MTN yatangije “Big Tings Happen”, uburyo bushya bwo kugeza serivisi inoze ku bakiliya

Yanditswe na Dufitumukiza Salathiel
Kuya 29 Ukuboza 2020 saa 08:06
Yasuwe :
0 0

Sosiyete y’Itumanaho, MTN Rwanda, yatangije uburyo bushya bwo kugeza serivisi inoze ku bakiliya bayo, bwiswe “Big Tings Happen” bisobanuye ngo “Ibintu bikomeye bibaho” ugenekereje mu Kinyarwanda.

Ni uburyo bwatangijwe ku mugaragaro kuri uyu wa 29 Ukuboza 2020, aho MTN yasobanuye ko bugamije gukomeza kugeza serivisi nziza ku bakiliya bayo basaga miliyoni esheshatu babarizwa mu Rwanda.

Umuyobozi ushinzwe Serivisi zihabwa Abakiliya muri MTN Rwanda, Dusabe Rosine, yavuze ko iyi gahunda igamije gukomeza guhaza abakiliya bayo.

Yagize ati “Iki gikorwa kigamije kugeza kugeza ku bakiliya serivisi zihebuje. Binyuze muri ubu bukangurambaga, abakiliya bacu bazabona amahirwe bahawe agendanye n’uburyo bwo koroherezwa, kwisanzura, guhabwa serivisi mu buryo bwihuse, kuzigeraho vuba kandi mu buryo butekanye, hanyuma bikaba “ibintu byagutse, byihuse cyangwa bishoboka, ahantu hose.’’

‘Big Tings happen’ yitezweho kuzana udushya n’imikorere myiza mu korohereza abakiliya gukora ibyabo, ari nako hubakwa umubano wihariye uganisha ku guhaza icyifuzo cya buri mukiliya.

Amavugurura aherutse gukorwa kuri za porogaramu zigezweho nka MyMTN na MoMo, nayo azafasha abakiliya kugenzura ibyabo aho bari batagombye gutakaza igihe.

Abakiliya ubu bashobora kugera kuri serivisi zose za MTN Rwanda biboroheye, aho bahamagara kuri code *456#.

Kuri ubu kandi bashobora kwihindurira umubare w’ibanga wa MoMo igihe babishatse ndetse no kubona PUK zo gufunguza Simcard igihe zafunzwe.

Ikindi cyatangajwe ni uko ubu kwandikisha simcard nshya no gukora Sim Swap bizajya bitwara iminota itatu yonyine.

Ku ba-agents ba MTN Rwanda, nabo bashyiriweho uburyo bwo kwigurira ama-unite yo gucuruza bakoresheje Mobile Money no kwiguriza bakishyura nyuma.

Imirongo yo gutangiraho ubufasha nayo yavuguruwe mu buryo bugezweho ku buryo byoroshye cyane gusubiza ibyifuzo by’abakiliya. Ubu ubufasha buzajya bwakirwa bunatangirwe kuri WhatsApp, Facebook, Twitter, Email cyangwa guhamagara umurongo w’ubufasha 100.

Ni mu gihe kandi icyo kigo cyavuze ko kiri gutegura uburyo bwo kwagura umurongo w’ubufasha mu ntangiriro za 2021, ibintu byitezweho gutanga serivisi zidakemangwa ku bakiliya kandi binyuze ku muyoboro udakemangwa.

MTN Rwanda yatangiye gutanga serivisi zitumanaho mu Rwanda kuva mu 1998. Ubu iyi sosiyete ikorera n’ishoramari kuri telefoni binyuze muri Mobile Money, MoMoPay, no kwizigama cyangwa kugurizwa binyuze muri Mokash.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .