00:00:00 IGIHE NETWORK KN KINYARWANDA EN ENGLISH FR FRANCAIS

Kera kabaye, RwandAir igiye kubona indege itwara imizigo

Yanditswe na Ferdinand Maniraguha
Kuya 17 Ukwakira 2022 saa 01:18
Yasuwe :

Sosiyete Nyarwanda y’Ubwikorezi bwo mu Kirere, RwandAir, yatangaje ko bitarenze uku kwezi, izaba yabonye indege itwara imizigo, igisubizo cyari kimaze igihe gitegerejwe na benshi mu bohereza ibicuruzwa hanze.

Guhera mu 2017 RwandAir yatangiye inzira zo kugura indege itwara imizigo mu rwego rwo kwagura ubushobozi na serivisi itanga.

Ni nyuma y’uko ba rwiyemezamirimo batandukanye bo mu Rwanda bagaragaje ko babura aho gutwara imizigo kuko indege zisanzwe ziba zifite umwanya muto wagenewe imizigo.

Ubwo Qatar Airways yatangiraga kurambagiza RwandAir ishaka kugura imigabane ingana na 49% muri RwandAir, icyo kibazo cyaganiriweho. Bivugwa ko Qatar yemereye RwandAir kuyifasha kubona iyo ndege y’imizigo, yaba ikodeshejwe cyangwa iguzwe.

Byavugwaga ko Qatar Airways ishobora gutiza indege sosiyete zitandukanye ifitemo imigabane. Byari gukorwa nk’uko yabigenje ubwo yatizaga Air Italy indege za A330s na 737 Max mbere y’uko iyi sosiyete iseswa.

Qatar Airways ifite indege nyinshi zitwara imizigo aho imibara igaragaza ko ari Boeing 777-200LRFs zigera kuri 21, ebyiri zo mu bwoko bwa 747-8Fs, Airbus A330-200F enye. Ifite kandi eshanu zo mu bwoko bwa 777-200 yatumije ku isoko.

Ikigaragara ni uko bishoboka kuba harabayeno kubigendamo biguru ntege kuko ikibazo cy’indege itwara imizigo cyongeye kugarukwaho mu Nama Nkuru y’Umuryango FPR Inkotanyi yabaye mu mpera za Mata n’intangiriro za Gicurasi uyu mwaka.

Perezida Kagame yagaragaje ko iki kibazo kitakabaye kigihari n’imyaka ishize kiganirwaho kandi cyarahawe umurongo.

Yagize ati “Twakiganiriyeho ibihe binini, ni ibintu bimaze imyaka. Turagira ngo nibura twumve umuzimu uri muri iki kibazo […] Niba nibuka neza, mu Nama y’Abaminisitiri mu 2017 cyaganiriweho twemeranya ko tugiye gushaka indege.”

Ntabwo ibisubizo byatanzwe icyo gihe byanyuze Perezida Kagame, asaba ko hakorwa ibishoboka byose iyo ndege ikaboneka.

Umuyobozi Mukuru wa Rwandair, Yvonne Makolo mu butumwa bugufi yahaye IGIHE kuri uyu wa Mbere, yavuze ko mu minsi ya vuba indege itwara imizigo izaba yabonetse.

Yagize ati “Aho bigeze harashimishije. Indege [itwara imizigo] izaboneka mu mpera z’uku kwezi. Tuzatangaza amakuru arambuye amatariki namara kwemezwa.”

Ntabwo yasobanuye niba indege izaboneka izaba iguzwe cyangwa ikodeshejwe, cyangwa niba izaba itanzwe na Qatar Airways nk’uko byari byemejwe.

Ba rwiyemezamirimo bohereza ibicuruzwa mu mahanga bari bamaze igihe binubira kubura uko batwara ibicuruzwa byabo.

Rwiyemezamirimo Marie Ange Ingabire afite sosiyete imwe ikora imirimo y’ubwubatsi n’indi ikora ibijyanye no kohereza ibicuruzwa mu mahanga. Yibanda cyane ku kohereza mu mahanga ibikomoka ku buhinzi birimo imbuto na avoka.

Mu nama Nkuru ya FPR Inkotanyi muri Mata uyu mwaka, yagaragaje ko kuba nta ndege y’imizigo RwandAir ifite bibateza igihombo mu bucuruzi.

Uyu rwiyemezamirimo watangiye yohereza toni eshanu ku cyumweru za Avoka, ubu ageze aho ku cyumweru kimwe yohereza toni 20, yavuze ko hari ubwo abona isoko ryo kohereza toni icumi za Avoka, ariko yagera kuri RwandAir bakamubwira ko ubushobozi bafite ari ubwo gutwara toni eshanu gusa.

Bivugwa ko mu myaka ishize ubwo hategurwaga kugura indege y’imizigo ya RwandAir, hari hateganyijwe ko bizatwara miliyoni 12$.

Ubwo icyorezo cya COVID-19 cyahagarikaga ingendo z’indege hirya no hino ku Isi, RwandAir yifashishije indege zayo nini mu gutwara imizigo ijya ahantu hatandukanye harimo Bruxelles mu Bubiligi, Guangzhou mu Bushinwa na Londres mu Bwongereza, mbere y’uko izi nzira zongera gufungurirwa abagenzi muri rusange.

Kugeza ubu RwandAir ifite indege 12 zirimo Airbus A330 – 300 imwe, Airbus A330 – 200 imwe, Boeing 737-800NG enye, Bombardier Q-400 Next Gen ebyiri, Bombardier CRJ-900 NextGen ebyiri na Boeing 737-700NG na zo ebyiri.

Rwandair yatangaje ko uku kwezi kuzashira indege itwara imizigo yabonetse

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .