.

Ati “Muri Banki ya Kigali tukugira inama dukurikije ubushobozi bwawe n’imimerere yawe. Tugane tugufashe".

Kwigomwa

Nicole Kamanzi yavuze ko abantu bakwiriye kumva ko ikintu cyose kigomba kugira uburyo gikorwamo, avuga no kwizigama bisaba kuba umuntu hari ibintu bimwe na bimwe yigomwe.

Ati “Umuntu agira intego, ukava mu cyiciro kimwe ujya mu kindi ariko habaho kwigomwa. Imbogamizi abantu bahura nazo zituma uwo muco ugorana harimo kuba abantu bamwe babaho nta ntego bafite. Umuntu akaba ashaka kubaka inzu ariko akaba yumva ko hari ahantu azaterura amafaranga, akirengagiza ko uko yizigamira make make bishobora kumufasha kuba yakwegera banki ikamufasha.”

Kwihemba mu gihe wageze ku ntego

Kamanzi yavuze ko nyuma yo kugera ku ntego umuntu yihaye, aba akwiriye no kwihemba ariko ntaterere agati mu ryinyo agakomereza aho .

Ati “Nyuma yo kugera ku ntego yawe ugomba kubyishimira ukavuga uti bya bintu birashoboka ntabwo ari ikizira. Ukwiriye kubyishimira nk’umuntu wagize isabukuru. Gusa ugomba kugira umuco wo kwizigama bihoraho kugira ngo ugire icyo uhindura mu mibereho yawe .”

Yavuze ko BK ihishiye abantu byinshi. Ku bashaka kwizigamira avuga ko hari uburyo yungukirwa bitewe na konti umuntu yahisemo gukoresha.

BK yagaragaje ko umuntu ashobora guhera ku mafaranga make yizigamira, akazamugeza kuri byinshi
Kwizigamira isaba kwigomwa kandi umuntu agahera kuyo afite make

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .