Itafari Cogebanque yashyize mu iterambere ry’imishinga mito n’iciriritse

Yanditswe na Ishimwe Israel
Kuya 16 Ugushyingo 2020 saa 01:38
Yasuwe :
0 0

Muri gahunda ya Guverinoma y’Imyaka irindwi (2017-2024), u Rwanda rwihaye intego yo guhanga imirimo igera ku 200,000 idashingiye ku buhinzi buri mwaka.

Ni icyerekezo kizagerwaho hashingiwe ku mbaraga zishyirwa mu korohereza ba rwiyemezamirimo bato gushora imari binyuze mu gushyigikira imishinga mito n’iciriritse.

Uru rwego ni izingiro ry’ubukungu bwa buri gihugu kuko iyo rwubakitse bigira inyungu kuri rubanda nyamwinshi.

Gushyigikira iyi mishinga ntibirangirira gusa mu kuyiha ubushobozi bw’amafaranga ahubwo n’ubujyanama bagenerwa nabwo ni ingenzi cyane.

Cogebanque iri mu mabanki aha umwihariko imishinga ya ba rwiyemezamirimo bakizamuka ikabafasha kwaguka no kwagura ibikorwa byabo.

Iyi mishinga irimo iy’abahinzi n’aborozi bibumbiye muri koperative, abacuruzi bafite inganda nto, abakora mu rwego rw’ingufu, uburezi, ubwikorezi, ubukerarugendo n’urwego rw’ubuzima.

Umuyobozi w’Ishami rishinzwe Imishinga mito n’iciriritse muri Cogebanque, Kayumba Polepole, yabwiye IGIHE ko muri buri rwego hashyirwaho umwihariko ufasha ba rwiyemezamirimo gukora ishoramari ryabo.

Yagize ati “Intego yacu ni ugukurana n’abakiliya ku buryo buri wese yaba ari muto tujyana muri urwo rugendo. Dutangirana na bo ari bato kugeza bakuze, bagatangira gukoresha abandi.’’

Kuva mu myaka isaga 20 ishize, Cogebanque ikorera mu Rwanda yateye inkunga imishinga itandukanye.

Ati “Banki yatangijwe n’Abanyarwanda ifite intego yo gutanga umusanzu mu kubaka urwego rw’imari mu gihugu.’’

Mu korohereza imishinga kubona inguzanyo no guhabwa ubujyanama bw’uburyo yakwagurwa bigenwa hitabwa ku yifitemo imbaraga zo kungukira nyirayo no gutanga akazi ku bantu benshi.

Kayumba avuga ko hari abo bakorana bageze ku rwego rushimishije ndetse bahabwa umwihariko mu gushyira mu bikorwa imishinga yabo.

Ati “Umwihariko ni uko buri mukiliya afite umujyanama ufasha nyir’umushinga kugerwaho na serivisi z’imari mu buryo bumworoheye. Amarembo aba yuguruye ku buryo uwo ashaka kugeraho wese ashobora kumugeraho akamugira inama.’’

Binyuze mu mashami ya banki uko ari 28, abakiliya barimo na ba rwiyemezamirimo bafashwa kubona serivisi zose hifashishijwe ikoranabuhanga.

Imishinga mito n’iciriritse iri mu yagizweho ingaruka na COVID-19, imwe yisanze ibikorwa byayo byadindiye, indi irahatsikirira cyane.

Kayumba avuga ko iyo mishinga yafashijwe guhangana n’ingaruka yagizweho mu buryo butandukanye.

Ati “Hari ingamba igihugu cyafashe mu gukumira ikwirakwira ry’icyorezo ariko serivisi z’ingenzi zikomeza gukora no gutangwa. Ku bufatanye bw’inzego z`igihugu ndetse n`inzego z’imari twakomeje kuba hafi abakiliya. Amahirwe twagize ni uko twari tumaze gusobanurira abantu ibyiza byo gukoresha ikoranabuhanga muri serivisi za banki. Twasubitse igihe cyabo cyo kwishyura ku buryo babanza kwisuganya. Tubaba hafi tukabasura, tukabagira inama aho biri ngombwa.’’

- Bamenye ibanga ryo gukorana na banki mu gushyikira imishinga yabo

Yankurije Jacqueline ukora ubucuruzi mu iduka ni umwe mu bafashijwe na Cogebanque mu kwagura ibikorwa bye.

Ati “Nkora ubucuruzi bwa Boutique. Nahawe inkunga y’inguzanyo y’amafaranga.’’

Yasobanuye ko buri rwiyemezamirimo yishimira gukorana na banki imwohereza.

Ati “Icyo rwiyemezamirimo nkanjye akura mu mikoranire na banki, ni uko imuha ubufasha akeneye mu mushinga we burimo ahanini amafaranga y’inguzanyo.’’

Yasabye banki ko yatekereza ku kubongerera igihe ku badashobora kwishyura mu gihe cyagenwe.

Yakomeje ati “Nagira n’abandi ba rwiyemezamirimo kuyoboka amabanki kuko aratuzamura cyane cyane mu buryo bw’amafaranga no kubona igishoro gihagije cyo gukoresha.’’

Umwe mu bakiliya ukorana na Cogebanque yashimye uko yamufashije mu bujyanama bwo kwagura ishoramari rye ry’ubworozi bw’inkoko abinyujije muri Easy Hatch ikorera mu Karere ka Musanze.

Yagize ati “Ndi umushoramari uva hanze. Natangiye gukorana na Cogebanque mu 2016, kuva icyo gihe iduha serivisi z’imari zitandukanye kuko n’abakiliya bacu benshi barakorana. Dufitanye umubano mwiza. Iyo ngereranyije ubuzima bw’aho nturuka na serivisi za Cogebanque nabonye biri ku rwego rumwe. Ubwo nageraga ku ishami rya banki i Musanze, nasabye serivisi kandi nzihabwa neza.’’

Cogebanque ni Banki Nyarwanda itanga serivisi mpuzamahanga, ifite amashami 28 n’ibyuma bya ATM 36 bishobora kubikurizwaho, ifite aba-agents barenga 600 bayifasha gutanga serivisi zo kubitsa no kubikuza zirimo n’izifashisha ikoranabuhanga binyuze muri Internet Banking, Mobile Banking n’amakarita ya MasterCard.

Cogebanque ifasha abayigana kugerwaho na serivisi zitandukanye z'imari
Abagana Cogebanque bishimira ko bahabwa serivisi nziza
Easy Hatch yatanze akazi ku bantu b'ibyiciro bitandukanye
Easy Hatch ifite ubushobozi bwo guturaga amagi nibura 20 000 ashobora kwiyongera bitewe n’isoko
Easy Hatch imaze imyaka ine ikorera mu Karere ka Musanze aho ikorana n’aborozi b’inkoko bakajya kuzorora. Aba mbere bakuraga inkoko mu bihugu bituranye n’u Rwanda

Amafoto: Igirubuntu Darcy na Easy Hatch


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .