Hatangijwe ikigo kizafasha mu iterambere ry’ubuhinzi bw’u Rwanda hifashishijwe ikoranabuhanga

Yanditswe na Umutoni Rosine
Kuya 22 Gashyantare 2021 saa 07:55
Yasuwe :
0 0

Ikigo cy’abanya-Nigeria gisanzwe gikorera muri Afurika y’uburengerazuba mu iterambere ry’ubuhinzi (Farmcrowdy), cyatangiye gukorera mu Rwanda, kigamije kuzamura umubare w’urubyiruko rukora ubuhinzi no gufasha abahinzi bato kugezwaho inyongeramusaruro hakoreshejwe murandasi na serivisi z’imari n’ubwishingizi.

Muri Afurika, ubuhinzi bugira uruhare rwa 32 % ku musaruro mbumbe mu gihe bukorwa n’abagera kuri 70 %. Mu Rwanda naho abasaga 60 % bakora ubuhinzi kandi abenshi ni abantu bakuru.

Mu gihe Afurika n’u Rwanda bishaka guteza imbere ubuhinzi bukava kubw’amaramuko bukajya ku buhinzi bugamije isoko, ni ngombwa ko rubyiruko rubifitemo ubumenyi rubyitabira kandi rukoroherezwa ngo hakoreshwe ikoranabuhanga.

Ikigo Farmcrowdy gisanzwe gitanga serivisi zitandukanye zigamije gufasha abahinzi gukoresha ikoranabuhanga muri Afurika y’Iburengerazuba, aho gikorana n’abahinzi basaga ibihumbi 400.

Fionah Umulisa niwe wahawe kuyobora ibikorwa bya Farmcrowdy mu Rwanda. Yabwiye IGIHE ko icyo kigo cyifuje gukorana n’abahinzi bo mu Rwanda kuko ari igihugu kirajwe ishinga no guteza imbere ikoranabuhanga mu nzego zose.

Iki kigo kimaze amezi abiri ku butaka bw’u Rwanda, intego ni ugufasha abahinzi gukoresha ikoranabuhanga mu buhinzi bwabo no kuborohereza kugera kugezwaho inyongeramusaruro zituruka mu nganda ndetse no ku bigo by’imari n’iby’ubwishingizi, ari nabyo bikunze gukoma mu nkokora bamwe.

Umulisa yagize ati “Tuzanye ubuhanga mu kwegereza inyongeramusaruro mu buhizi n’ubworozi abagenerwabikorwa hifashishijwe ikoranabuhanga. Tuzanye kandi guha ubushobozi abahinzi-borozi bato kubona imari n’ubwishingizi bw’ibihingwa binyuze ku bufatanye n’ibigo by’imari n’amasosiyete y’ubwishingizi muri Afurika y’Iburengerazuba. Twizera ko mu gihe dufatanya n’abafatanyabikorwa b’u Rwanda, ibikenerwa n’abahinzi bizagera ku isoko vuba.”

Yavuze ko mu ntego bafite, ari uko ibyo abahinzi n’aborozi bakeneye bibageraho mu buryo bworoshye kugira ngo bongere umusaruro. Ati "Tuzajya tubibavanira mu nganda tubibasangishe aho bari".

Ati “ Nk’urugero koperative y’aborozi b’inka cyangwa inkoko ahantu runaka mu gace ka kure cyangwa mu mujyi, ishobora gutumiza ibiryo cyangwa imiti ku bacuruzi babifitemo uruhushya aho bari hose bakabibagezaho kandi hari ikigo cyita ku buhinzi bahamagara hamwe na veterineri, mu gihe bikenewe gusobanurwa cyangwa gushyigikirwa muri rusange. Mu gukoresha urubuga rwacu, abahinzi nabo bazabona serivisi z’imari n’ibicuruzwa biva mu bigo dukorana.”

Urubyiruko rutarengeje imyaka 25 rugize 60 % by’abaturage miliyari 1.2 batuye Afurika, nyamara nirwo rwibasiwe n’ubushomeri cyane cyane mu bice by’icyaro.

Umulisa yavuze ko kugira ngo urubyiruko rwitabire ubuhinzi muri Afurika, bisaba imbaraga z’abafatanyabikorwa batandukanye, hashyirwaho ibikorwa remezo n’ibindi bituma babona ubuhinzi nk’ahantu hari amahirwe y’iterambere.

Ati “Inzego z’abafatanyabikorwa zigomba gufata umwanya ku guhanga udushya twakozwe n’urubyiruko, niba hari udushya twakozwe birakwiriye ko dushyigikirwa.”

Imibare y’Ikigo gishinzwe ibarurishamibare (NISR) igaragaza ko mu Rwanda hari abahinzi bagera kuri 58 % nyamara icyo cyiciro gitanga 31% by’umusaruro mbumbe w’igihugu.

Ubushakashatsi bwa kane ku mibereho y’ingo (EICV4) bwagaragaje ko 90 % by’ibiribwa bikoreshwa mu Rwanda bikomoka mu gihugu.

Imibare ya Banki y’Isi igaragaza ko ubuhinzi muri Afurika biteganyijwe ko buzaba bwinjiza tiliyari imwe y’amadolari mu mwaka wa 2030.

Byitezwe ko urubyiruko ruzafashwa kujya mu buhinzi bw'umwuga, rworoherezwa kugera ku bigo by'imari n'ubwishingizi
Umulisa yavuze ko ibyo bazakora byose bazibanda ku gukoresha ikoranabuhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .