MTN Rwanda yatangije gahunda igamije kugeza ikoranabuhanga kuri bose

Yanditswe na IGIHE
Kuya 24 Ukwakira 2019 saa 02:58
Yasuwe :
0 0

Sosiyete MTN Rwanda yatangije ubukangurambaga bwiswe “We’re Good Together” (Turi kumwe) bugamije kugeza kuri benshi serivisi z’ikoranabuhanga ku buryo nta n’umwe usigara inyuma.

Ubu bukangurambaga bwakomotse kuri gahunda yagutse yatangijwe na MTN ku rwego mpuzamahanga igamije kurushaho kugeza ikoranabuhanga kuri benshi.

Bugamije kugaragaza uko MTN yahinduye ubuzima bwa benshi ibagezaho ikoranabuhanga, iteza imbere serivisi z’imari zifashishije ikoranabuhanga, ifasha abakora ubucuruzi buto n’ubuciciriritse, guhanga imirimo n’ibindi.

Umuyobozi Mukuru wa MTN Rwanda, Mitwa Ng’ambi avuga ku ruhare rw’iyo sosiyete mu iterambere ry’u Rwanda yagize ati “MTN igendera ku gufatanya aribyo bizana iterambere rya bose. Ntabwo twabigeraho twenyine , dukomeje gushaka abafatanyabikorwa duhuje imyumvire ngo dukorane ibyiza. Twibona nk’abafatanyabikorwa mu iterambere ry’u Rwanda, niyo mpamvu icyo dukoze cyose duharanira ko kigira ingaruka nziza ku muryango nyarwanda.”

MTN yatangaje ko nubwo hari byinshi yagiye ikora mu guteza imbere ikoranabuhanga, yiteguye kurushaho binyuze mu bufatanye n’abandi.

Mu myaka 21 imaze mu Rwanda, MTN yubatse imiyoboro y’itumanaho igera ku baturage basaga miliyoni 3.8, iha akazi abanyarwanda basaga ibihumbi 31.

Biciye muri Mobile Money, abanyarwanda miliyoni 2.5 bafashijwe kugera no kubona serivisi zoroshye z’imari hirya no hino mu gihugu.

Ng’ambi yagize ati “Niba ushobora kugera ku baturage miliyoni 3.8 ukabagezaho ikoranabuhanga ryihuta, mugera kuri byinshi mufatanyije. Niba abantu miliyoni 2.5 ubahaye uburyo bwo kubitsa no kubikuza, mbere hari hari abantu basaga miliyoni eshanu batakoranaga n’ibigo by’imari, bigaragaza ko mwagera kure mukora ibyiza. Ikiduha imbaraga kigatuma dukora byinshi, ni umuhate w’abaturage dukorera.”

MTN Rwanda yiyemeje gukomeza kugeza ikoranabuhanga kuri benshi nka gahunda yatangije ya ICT-School Connect igamije koroshya uburyo bw’imyigire n’imyigishirize hakoreshejwe ikoranabuhanga. Bizafasha abanyeshuri kugira ubumenyi bwa ngombwa buzabafasha guteza imbere imibereho yabo.

Ng’ambi yavuze ko bazakomeza gushyira imbere ikoranabuhanga muri serivisi zose batanga.

MTN Rwanda yatangiye gukorera mu Rwanda mu 1998. Imibare yo muri Werurwe 2019 igaragaza ko ari wo murongo uhuriweho n’abanyarwanda benshi.

Imibare yo mu Ukuboza 2018 igaragaza ko MTN yinjije miliyari 30.1 Frw muri uwo mwaka mbere yo gutanga imisoro, ibona inyungu ya miliyari 7.7 Frw.

Ubu bukangurambaga bwakomotse kuri gahunda yagutse yatangijwe na MTN ku rwego mpuzamahanga igamije kurushaho kugeza ikoranabuhanga kuri benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza