Banki y’Isi yahaye u Rwanda miliyoni 150 $ azifashishwa mu bikorwa by’iterambere ry’abaturage

Yanditswe na IGIHE
Kuya 18 Ukuboza 2020 saa 08:33
Yasuwe :
0 0

Banki y’Isi yahaye u Rwanda miliyoni 150 z’amadolari (hafi miliyari 150 Frw) agabanyije mu bice bibiri aho kimwe ari inkunga ikindi kikaba cyatanzwe nk’inguzanyo, agamije kwifashishwa mu bikorwa bigamije imibereho myiza y’abaturage.

Aya mafaranga yemejwe n’Inama y’Ubutegetsi ya Banki y’Isi kuri uyu wa Kane, atangwa binyuze mu Ishyirahamwe Mpuzamahanga ry’Iterambere (International Development Association-IDA) risanzwe ritera inkunga imishinga itandukanye.

Agabanyije mu bice bibiri aho miliyoni 75 z’amadolari ari inkunga mu gihe izindi ari inguzanyo. Ni amafaranga agenewe ibikorwa by’iterambere ry’abaturage biteganyijwe muri gahunda y’igihugu y’imyaka irindwi (2017-24)

Banki y’Isi yatangaje ko aya mafaranga azafasha u Rwanda mu gukora amavugurura y’ingenzi mu nzego zitandukanye no gushyiraho porogaramu zifasha abaturage muri rusange.

Azifashishwa mu bikorwa bifasha imiryango by’umwihariko abana bato ku buryo babaho mu buzima butuma biga neza, azifashishwa kandi mu gushyigikira gahunda yo kugeza serivisi z’ubuzima kuri bose no kongera ingufu mu gufasha imiryango itishoboye.

Umuyobozi wa Banki y’Isi mu Rwanda, Rolande Pryce, yatangaje ko iki gikorwa kizafasha u Rwanda kurushaho kunoza imikoranire hagati ya za minisiteri n’inzego zitandukanye hagamijwe iterambere ry’imiryango, abagore n’abana kugira ngo barusheho kugira imibereho myiza.

Mu gihe cy’imyaka itatu byitezwe ko aya mafaranga azafasha nibura imiryango 100.000 kugira ngo ibashe kwigobotora ingaruka zatewe n’icyorezo cya COVID-19, ndetse azifashishwa mu bikorwa biteza imbere abatishoboye basanzwe bafashwa binyuze mu porogaramu zibagenewe. Byitezwe kandi ko azifashishwa mu kurushaho kwita ku barimu bo mu mashuri abanza n’ayisumbuye hamwe n’abaforomo n’abaganga.

Banki y’Isi yahaye u Rwanda miliyoni 150 $ azifashishwa mu bikorwa bigamije imibereho myiza y'abaturage. Igice kimwe cy'aya mafaranga ni inguzanyo ikindi ni inkunga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .