Rwanda Day: Amafaranga ava muri Diaspora yageze kuri miliyoni zirenga 250 z’amadorali mu 2018

Yanditswe na Habimana James
Kuya 3 Ukwakira 2019 saa 09:13
Yasuwe :
0 0

Banki Nkuru y’u Rwanda, BNR, yatangaje ko kuva gahunda ya Rwanda Day yatangira mu 2010, ingano y’amafaranga aturuka muri diaspora yavuye kuri miliyoni 98.2 z’amadorali agera kuri miliyoni 252 z’amadorali ya Amerika mu mwaka wa 2018.

Iyi mibare yatangajwe mu gihe ku wa Gatandatu tariki 5 Ukwakira 2019, Abanyarwanda n’inshuti z’u Rwanda bazahurira muri gahunda ya Rwanda Day na Perezida Paul Kagame, mu Mujyi wa Bonn uherereye mu Burengerazuba bw’u Budage.

BNR ivuga ko mbere y’uko Rwanda Day itangira hagati y’umwaka wa 2000-2005, Abanyarwanda baba mu mahanga boherezaga mu gihugu buri mwaka hagati ya miliyoni 3.6 na miliyoni 8.8 z’amadorali ya Amerika.

Hagati y’umwaka wa 2006 na 2010 yavuye kuri miliyoni 25 agera kuri miliyoni 98.2 z’amadorali.

BNR ivuga ko impinduka zikomeye zagaragaye kuva gahunda ya Rwanda Day yatangira kuko yiyongereye kuri 158%, aho yavuye kuri miliyoni 98.2 mu 2010 agera kuri miliyoni 252 z’amadorali mu mwaka ushize wa 2018, ni ukuvuga asaga miliyari 250 z’amafaranga y’u Rwanda.

Prof Kigabo Thomas ushinzwe Ubukungu muri BNR avuga ko nta washidikanya ku musanzu wa Rwanda Day mu kuzamura ingano y’amafaranga diaspora yohereza mu Rwanda.

Yagize ati “Ziriya gahunda za Rwanda Day zafashije Abanyarwanda badatuye mu Rwanda kugira icyizere mu bukungu bw’igihugu, kuko iyo umuntu avana amafaranga aho akorera akayazana mu gihugu cye gukora ishoramari, biba bivuze ko yizeye igihugu kandi acyiyumvamo, atacyizera uyu munsi gusa ahubwo no mu bihe biri imbere."

"Icyo cyizere aragifite ku buryo avuga ati aya mbonye uyu munsi reka nyashyire mu gihugu cyanjye kubera ko nkizeye kandi ningera no mu masaziro nzaba mfite imirimo nakoze mu gihugu.”

Muhire Louis Antoine yavuye mu Rwanda mu 1994 afite imyaka 12 y’amavuko, yongeye kugaruka nyuma y’imyaka 20 kubera Rwanda Day yabereye mu Mujyi wa Toronto muri Canada mu 2014.

Yagize ati “Umuryango wanjye wakoze Jenoside yakorewe Abatutsi, ibi byatumaga mpora nibaza niba ninza ntazabazwa ibyo wakoze, muri Rwanda Day nibwo naje kureba Abanyarwanda bavuye mu Rwanda mu nzego z’ubuyobozi, kuri njye byari amahirwe kuko navugaga ngo ubwo ndi muri Canada ntacyo bari buntware, reka ngende mbabaze ibyo nshaka byose.”

“Mbabajije numvise ntacyo bitwaye, nyuma nibwo naje mu Rwanda ariko nza nka mukerarugendo, mpageze narahakunze cyane ku buryo mu kwezi kwakurikiye nasubiye muri Canada nsezera akazi nakoraga muri Polisi ya Montreal ngaruka mu kwezi kwakurikiye, imyaka itanu irashize ntashye, kuri njye mu Rwanda hanguye neza.”

Michaella Rugwizangoga uyobora Ishami ry’Uruganda rukora Imodoka rwa Volkswagen mu Rwanda, yamaze imyaka irindwi yigira mu Budage, asaba Abanyarwanda baba mu mahanga kujya bazirikana igihugu cyabo.

Yagize ati "Urubyiruko rw’Abanyarwanda biga mu mahanga nabagira inama yo kuba hafi y’igihugu cyanyu mukamenya ibibera mu Rwanda, mukubaka ubufatanye bukomeye n’abandi. Nimubishobora muze mu Rwanda inshuro nyinshi zibashobokeye, mwitabire gahunda ya Rwanda Day mwumve aho igihugu kigana namwe mubigiremo uruhare, kuko igihugu gikeneye guhanga udushya mufite.”

Muri Rwanda Day yabereye mu Bubiligi mu 2017, Perezida Kagame yagaragaje ko uruhare rwa diaspora rutagomba kwirengagizwa.

Yagize ati “U Rwanda rwacu ni mwe, ni ukuvuga abari hano, abari mu gihugu n’abari ahandi hose, mumaze kurugira igihugu cy’agaciro bitari mu karere gusa ahubwo ku Isi yose.”

Kuva mu 2010 Abanyarwanda baba mu gihugu, mu mahanga n’inshuti z’u Rwanda, bagira umunsi bahurira hamwe bakaganira ku cyarushaho guteza imbere igihugu, abamaze igihe kitari gito batakigeramo bakamarwa amatsiko babwirwa aho kigeze, bagasuzumira hamwe uruhare rwa buri wese mu iterambere ryacyo.

Rwanda Day iheruka yabaye ku wa 10 Kamena 2017 ibera muri Flanders Expo, inzu mberabyombi yo mu Mujyi wa Ghent mu Bubiligi.

Rwanda Day ni umwanya mwiza wo kwagura ishoramari ryaba iry’abanyamahanga baza mu gihugu cyangwa Abanyarwanda bajya kuyishora hanze, kuko kuri gahunda igenga uyu munsi abacuruzi bahura bakanaganira.

Abitabiriye uwo munsi bahabwa umwanya wo kubaza ibibazo Umukuru w’Igihugu, gutanga ibitekerezo n’ibyifuzo. Bituma benshi batarya indimi bakavuga uko babona iterambere u Rwanda rumaze kugeraho n’ibyakomeza gukorwa ngo risugire.

Kuva mu 2010 Abanyarwanda baba mu gihugu, mu mahanga n’inshuti z’u Rwanda, bagira umunsi bahurira hamwe bakaganira ku cyarushaho guteza imbere igihugu
Abanyarwanda bitabira Rwanda Day bagira umwanya wo kuganira na Perezida Kagame ndetse bakanasabana birambuye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza