00:00:00 IGIHE NETWORK KN KINYARWANDA EN ENGLISH FR FRANCAIS

Ibyitezwe ku bigega bishya bya peteroli bishobora gutunga u Rwanda amezi atatu

Yanditswe na Ntabareshya Jean de Dieu
Kuya 20 Mutarama 2023 saa 09:53
Yasuwe :

Minisiteri y’Ibikorwa remezo mu Rwanda igaragaza ko u Rwanda kuri ubu rufite ibigega by’ibikomoka kuri peteroli bishya bifite ubushobozi bwo kubika litiro miliyoni 66 biheruka kubakwa na Leta.

Ubusanzwe igihugu usanga giteganya ububiko buhagije bwo kuzigamamo ibikomoka kuri peteroli ku buryo mu gihe cy’amage gishobora kubaho amezi runaka kubera ubwikorezi buri mu bikenerwa mu buzima bwa buri munsi.

Mu bihe bitandukanye twumva inkuru z’uko ibihugu bicukura peteroli bibarizwa mu muryango wa OPEC bigenda bitangaza igabanywa ry’ingano y’iyo bitanga mu bindi bihugu kugira ngo igiciro cya peteroli kizamuke, badahomba.

N’uyu munsi niko biri kuko ibihugu bigize uyu muryango bimaze igihe byaremeranyijwe kugabanya ingano y’iyo bicuruza kuko byatakaga igihombo byirengagije ko bigira ingaruka ku bihugu bibicungiraho.

U Rwanda rwamaze kurabukwa icyo ikibazo cyo kutagira ububiko buhagije ruhitamo gushora imari mu kubaka ibigega by’ububiko bw’ibikomoka kuri peteroli byubatswe mu Murenge wa Rusororo bifite agaciro ka miliyari zirenga 54 Frw.

Mu kiganiro na IGIHE, Umuyobozi Mukuru ushinzwe Ingufu muri Minisiteri y’Ibikorwaremezo mu Rwanda, Muhama Annick, yagaraje ko ibi bigega byujujwe mu 2020.

Mu 2021 kandi u Rwanda rwabonye ko ari ngombwa rwongera kubaka ikigega cyari gifite ubushobozi bwo kubika litiro miliyoni esheshatu.

Yagaragaje ko ibi bigega byitezweho umusaruro ukomeye mu kongera ububiko bw’ibigega by’ibikomoka kuri peteroli bishobora no kwifashishwa mu bihe bikomeye.

Ati “Umushinga wo kubaka ibi bigega wari ugamije kongera ububiko bw’ingoboka bw’ibikomoka kuri peteroli mu Rwanda. Ikindi ni uko ibi bigega bifite ububiko bwahariwe ubucuruzi”

Yakomeje avuga ko kuba u Rwanda rudakora ku nyanja biba ari ingenzi cyane kubaka ububiko buhagije bw’ibikomoka kuri petiroli.

Ati “Kubera ko u Rwanda rudakora ku Nyanja, ni ngombwa kubaka ibigega kugirango kugira ngo u Rwanda rugire ubushobozi bwo kubika ibikomoka kuri peteroli bishobora kumara nibura amezi atatu bikaba byakoreshwa mu bihe bidasanzwe cyane igihe kubigura hanze bidakunda.”

Muhama yavuze ko kugira ngo u Rwanda rugere ku bisubizo nk’ibi bikenerwa mu bihe by’amage, bisaba ko Leta ifatanya n’abikorera mu kubaka ibindi bigega kugira ngo intego igihugu cyihaye yo kugira ububiko bushobora kwitabazwa mu bihe by’amage nibura bufite ubushobozi bwo kubika litiro miliyoni 150.

Mu Rwanda hari ibigega bya Leta n’iby’abikorera. Muri byo harimo nk’ibiri i Jabana bya Sosiyete yitwa OilCom, ibya SP biri i Rusororo, ibya Leta biri mu Gatsata, Rwabuye na Bigogwe, Rusororo hamwe n’ibya ERP biri Kabuye n’ibindi bitandukanye.

Ibigega bya gaz byo bigeze he?

Kimwe mu bindi bibazo bimaze igihe ni ububiko bwa gaz yo gutekesha muri ibi bihe iri kwitabirwa n’abatari bake mu Rwanda ariko ugasanga mu bice bitandukanye ibageraho kuko yaranguriwe i Kigali.

Hari gahunda ko igihugu gifatanyije n’abikorera hagomba kubakwa ibigega bya gaz mu bice bitandukanye by’igihugu kugira ngo abaturage boroherwe no kuyibona.

Minisiteri y’Ibikorwaremezo igaragaza ko kugeza uyu munsi ibigega bya gazi bihari ari iby’abikorera gusa.

Mu Rwanda hamaze kubakwa ibigega bya gaz bifite ubushobozi bwo kubika megatone(Mt) 706.25.

Muri 2020 Gicurasi, Guverinoma yasinye amasezerano yo kubaka ibigega bya gaz bifite ubushobozi bungana na 17,100 m3 (8,550 Mt) i Rusororo, ayo masezerano aza kuvugururwa muri Nyakanga 2021.

Kuri ubu imirimo yo kubaka yatangiye muri Mata 2022, bikaba biteganyijwe ko imirimo yo kubaka izarangira muri Mata 2024.

SP ni kimwe mu bigo bifite ububiko bw'ibikomoka kuri peteroli hirya no hino mu gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .