00:00:00 IGIHE NETWORK KN KINYARWANDA EN ENGLISH FR FRANCAIS

Inzozi za Nshimiyimana wifuza guhaza igihugu ku mavuta n’amasabune bikorwa muri avoka

Yanditswe na Léana Bisa
Kuya 30 March 2022 saa 01:27
Yasuwe :

Mu mwaka wa 2015 Alexandre Nshimiyimana yahawe amahugurwa ku buryo bwo gukora amasabune, ibintu atari yarigeze atekereza ko azakora mu buzima nubwo mu mashuri yize ibijyanye n’Ubutabire.

Ubwo yari amaze guhugurwa, yasanze gukora amasabune ari ibintu by’ingenzi kandi bikenewe dore ko ari kimwe mu bikoresho bikenerwa na buri wese ku Isi mu rwego rwo kwimakaza isuku.

Mu mufuka yari afite ibihumbi 65 Frw gusa. Ubusanzwe amasabune ava mu bintu bitandukanye ariko akenshi hifashishwa avoka. Ntabwo byamugoye kuko u Rwanda ruri mu bihugu byeza avoka nyinshi.

Mu kiganiro na IGIHE, yavuze ko yahise atangira ubucuruzi buciriritse, akagura avoka hanyuma muri bwa bumenyi yahawe, akazikoramo amasabune.

Bwa bucuruzi bwatangiye ari buto, ubu bwaragutse buvamo uruganda Sanit Wing, rubyaza umusaruro igihingwa cya avoka, aho zikorwamo amasabune asanzwe n’ay’amazi ndetse n’amavuta yo mu bwoko butandukanye yifashishwa mu zindi nganda.

Nshimiyimana yavuze ko kuri ubu batangiye kubona umusaruro w’imbuto babibye mu myaka irindwi ishize, kuko amasoko akomeje kuboneka haba imbere mu gihugu no mu mahanga.

Byatijwe umurindi n’icyemezo cya Leta cyo kugabanya ingano y’amamesa yinjizwaga mu gihugu kandi ariyo ahanini yifashishwaga mu nganda zikora ibikoresha by’isuku nk’amasabune n’amavuta yo kwisiga.

Ati “Byashyize igitutu ku isoko ry’imbere mu gihugu hanyuma ibiciro by’amamesa biriyongera. Nahise ngira igitekerezo cyo gukora andi mavuta avuye muri avoka ngo asimbure ayo mamesa.”

Kubyaza umusaruro avoka, Sanit wing ibifatanya no guteza imbere ubuhinzi bw’urwo rubuto aho uruganda rukorera mu Karere ka Burera aho akomoka.

Uretse gucuruza ibyo bakora nk’amasabune mu Rwanda, Nshimiyimana yavuze ko babonye n’amasoko muri Nigeria, Namibia, Misiri na Leta Zunze Ubumwe za Amerika, bakenera litilo ibihumbi 20 z’amavuta ya avoka ku kwezi.

Ati “Dufite abakiliya benshi ahubwo ikibazo ni uko tudafite ibikoresho bihagije byo gukora amavuta angana atyo, duteganya kuzabigeraho mu 2023.”

Kugira ngo bakemure iki kibazo bari gukangurira abashoramari ndetse n’Abanyarwanda muri rusange kumenya ibikorwa byabo no kwagura ubuso buhingwaho avoka kugira ngo u Rwanda rwihaze mu bijyanye n’amavuta.

Umuyobozi ushinzwe Iyamamazabikorwa muri Sanit Wing, James Vainqueur Bimenyimana, yavuze ko intego ari ugukomeza kwaguka kugira ngo bahe benshi akazi, dore ko kuri ubu uruganda rufite abakozi 16 bahoraho.

Ati “Dufite intego yo guhaza isoko mpuzamahanga ndetse no gutanga akazi ku Banyarwanda bagera ku 6000. Ni yo mpamvu dukangurira abashoramari ndetse n’ibigo biteza imbere ubuhinzi gushora imari muri Sanit Wing kugira ngo tubashe kugera ku ntego twihaye.”

Yakomeje agira ati “Ntituragera ku byo twifuza kuko ikibazo cyo kutabasha guhaza isoko mpuzamahanga kiracyahari.”

Sanit Wing ishaka gushyira mu bikorwa intego ya Leta y’u Rwanda yo kugabanya ibitumizwa mu mahanga bongera ibyoherezwayo kandi bafite icyizere ko bazabigeraho vuba.

Mu 2017, Nshimiyimana yahembwe n’Urwego rw’Igihugu rw’Iterambere (RDB) nka Rwiyemezamirimo w’umwaka ndetse mu minsi ishize yahawe igihembo cyo ku rwego rwa Afurika gihabwa ba rwiyemezamirimo bari mu buhinzi batanga icyizere, GoGettaz Agripreneur Prize.

Sanit Wing ifite intego zo guhaza isoko ryo mu Rwanda, igasagurira no hanze ibijyanye n'amavuta ndetse n'amasabune biva muri avoka
Nshimiyimana arifuza kongera umubare w'abakozi mu gihe uruganda ruzaba rwagutse
Santavo, amwe mu mavuta akorwa na Sanit Wing
Aya ni amavuta akorwa na Sanit Wing aboneka ku isoko
Nshimiyimana avuga ko hakiri urugendo rurerure kugira ngo bagere ku rwego bifuza
Nshimiyimana yahembwe n'Urwego rw'Igihugu rw'Iterambere (RDB) nka Rwiyemezamirimo w’Umwaka mu 2017
Uru ruganda rufite abakozi 16 bahoraho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .