Abahinzi b’ibigori muri Muhanga na Kamonyi bizeye umusaruro ku mbuto nshya zatuburiwe mu Rwanda

Yanditswe na Thamimu Hakizimana
Kuya 26 Gashyantare 2020 saa 11:21
Yasuwe :
0 0

Ibyishimo ni byose ku bahinzi b’ibigori nyuma y’aho bamurikiwe amoko mashya umunani y’imbuto za Hiburide z’ibigori atuburirwa mu Rwanda atanga umusaruro mwinshi kurusha ayavaga hanze y’igihugu.

Aka kanyamuneza aba baturage bakerekanye kuri uyu wa Kabiri tariki ya 25 Gashyantare 2020, ubwo Ikigo gishinzwe Iterambere ry’Ubuhinzi n’Ubworozi mu Rwanda (RAB) cyamurikiraga izi mbuto abahinzi b’ibigori bo mu Karere ka Muhanga na Kamonyi.

Abaturagwe babwiye IGIHE ko izi mbuto z’ibigori nshya zituburirwa mu Rwanda zitandukanye n’izakurwaga hanze bitewe n’uko zibaha umusaruro mwinshi ndetse zikaba zihangana n’ihindagurika ry’ikirere.

Bavuga ko bizeye ko muri iki gihembwe cy’ihinga bazabona umusaruro mwinshi utandukanye n’uwo babonye mu bihembwe bishize.

Bemeza ko izi mbuto nshya zigira ibigori binini kandi byiza ndetse n’iyo imvura iguye nyinshi irimo amahindu bitajya bigwa kuko biba bikomeye bakanashimangira ko mbere kuri hegitari bakuragamo toni 3 ariko ubu bizeye kujya babona toni 7.

Umuhinzi w’ibigori mu Murenge wa Shyogwe,Mukamwezi Jacqueline, yagize ati “ Iyi mbuto zatuburiwe muri RAB twabonye ari nziza kuko zibashije ubutaka bw’ino. Kubera ubwiza bwazo twese abahinzi b’aha twazihisemo cyane ko zigira ibigori byiza kandi ni ngufi nta biza bizibashije mbese ubona ko zigendanye n’imisozi y’ino iwacu.”

Yongeyeho ko nubwo batasarura bizeye kugira umusaruro mwiza ugereranije n’uwo babonaga mbere batari bahabwa izi mbuto nshya.

Uwitwa, Mukankusi Venancia, yemeza ko imbuto bahawe zitandukanye n’izo bahabwagwa mbere.

Ati “ Imbuto ya mbere nayo yareraga ariko ntiyeraga nk’iyi kuko urabona ko iyi ifite ikigori kinini. Nubwo twahuye n’ibiza by’imvura yari irimo n’amahindu ariko iyo urebye n’inkeke gifite usanga ari nini cyane kandi ukabonaka duhuye n’ibihe byiza cyajya giheka n’ibigori bibiri cyangwa bitatu kuko hari aho byagiye biba.”

Umuyobozi Mukuru wa RAB, Dr. Karangwa Patrick yavuze ko bakoze amoko agera ku munani y’ibigori kugira ngo bazibe icyuho cy’imbuto zatumizwaga hanze y’Igihugu.

Ati “RAB twashyizeho umwete kugira ngo izi mbuto ziboneke kugira ngo tuzibe icyuho cy’izatumizwaga hanze kuko muzi ko izo twatumizaga yo zageraga kuri toni ibihumbi 3”.

Yongeyeho izi mbuto zitanga umusaruro cyane ko byagaragaye ko umusaruro w’ibihembwe bibiri by’umwaka ushize uw’iki gihembwe kimwe uzazikuba ishuro zigera kuri ebyiri.

Dr Karangwa yanashimangiye ko imbuto zakundaga gutumwizwa hanze zirimo Soya n’ibigori zagabanyutse kuko ubu 70% y’izikenerwa zituburirwa mu Rwanda.

RAB itangaza ko imbuto zatumizwaga hanzwe y’Igihugu buri mwaka zatwaraga miliyari 3 z’amafaranga y’u Rwanda.

Imbuto nshya y'ibigori abahinzi bayishimiye cyane kubera umusaruro itanga
Imbuto nshya z'ibigori zatanzwe
Ubwo basobanuriraga Umuyobozi wa RAB Dr Karangwa Patrick ubwiza bw'imbuto nshya y'ibigori
Umuhinzi w’ibigori mu Murenge wa Shyogwe,Mukamwezi Jacqueline yavuze ko ubwoko bushya bw'ibigori bahawe bwera cyane
Umuyobozi wa RAB Dr Karangwa Patrick ari kureba imbuto nshya y ibigori
Dr Karangwa yanashimangiye ko imbuto zakundaga gutumwizwa hanze zirimo Soya n’ibigori zagabanyutse kuko ubu 70% y’izikenerwa zituburirwa mu Rwanda.
Mukankusi Venancia, yemeza ko imbuto bahawe zitandukanye n’izo bahabwagwa mbere.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .