Sosiyete yo mu Bwongereza igiye kubaka mu Rwanda uruganda rwa miliyari 14 Frw rutunganya coltan

Yanditswe na Ferdinand Maniraguha
Kuya 30 Ukwakira 2019 saa 05:41
Yasuwe :
0 0

Sosiyete ikora mu bijyanye n’amabuye y’agaciro mu Bwongereza, Metalysis UK, yatangaje ko mu mwaka utaha izaba yujuje uruganda rwa miliyoni 16 z’amadolari (miliyari 14.7 Frw) ruzajya rutunganya coltan mu Rwanda.

Imirimo yo kubaka urwo ruganda byitezwe ko izatangira mbere y’uko uyu mwaka urangira nkuko byatangajwe n’Umuyobozi Nshingwabikorwa wa Metalysis UK, Ray Power.

Power yavuze ko imirimo yo kubaka urwo ruganda izaba yarangiye mu mezi yo hagati ya 2020.

Urwo ruganda ruzaba ruherereye mu Bugesera rufite ubushobozi bwo gutunganya toni 120 za Coltan mu kwezi.

Power yabwiye The New Times dukesha iyi nkuru ko igitekerezo cyo kubaka uruganda mu Rwanda bakigize mu myaka ibiri ishize.

Yavuze ko bamaze gukora igishushanyo mbonera n’inyigo y’urwo ruganda no gutegura ibirombe bya coltan kugira ngo bazatangirane umusaruro uhagije.

Yavuze ko bifuza ko uruganda rwabo mu Rwanda rwatangirana ikoranabuhanga mu byo gutunganya amabuye y’agaciro.

Coltan ivanwamo ibinyabutabire bihenze bya Niobium na Tantalum. Tantalum ikenewe cyane ku Isi muri iki gihe kuko ikoreshwa mu gukora ibice by’imashini zikomeye no mu bikoresho by’ikoranabuhanga nka telefoni zigendanwa, mudasobwa zigendanwa, ibikoresho byo mu modoka na Camera.

Nubwo u Rwanda atari rwo rukorerwamo Tantalum nyinshi ku Isi, kuko itunganyirizwa mu mahanga, bivugwa ko ubutaka bw’u Rwanda kuri ubu bwihishemo 90% bya Coltan isigaye ku Isi.

Uru ruganda rutunganya Coltan nirumara kuzura ruzaba rubaye urwa gatatu rutunganya amabuye y’agaciro mu Rwanda nyuma y’urutunganya Zahabu ruherereye i Masoro mu Karere ka Gasabo n’urwa Gasegereti ruherereye Karuruma muri Gasabo.

Coltan ivanwamo ibinyabutabire bihenze bya Niobium na Tantalum. Tantalum ikenewe cyane ku Isi muri iki gihe kuko ikoreshwa mu gukora ibice by’imashini zikomeye no mu bikoresho by’ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza