00:00:00 IGIHE NETWORK KN KINYARWANDA EN ENGLISH FR FRANCAIS

Uko inzara yo muri Afurika yatumye Usengimana yiyegurira ubuhinzi

Yanditswe na Akayezu Jean de Dieu
Kuya 5 June 2022 saa 02:07
Yasuwe :

Mu 2017, Usengimana Sakina wari urangije kwiga kaminuza yitabiriye inama ya Youth Connekt, akorwa ku mutima n’umwe mu batanze ibiganiro avuga ko "Afurika mufite aho guhinga, ubutaka bwera, ariko abaturage banyu barashonje".

Usengimana yavuye muri iyo nama ahita ajya gushaka aho akodesha umurima wo guhingamo i Kabuga mu Karere ka Gasabo, atangira guhinga intoryi, ariko nyuma aza kubona ko ikibazo cyo kubona isoko nacyo ari ingorabahizi. Yahise yinjira mu kujya agemura umusaruro mu mahanga.

Usengimana akomeje urugendo rwerekeza ku gukemura cya kibazo, kuko mu 2019 yari amaze gushinga Ikigo cya Afri Foods Ltd cyohereza imbuto n’imboga mu mahanga. Birimo avoka, urusenda, inyanya, imiteja, intoryi n’ibindi.

Ubuhamya bwe yabutanze mu biganiro byahuje ba rwiyemezamirimo b’abakobwa n’abagore, aho baganiraga n’abanyeshuri bo muri Kaminuza ya Davis College.

Byitabiriwe na ba rwiyemezamirimo b’abakobwa n’abagore bamaze kugera ku bikorwa by’indashyikirwa n’ibitanga icyizere barimo Akanyana Sharon washinze Ikigo cya Ishyo Foods Ltd, Francine Munyaneza washinze Ikigo cya Munyax Eco, Martine Munezero uhagarariye Ikigo BID Capital Partners n’abandi.

Ni ibiganiro bigamije gushishikariza abakiri muri kaminuza gusobanukirwa politiki ya Leta yo kwihangira imirimo. Byateguwe na Minisiteri y’Ubucuruzi n’Inganda, Kaminuza ya Davis College n’Ikigega cy’Abanyamerika cy’Iterambere (USAID) binyuze mu mushinga wiswe ’Nguriza Nshore’.

Usengimana yavuze ko ubwo yari arangije kwiga muri Davis College mu bijyanye no kwihangira imirimo [Entrepreneurship], yagiye gusaba akazi nk’abandi, ndetse akabona muri hoteli imwe yo mu Mujyi wa Kigali.

Gusa ngo ubwo yari mu ishuri na nyuma yo kurangiza, yakundaga kwitabira ibiganiro n’inama zitandukanye zihuza urubyiruko n’abayobozi mu nzego zaba izo mu Rwanda, Afurika no ku Isi. Byose ngo yabikoraga agamije kugira ngo abashe kumenya amakuru.

Ati "Mu 2017 nari nitabiriye Youth Connekt yari irimo Jack Ma na Akon, nibo mu cyumba nari ndimo bavuze ko Afurika ifite ubutaka bwo guhinga kandi abaturage bayo bakaba badafite ibyo kurya. Ndavuga nti ibyo bintu ko bikomeye? Koko ndebye mbona hari abavandimwe banjye n’inshuti baba bafite ubutaka mu ntara ariko ntabwo babukoresha."

Yakomeje agira ati "Muri make bashakaga kuvuga ko dufite ubutaka, ahantu heza ho guhinga kandi hera, dufite ikirere cyiza, ariko kuki tutabibyaza umusaruro? Kuva icyo gihe nanjye natangiye kuvuga nti ariko se ni iki nshobora kubikoraho?"

Usengimana avuga ko yagiye akodesha ubutaka, atangira guhinga inyanya na puwavuro, ariko akabona bitagenda uko abyifuza ngo abashe gusubiza cya kibazo yabajijwe n’abari muri ya nama ya Youth Connekt, ko Afurika ifite ikibazo cy’ibiribwa kandi abaturage bayo bashonje.

Ati "Ndavuga nti ariko ubundi ndashaka gukora iki? Ndashaka kujya ngemura ibiribwa mu mahanga. Naragiye negera umuntu wari umuyobozi w’ihuriro ry’abohereza ibintu mu mahanga, ndamubwira nti mwampuje n’umukiriya umwe. Bampuje n’umukiriya umwe wo mu Buholandi dutangira gukorana, nyuma ngenda nagura."

Yakomeje agira ati "Inama rero nagira aba bagenzi banjye by’umwihariko abanyeshuri, ni uko bashakisha amakuru, bakamenya ibyo bashaka kujyamo ibyo aribyo n’inzego cyangwa abantu babikora."

"Ayo makuru turagenda tukayashaka, ibigo by’imari birahari abantu bakorana nabyo bakiteza imbere. Ufite igitekerezo akwiye gutangira gutekereza uko yagishyira mu bikorwa."

Usengimana avuga ko kugeza ubu akorana n’abahinzi barenga 500 mu gihugu hose, aho agenda akagura ibyo bejeje akajya kubishakira amasoko mu mahanga.

Ni mu gihe kandi umubare w’abakozi akoresha nawo ugenda wiyongera umunsi ku munsi.

Kuri we ngo kudacika intege no guhozaho bishobora gufasha abakiri inyuma ye kuba bagera ku ntego zabo.

Ikigo cya Afri Foods Ltd kigeze ku rwego rwo kohereza toni 300 mu mahanga z’ibirimo urusenda, avoka, imiteja n’ibindi.

Iki kigo kimaze guhugura abahinzi bagera muri 400, bigishwa uko bashobora guhinga ariko batekereza amasoko yaba ayo mu gihugu no hanze yaho, bagakora ubuhinzi bwa kinyamwuga.

Usengimana yabwiye bagenzi be b'urubyiruko ko kwihangira imirimo bitangirana no kumenya amakuru
Usengimana Sakina yiyemeje kwinjira mu rugamba rwo guhashya inzara n'ibura ry'ibiribwa muri Afurika
Usengimana akorana n'abahinzi babarirwa muri 500 bo hirya no hino mu gihugu
Usengimana agenda yitabira ibikorwa birimo imurikagurisha hirya no hino
Urubyiruko rw'abakobwa rwitabiriye ibiganiro birushishikariza kwihangira imirimo
Nyuma y'ibiganiro hakurikiyeho kuganira no kumenyana kugira ngo babe bazafatanya mu bihe biri imbere
Diane Karera uyobora Ikigo cya RIN yasabye abakobwa kwitinyuka kuko hanze aha hari amahirwe menshi abategereje ngo bayabyaze umusaruro
Bahawe umwanya wo kubaza no gutanga ibitekerezo muri ibi biganiro byari byahariwe abakobwa n'abagore
Akanyana Sharon washinze Ishyo Foods Ltd yavuze ko benshi mu bagore n’abakobwa bakitinya iyo bigeze kukwihangira imirimo, ariko bamwe mu batinyutse bavuga ko hari amahirwe menshi ariko uyabona ari uko watangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .