00:00:00 IGIHE NETWORK KN KINYARWANDA EN ENGLISH FR FRANCAIS

Abacuruzi b’amata bambuye aborozi bagiye kuvanwa mu bemewe gukora ubwo bucuruzi

Yanditswe na Igizeneza Jean Désiré
Kuya 6 Mutarama 2023 saa 08:05
Yasuwe :

Ikigo cy’Igihugu gishinzwe Iterambere ry’Ubuhinzi n’Ubworozi, RAB cyatangaje ko mu minsi ya vuba kigiye gufungira abacuruzi b’amata bo mu turere dutandukanye tw’igihugu, bakunze kugaragaraho ibikorwa byo kwambura aborozi bikagira ingaruka ku musaruro w’amata.

RAB ivuga ko ubu itegereje urutonde rw’abo bacuruzi ruzaturuka muri buri karere, ubundi bagakurwa ku rutonde rw’abemerewe kugurisha amata mu gihugu.

Itangaza ibi kuko ngo ibi bikorwa biri kubangamira intego igihugu cyihaye cy’uko mu 2024 umusaruro w’amata uzaba ugeze kuri litiro 1 250 000 000 uvuye kuri litiro 932 951 000 mu 2022.

Nk’ubu mu Karere ka Kayonza honyine aborozi bambuwe agera kuri miliyoni 50 Frw, ibyatumye umukamo ugabanyuka ukagera kuri litiro ibihumbi 55 ku munsi uvuye ku bihumbi 75.

Ibi ngo biterwa n’uko aborozi basigaye bagurisha amata mu buryo butemewe kubera kutizera aba bahawe uburenganzira bwo gukusanya amata kuko bakunze kubambura.

Umuyobozi Mukuru w’Ishyirahamwe ry’Aborozi mu ka Karere ka Kayonza (Kayonza Dairy Farmers Union), Sebudandi Stephen yabwiye The New Times dukesha iyi nkuru ko muri aka karere honyine hamaze kugaragara ibibazo nk’ibi 15.

Ati “Byamaze kuba nk’umuco. Nyuma yo kwambura aborozi, abacuruzi b’amata bimukira mu tundi turere nka Nyagatare, Burera Gatsibo, Gicumbi n’utundi nabwo bakabanza kwishyura aborozi nk’amezi abiri bakongera aborozi bagaheruka ayo.”

Agaragaza ko ibi bikunze kubaho cyane mu bice aborozi badafite isoko ryo mu bigo bikomeye nk’inganda z’amata.

Yemeza ko mu byakemura iki kibazo harimo no kongera kuvugurura amakoperative akusanya umusaruro w’amata kuko hariho atagikora bijyanye no gucika intege, agatanga urugero nk’ayo ku nkengero za Pariki y’Akarera, ahari amakoperative atanu “ubu abiri niyo agikora gusa.”

Ni igitekerezo ahuza n’abayobozi b’amahuriro nk’aya bagenzi be barimo Gahiga Gashumba uyoboye ishyirahamwe rya Nyagatare ndetse na Gad Tegeri Gahiya uyobora iry’i Nyabihu.

Tegeri avuga ko kuva mu 2015 agera kuri miliyoni 31Frw amaze kwamburwa aborozi bo muri ibi bice ndetse ko bitatungurana habonetse abanda bamburwa.

Umuyobozi Mukuru RAB wungirije, Dr Solange Uwituze yavuze ko gufungira aba bacuruzi ndetse no kubaka uburenganzira bwo kugura amata “bigiye gukorwa mu gukuraho imbogamizi zose zishobora kubangamira aborozi bigatuma umusaruro ugabanuka.”

Akomeza avuga ko RAB izakomeza gukorana rw’Urwego rw’Igihugu rushinzwe Amakoperative mu guhangana n’aba bambuzi, bagashyirwa ku rutonde rwa ba bihemu.

Kutishyurira aborozi ku gihe byagabanyije umukamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .