Umwihariko wa ba rwiyemezamirimo 10 bagiye gutoranywamo abo BK Plc izaha inguzanyo zitagira inyungu

Yanditswe na Niyitanga Jean Paul
Kuya 4 Ugushyingo 2020 saa 10:06
Yasuwe :
0 0

Binyuze muri gahunda yiswe BK Urumuri Initiative, Banki ya Kigali (BK) igiye gutanga inguzanyo idasaba inyungu kuri ba rwiyemezamirimo bazagaragaza imishinga myiza. Iyi mishinga izatoranywa mu icumu yagaragarijwe Akanama Nkemurampaka.

Ubusanzwe si kenshi Banki zitanga inguzanyo itagira inyungu kuko ubundi banki zicuruza amafaraga.

Kuva mu 2017, ubwo Banki ya Kigali yari imaze kwizihiza imyaka 50 ikorera mu Rwanda, yagize igitekerezo cyo gufasha ba rwiyemezamirimo bakizamuka bakabahugura ku buryo ishoramari rikorwa, ndetse bakanabaha inguzanyo zitagira inyungu kugira ngo biteze imbere.

Buri mwaka, Banki ya Kigali ifasha abantu bari hagati ya batanu n’umunani bitewe n’imishinga yagaragajwe.

Umuyobozi w’Ishami rishinzwe kwamamaza ibikorwa muri Banki ya Kigali, Thierry Nshuti, yavuze ko iyi gahunda iri mu murongo iyi banki yiyemeje wo guhindura imibereho y’abantu mu bijyanye n’ishoramari.

Ati “Turi banki ibereyeho guhindura ubuzima bw’abantu mu bijyanye n’ishoramari, ibi na byo biri muri uwo murongo.”

Muri iyi gahunda BK ifatanya n’ikigo cyitwa Inkomoko ari na cyo gitanga amahugurwa n’ubujyanama ku ishoramari no kubafasha kugera ku mafaranga.

Umwihariko w’imishinga 10 izatoranywamo izahabwa inguzanyo itagira inyungu

La Fotolia Ltd: Iki kigo gikora ibijyanye no gufotora, gufata amashusho, gicuruza impano, kikanacuruza ibikoresho byifashishwa mu kwamamaza. Gifite umwihariko wo kugira urubuga kibikiraho abantu amafoto na video ku buryo umutekano wabyo uba wizewe. Kuri urwo rubuga, umuntu abasha kugiraho konti ye na we akaba yanabikaho ibyo ashaka.

Kugeza ubu bagaragaza ko bakoresha abakozi batandatu bahoraho, bakemeza ko bahawe inguzanyo itagira inyungu ya miliyoni 5 Frw na Banki ya Kigali babasha kugura mudasobwa igezweho, imashini isohora amafoto n’inyandiko (Printer), bakanongera ububiko bw’ikoranabuhanga bw’urubuga rwabo.

Uzi Collection Ltd : Aba ni ba rwiyemezamirimo bihebeye ibyo gukora imyambaro y’amoko atandukanye Ikorewe mu Rwanda. Bafite umwihariko wo kuba biremera imideri itamenyerewe, bakayita amazina, bakanayicuruza.

Kuri ubu bavuga ko baramutse bahawe inguzanyo ya miiliyoni 5Frw zitagira inyungu babasha kurangura ibikoresho bifashisha mu gukora imyambaro, no kugeza ibikorwa byabo ku masoko mpuzamahanga, bagatanga n’akazi ku bandi ari nako babigisha gukora imyambaro.

Slice and Cakes Ltd: Aba bihebeye ibyo gukora imitsima (Cakes) y’ubwoko butandukanye, ikoze neza,isa neza kandi iryoshye. Ubu bakoresha abakozi 10 bahoraho.

Bavuga ko babonye inguzanyo itagira inyungu ya miliyoni 5frw yabafasha kuzamura urwego rw’ibyo bakora, bagahangana n’abandi bakora bene iri shoramari ubundi bakigarurira amasoko akomeye.

Jotete Investment Ltd: Aba bo bazobereye mu bijyanye no gukoresha indabyo mu guhindura ubwiza bw’ahantu, barazihinga, bakanazikoresha bataka ahabera ibirori. Bakora iby’ubukerarugendo bw’amahoteri, bakanamenya gutegura ibirori, ubu bamaze kurenga imbibi z’u Rwanda bageza ibikorwa byabo imahanga.

Bavuga ko bahawe inguzanyo ya miliyoni 5Frw bakwagura ubuhinzi bw’indabo bukava kuri hegitare eshanu bukagera kuri hegitale 10, ngo bayakoresha kandi mu kugura ingemwe z’indabo zitaba mu Rwanda, bakongera ishoramari bashyira mu gutegura ibirori, bikaba byabafasha kongera amahirwe yo gutanga akazi ku bandi.

Savior Civil Engineers Ltd: Aba bakorera i Musanze ibijyanye n’ubwubatsi, bakora ibishushanyo mbonera by’imishinga y’ubwubatsi, bakanatanga inama mu by’ubwubatsi. Bari ku rwego rwo guhatanira amasoko akomeye mu Rwanda.

Bavuga ko bahawe inguzanyo ya miliyoni 5frw, babasha kugura mudasobwa kabuhariwe mu gukora imishinga y’ubwubatsi ikazabafasha kwihutisha no kwagura imishinga yabo no gutanga akazi ku bantu 10.

Weya Creations Ltd: Iki kigo cy’ubucuruzi gikora imyenda y’abantu bose, ariko ubu kirashaka kwibanda ku gukora imyenda y’imbere ku buryo mu minsi iri imbere, gishaka kwambika abanyarwanda imyenda y’imbere yakorewe mu Rwanda ku giciro kibanogeye, cyamara guhaza isoko ry’u Rwanda kikazabona gutangira kohereza hanze ibyo gikora.

Abayobozi ba Weya Creations Ltd, bavuga ko baramutse bahawe inguzanyo itagira inyungu ya miliyoni 5Frw babasha kubona uko barangura ibikoresho bihagije bifashisha mu gukora imyenda, bagahugura abakozi babo mu gukora ibintu byiza, kandi bakazamura umubare w’abakozi babo bakagera kuri 20.

Work Roselyne Ltd: Aba bakora ubuhinzi bw’igihingwa kitamenyerewe mu Rwanda cyitwa ‘Rosella hibiscus’. Iki gihingwa kigabanya umuriro mu gihe umuntu arwaye, kikagabanyiriza ububabare abagore bajya mu mihango bakababara, iki gihigwa ubu baragihinga bakagikoramo ifu ikoreshwa nk’amajyane, ndetse igashyirwa no ku ifunguro. Roselle hibiscus ngo ihumura neza ikagwa neza abayikoresha.

Ubu bafite isoko mu mahoteri atandukanye ndetse batangiye no kohereza mu mahanga umusaruro wabo.

Bavuga ko baramutse bahawe inguzanyo itagira inyungu ya Miliyoni 5frw, byabafasha kugura imashini yumisha umusaruro wa Roselle hibiscus, bakamamaza ibikorwa byabo, bakabasha no kubona uko babipfunyika.

Endless Trading Company Ltd: Aba bakora tapi, imitako, n’ibindi bikoresho mu bitenge bitatse mu buryo buteye amabengeza bakanabyigisha abakobwa batewe inda zitateganyijwe.

Ubu ngo ntibabasha guhaza isoko bafite kuko badafite imashini kabuhariwe mu gukora ibicuruzwa byabo, ubu babikoresha intoki bikabatwara igihe kinini. Barifuza guhabwa inguzanyo ya Banki ya Kigali itagira inyungu kugira ngo babashe kugura iyo mashini n’ibikoresho bihagije ubundi babashe gukora byinshi mu gihe gito.

Nova Leather Ltd: Aba ni bo ba mbere mu Rwanda bafite uruganda rukora ubudodo bwifashihwa mu gukora amakote, imikandara, inkweto n’ibikapu bihendutse, bisa neza kandi byiza.

Bavuga ko baramutse babonye inguzanyo ya Banki ya Kigali, byabafasha kubona amafaranga yo kugura ibinyabutabire byifashishwa mu gukora ubudodo, bakagura imashini zikora ubudodo, n’ibindi bifashisha bakora imyenda.

Exalto Engineering and Supply Solutions Ltd: Aba bamenye ubwenge bwo kubyaza umusaruro igisheke bagikoramo divayi, whisky, n’imitobe ndetse bakanatunganya urusenda. Bafite umwihariko kuko ibisigazwa byo mu ruganda rwabo babibyazamo ifumbire baha abahinzi, ubu bamaze kugura imirima minini y’ibisheke kandi barashaka kongera ubuso bwayo.

Bavuga ko baramutse babonye inguzanyo ya Banki ya Kigali, babasha gukemura ikibazo cyo kubona amacupa yo gupfunyikamo ibinyobwa byabo dore ko ngo ahenze cyane. Iyi nguzanyo kandi ngo yanabafasha kwagura ishoramari ryabo bagakomeza bakagera no mu bindi bihugu.

Imishinga izahabwa inguzanyo na Banki ya Kigali muri uyu mwaka, yose ni iy’abagore n’abakobwa mu rwego rwo kubatinyura no kubashyigikira mu ishoramari.

Iyi mishinga yose yagaragarijwe akanama nkemurampaka kazahitamo izahabwa inguzanyo na BK, abazayihabwa bakazayishyura badasabwe inyungu mu rwego rwo kubafasha kwiteza imbere.

Abagize akanama nkemurampaka babaza ibibazo ba nyir'imishinga
Abahagarariye imishinga itandukanye bari bitabiriye igikorwa cyo kwerekana ibyo bakora ngo bafashwe kubiteza imbere
Umukozi muri Nova Leather Ltd asobanura umwihariko w'ibyo bakora
Bimwe mu bikorwa n'ibi bigo bitandukanye byari bihari ku buryo rwiyemezamirimo yerekanaga ibyo akora
Banki ya Kigali yiyemeje gushyigikira ishoramari ry'urubyiruko, abari n'abategarugori
Mukandayisenga wo muri Exalto Engineering and Supply Solutions ltd yavuze ko ubu babasha gukora divayi na Whisky mu bisheke
Ukubereyimfura washinze Savior Civil Engineers Ltd yagaragaje ko ageze ku rwego rwo guhatanira amasoko akomeye mu bwubatsi
Umuyobozi wa Uzi Collection Ltd yerekanye ko bafite umwihariko wo kuba biremera imideri itamenyerewe bakayita amazina bakanayicururiza
Umuyobozi ushinzwe imenyekanishabikorwa muri BK, Thierry Nshuti yavuze ko gushyigikira ishoramari biri mu byo biyemeje

Amafoto: Muhizi Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .