Bruxelles: Ibigo byo mu Rwanda n’iby’i Burayi bizahurizwa mu cyumweru cy’imurikagurisha n’ishoramari

Yanditswe na Ishimwe Israel
Kuya 24 Ukuboza 2019 saa 07:43
Yasuwe :
0 0

Ku nshuro ya mbere hateguwe igikorwa cyiswe, Rwanda-Europe Business Week 2020, kizahuza ibigo bikomeye na ba rwiyemezamirimo bo mu Rwanda na bagenzi babo bo ku Mugabane w’u Burayi hagamijwe gusangira ubunararibonye no kwagura imikoranire.

Rwanda-Europe Business Week 2020 izabera mu Mujyi wa Bruxelles kuva ku wa 20-22 Gashyantare 2020. Ni igikorwa cy’amateka kuko u Rwanda ruzaba rubaye igihugu cya mbere mu bibarizwa muri Afurika gihurije hamwe abashoramari n’ibigo by’i Burayi.

Cyateguwe na BEREXINVEST, Ikigo gifasha muri serivisi z’Ishoramari n’Ubucuruzi bwo hanze mu bihugu byo muri Afrika n’i Burayi gikorera mu Bubiligi, cyashinzwe n’Umunyarwanda Ntasinzira Dieudonné.

Icyo gikorwa cyahurijweho amaboko na Minisiteri y’Ubucuruzi n’Inganda; Ikigo cy’Igihugu cy’Iterambere (RDB); Urugaga rw’Abikorera (PSF); Ikigo cy’Igihugu gishinzwe kohereza mu mahanga ibikomoka ku Buhinzi n’Ubworozi mu Rwanda (NAEB) na Minisiteri y’Ububanyi n’Amahanga.

Rwanda-Europe Business Week 2020 izahuza abashoramari bo mu Rwanda n’abagize ibihugu bibarizwa mu Muryango w’Ubumwe bw’u Burayi (EU) aho bazasangira ubunararibonye n’amakuru ashobora kubyara amahirwe y’ishoramari.

Inzego zizahabwa intebe mu zizibandwaho zirimo ingufu, ikoranabuhanga, ishoramari, ubukerarugendo, ubwubatsi, ubuhinzi n’ubworozi n’ibindi.

Biteganyijwe ko ubukerarugendo bw’u Rwanda buzerekanwa, amahirwe aburimo ndetse n’umuco w’igihugu ugaragazwe i mahanga.

Umuyobozi wa BEREXINVEST, Ntasinzira Dieudonné, yabwiye IGIHE ko ambasade umunani z’u Rwanda zatangiye kurambagiza ibigo bizitabira iki gikorwa.

Ati “Harimo ibigo bya ba mukerarugendo, abashoramari, Abanyarwanda baba mu Burayi n’abafata ibyemezo mu nzego za leta bafasha mu kunoza imikoranire hagati y’u Rwanda n’u Burayi.’’

Yavuze ko iki gikorwa cyitezwemo inyungu nyinshi zirimo no gukomeza guteza imbere Made in Rwanda no kuyimenyakanisha ku Mugabane w’i Burayi.

Ati “Rwanda – Europe Business Week 2020 ni ubwa mbere iteguwe mu buryo buzahuza ibigo by’igenga n’ibya leta bifite uruhare mu bukungu bw’u Rwanda ngo tubihuze n’iby’i Burayi. Icya mbere bizatanga ubufatanye mu kuzamura ubucuruzi hagati y’impande zombi.

“Ikindi ni ukugira ngo ibikorerwa mu Rwanda birusheho kumenyekana i Burayi no gukurura abasura igihugu binyuze muri gahunda ya Visit Rwanda. Icya gatatu ni ukwegereza Abanyarwanda b’i mahanga serivisi bakenera ntibazibone kuko si ko bose bagira amahirwe yo kuza mu Rwanda buri kwezi. Urugero nka serivisi za Banki, ubwishingizi, iz’ubutaka, iz’imisoro n’amahôro (RRA) n’izindi.’’

Muri iri murikagurisha ry’iminsi itatu, abazaryitabira bazasobanurirwa ibyiza biri mu gushora imari mu Rwanda.

Raporo ya Banki y’Isi ku buryo ibihugu byorohereza ishoramari ya 2020, yashyize u Rwanda ku mwanya wa kabiri muri Afurika nk’ahantu byoroshye gukorera ubucuruzi n’urwa 38 ku Isi.

Ibigo byo mu Rwanda kandi bizahuzwa n’ibyo hanze harebwa aho bishobora gukorana ndetse binasinye amasezerano. Ibi bizafungura amarembo y’isoko ku b’i Burayi no gutinyura abacuruzi kuriganaho kuko bafite ibicuruzwa rikeneye.

Ntazinzira yavuze ko kuba RwandAir igerayo bizihutisha ubucuruzi hagati y’u Rwanda n’ibihugu by’i Burayi.

Ati “Turacyashaka guha imbaraga ibyoherezwa hanze, uburyo duha ingufu cyane ibintu bikorerwa cyangwa bihingwa mu Rwanda nk’ikawa n’icyayi, imbuto, imboga n’imiteja ibyo byagezeyo ariko turifuza ko hashyirwamo ingufu cyane kugira ngo bigende ari byinshi.’’

Muri iyi mikoranire hahanzwe amaso amaguriro akomeye mu Burayi ashobora gukoresha ibicuruzwa biva mu Rwanda ku buryo amenya ko urwa Gasabo rufite isoko rifite ibicuruzwa byujuje ubuziranenge.

Ibigo byo mu Rwanda bizitabira iri murikagurisha usibye amahirwe y’imikoranire, bizanahaha ubumenyi bwisumbuyeho bwabifasha mu mikorere ya buri munsi.

Muri iri murikagurisha kandi hateganyijwe ubucuruzi, ihuriro rya ba rwiyemezamirimo, gusura inganda, ingendoshuri n’umugoroba wo gutarama.

Kuri ubu Abanyarwanda baba i Burayi basaga 52 200, muri bo 35 000 baba mu Bubiligi.

Ikigo gishaka kwiyandikisha mu bizitabira Rwanda - Europe Business Week 2020 cyegera BEREXINVEST muri Minisiteri y’Ubucuruzi n’Inganda.

Tour & Taxis ni yo nyubako izaberamo imurikagurisha rikomeye ritegerejwe mu ntangiriro za 2020
U Rwanda rugiye kuba igihugu cya mbere muri Afurika kizahuriza hamwe ibihugu by’i Burayi mu imurikagurisha rigamije guhuza impande zombi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza